1 Corintios 10:1-33
10 Beora túunaʼ, sukuʼuneʼex, in kʼáat ka a wojéelteʼexeʼ k-úuchben láakʼtsiloʼobeʼ tuláakloʼob yanchajoʼob yáanal le múuyaloʼ,+ tuláakloʼob kʼáatmáanoʼob ichil le kʼáaʼnáaboʼ,+
2 tuláakloʼob tsʼaʼab u yokjaʼob yéetel le múuyaloʼ bey xan yéetel le kʼáaʼnáab tumen ku tsaypachtikoʼob Moisésoʼ,
3 tuláakloʼob tu jaantoʼob le janal tu tsʼáaj Diosoʼ+
4 yéetel tuláakloʼob tu yukʼoʼob le jaʼ tu tsʼáaj Diosoʼ.+ Lelaʼ tu beetoʼob tumen tuláakloʼob ku yukʼikoʼob kaʼach u jaʼil le nojoch tuunich tu tsʼáaj Diosoʼ, le tuunichaʼ Cristo le máax ku bin kaʼach tu yéeteloʼoboʼ.+
5 Kex beyoʼ u maas yaʼabil tiʼ letiʼobeʼ maʼ kʼaʼamoʼob tumen Diosiʼ, le oʼolal kíimoʼob teʼ desiertooʼ.+
6 Le baʼaloʼobaʼ úuchoʼob utiaʼal ka kaanbalnakoʼon, utiaʼal maʼ k-tsʼíiboltik baʼaloʼob kʼaastak jeʼex tu beetil letiʼobeʼ.+
7 Mix k-adorartik imagenoʼob jeʼex tu beetil jujuntúul tiʼ letiʼobeʼ; tumen jeʼex tsʼíibtaʼanilaʼ: «Le kaajoʼ kulaj janal yéetel ukʼul, ka tsʼoʼokeʼ joʼopʼ u kiʼimakkúuntik u yóoloʼob».+
8 Mix k-lúubul tiʼ núupkʼeban* jeʼex úuchik u núupkʼebantal jujuntúul tiʼ letiʼobeʼ, ka kíim 23,000 u túulaloʼob chéen tiʼ junpʼéel kʼiiniʼ.+
9 Mix k-tsʼáaik a pruebail Jéeoba+ jeʼex tsʼaʼabik a pruebail tumen jujuntúul máakoʼobeʼ ka kíimoʼob úuchik u chiʼibloʼob tumen kaanoʼob.+
10 Mix xan k-tutukchiʼex jeʼex úuchik u tutukchiʼ jujuntúul tiʼ letiʼobeʼ,+ ka kíimsaʼaboʼob tumen le máax ku xuʼulsajoʼ.+
11 Bey túunoʼ, tuláakal le baʼaloʼobaʼ úuchtiʼob utiaʼal ka kaanbalnakoʼon, yéetel tsʼíibtaʼaboʼob utiaʼal ka k-kanáant maʼ u yúuchultoʼon beyoʼ,+ toʼon máaxoʼon kuxaʼanoʼon teʼ tu tsʼook kʼiiniloʼob le yóokʼol kaabaʼ.
12 Le oʼolaleʼ le máax ku tuklik waʼalakbal maʼalobeʼ u kanáant maʼ u lúubul.+
13 Le pruebaʼob ka aktáantkeʼexoʼ letiʼe ku aktáantik xan tuláakal máakoʼ.+ Chéen baʼaleʼ Dioseʼ ku béeykuntik baʼax ku yaʼalik yéetel maʼ ken u chaʼa a tsʼaʼabaleʼex a pruebail maas tiʼ le ku páajtal a muʼyajtikeʼexoʼ,+ baʼaxeʼ le táan a tsʼaʼabaleʼex a pruebailoʼ yaan u tsʼáaik tuʼux a púutsʼleʼex utiaʼal ka páajchajak u chúukpajal a wóoleʼex a muʼyajteʼex.+
14 Le oʼolaleʼ, in sukuʼuneʼex, maʼ a adorarkeʼex imagenoʼob.+
15 Táan in tʼaan ta wéeteleʼex jeʼex in tʼaan yéetel máakoʼob yaan u naʼatoʼobeʼ; ileʼex wa jaaj le baʼax kin waʼalikaʼ wa maʼ.
16 Le copa ikil u tsʼaʼabal gracias, le baʼax oʼolal xan k-tsʼáaik gracias tiʼ Diosoʼ, ¿maʼ wa letiʼe u kʼiʼikʼel Cristo ku taasiktoʼon utsiloʼ?+ Le waaj k-xetʼikoʼ, ¿maʼ wa letiʼe u wíinklil Cristo ku taasiktoʼon utsiloʼ?+
17 Chéen junpʼéeliliʼ waaj yaan, toʼon túuneʼ kex yaʼaboʼoneʼ,+ tuláakloʼon k-jaantik le waaj jeʼeloʼ tumen junpʼéeliliʼ wíinkliloʼon.
