1 Corintios 8:1-13
8 Bey túunoʼ tuláakloʼoneʼ yaantoʼon kʼaj óolalil+ tiʼ baʼaloʼob yaan yil yéetel le janaloʼob kʼubaʼanoʼob tiʼ le imagenoʼoboʼ.+ Le baʼax u yojel máakoʼ jeʼel u beetik u nojbaʼalkúuntkubaeʼ, chéen baʼaleʼ le yaabilajoʼ ku muʼukʼaʼankúuntik u yóol máak.+
2 Kex wa yaan máax ku tuklik u kʼaj óol wa baʼaxeʼ, u jaajileʼ maʼ kʼuchuk u kʼaj óolt tubeel jach jeʼex unaj u kʼaj óoltikoʼ.
3 Chéen baʼaleʼ wa yaan máax u yaabiltmaj Dioseʼ, Dioseʼ u kʼaj óol xan le máakaʼ.
4 Beora túunaʼ koʼoneʼex tʼaan tu yoʼolal u jaantaʼal baʼaloʼob kʼubaʼanoʼob tiʼ le imagenoʼoboʼ. Toʼoneʼ k-ojleʼ le imagenoʼoboʼ jach mix baʼal u biilaloʼob,+ tsʼoʼoleʼ k-ojel xaneʼ chéen juntúuliliʼ Dios yaan.+
5 Tumen kex yaan le ku yaʼalaʼaltiʼob «diosoʼob» teʼ kaʼan wa teʼ luʼumaʼ,+ yéetel kex yaʼab «diosoʼob» yéetel yaʼab «yuumtsiloʼob» yaneʼ,
6 u jaajileʼ k-tiaʼal toʼoneʼ chéen juntúuliliʼ Dios yaan,+ le Taataoʼ,+ tiʼ máax ku taal tuláakal baʼal yéetel tu yoʼolal máax kuxaʼanoʼon.+ Chéen xan juntúuliliʼ Yuumtsil yaan, Jesucristo, le máax oʼolal beetaʼab tuláakal baʼaloʼ+ yéetel tu yoʼolal xan letiʼeʼ yanoʼon.
7 Chéen baʼaleʼ maʼ tuláakal máak u yojel le baʼaloʼobaʼ.+ Baʼaxeʼ jujuntúuloʼobeʼ tumen ku adorarkoʼob kaʼach imagenoʼobeʼ, le kéen u jaantoʼob le baʼaloʼob kʼubaʼanoʼob tiʼ le imagenoʼoboʼ ku tuklikoʼob táan u adorarkoʼob le imagenoʼoboʼ.+ U concienciaʼob túuneʼ tumen maʼ muʼukʼaʼaneʼ, ku kʼastal.+
8 Chéen baʼaleʼ le janaloʼ maʼ tu maas natsʼkoʼon tiʼ Dios;+ wa maʼ k-janaleʼ mix baʼal k-perdertik, yéetel wa k-janaleʼ mix baʼal xan ganartik.+
9 Chéen baʼaleʼ le kéen a beeteʼex wa baʼax yaanteʼex u derechoil a beetkeʼexeʼ seguernak a kanáantkeʼex maʼ a beetkeʼex u tʼóochpajal le máaxoʼob maʼ muʼukʼaʼan yaniloʼoboʼ.+