18 Ileʼex le u kajnáaliloʼob Israeloʼ: le máaxoʼob jaantik le kíimsbil baʼalcheʼob ku kʼuʼubloʼoboʼ, ¿maʼ wa táan u jaantikoʼob le baʼaxoʼob ku tsʼaʼabal teʼ altaroʼ?+
19 ¿Baʼax túun in kʼáat in waʼal yéetel lelaʼ? ¿In kʼáat wa in waʼal yaan u biilal le baʼax ku kʼuʼubul tiʼ le imagenoʼoboʼ? ¿In kʼáat wa in waʼal yaan u biilal le imagenoʼoboʼ?
20 Maʼatech, baʼax in kʼáat in waʼaleʼ, le baʼax ku kʼuʼubul tumen le j-táanxel luʼumiloʼoboʼ tiʼ demonioʼob ku kʼubkoʼob, maʼ tiʼ Diosiʼ.+ Teneʼ maʼ in kʼáat ka a jaanteʼex le baʼaxoʼob ku kʼuʼubul tiʼ le demonioʼoboʼ.+
21 Maʼ tu páajtal a wukʼikeʼex le baʼax yaan tu copa Jéeoba wa táan a wukʼikeʼex le baʼax yaan tu copa le demonioʼoboʼ. Maʼ tu páajtal a jaantikeʼex le baʼax yaan yóokʼol «u mesa Jéeoba»+ wa táan a jaantikeʼex le baʼax yaan yóokʼol u mesa le demonioʼoboʼ.
22 ¿Táan wa k-kaxtik ka ‹pʼuʼujuk* Jéeoba›?+ Toʼoneʼ maʼ maas muʼukʼaʼanoʼon tiʼ letiʼiʼ, ¿máasaʼ?
23 Tuláakal baʼal jeʼel u páajtal u beetik máakeʼ, chéen baʼaleʼ maʼ tuláakal baʼal ku taasik utsiliʼ. Tuláakal baʼal jeʼel u páajtal u beetik máakeʼ, chéen baʼaleʼ maʼ tuláakal baʼal ku líiʼsik u yóol máakiʼ.+
24 Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil.+
25 Jeʼel u páajtal u seguer a jaantikeʼex jeʼel baʼaxak ku koʼonol teʼ mercadooʼ,* chéen baʼaleʼ maʼ a kʼáatkeʼex mix baʼal utiaʼal maʼ a chiʼichnakkúuntaʼaleʼex tumen a concienciaʼex;
26 tumen «le luʼum yéetel tuláakal baʼax chupmiloʼ u tiaʼal Jéeoba».+
27 Wa ka aʼalaʼakteʼex ka xiʼikeʼex janal tumen juntúul máax maʼ tu creertik Dios yéetel a kʼáateʼex bineʼ jaanteʼex jeʼel baʼaxak ka tsʼaʼabakteʼexeʼ, chéen baʼaleʼ maʼ a kʼáatkeʼex mix baʼal utiaʼal maʼ a chiʼichnakkúuntaʼaleʼex tumen a concienciaʼex.
28 Chéen baʼaleʼ wa yaan máax ku yaʼalikteʼex: «Lelaʼ junpʼéel baʼal kʼubaʼan tiʼ imagenoʼob», maʼ a jaantikeʼex utiaʼal maʼ a beetkeʼex u tʼóochpajal le máax aʼalteʼexoʼ mix a beetkeʼex u chiʼichnaktal mix máak tu yoʼolal u conciencia.+
29 Maʼ táan in tʼaan tiʼ a concienciaiʼ, baʼaxeʼ tiʼ u conciencia uláakʼ máak. ¿Baʼaxten u conciencia juntúul máakeʼ unaj u juzgartik le baʼax ku chaʼabal in beetik tumen in concienciaoʼ?+
30 Wa kin tsʼáaik gracias tiʼ Dios yoʼolal le baʼax kin jaantikoʼ, ¿baʼaxten túun ku yaʼalaʼalten baʼal yoʼolal le baʼax kin tsʼáaik gracias tiʼ Diosoʼ?+
31 Le oʼolaleʼ wa táan a janaleʼex, wa táan a wukʼuleʼex bey xan wa táan a beetkeʼex uláakʼ baʼaleʼ, beeteʼex tuláakal baʼal utiaʼal ka alabartaʼak Dios.+
32 Kanáanteʼex maʼ a beetkeʼex u tʼóochpajal le judíoʼoboʼ, le griegoʼoboʼ mix u múuchʼulil Dios,+
33 beeteʼex jeʼex teneʼ, tumen teneʼ táan in beetik u kiʼimaktal u yóol tuláakal máak yéetel tuláakal le baʼaxoʼob kin beetkoʼ. Maʼ táan in kaxtik chéen in wutsiliʼ,+ baʼaxeʼ u yutsil yaʼabkach máakoʼob utiaʼal ka u salvartubaʼob.+
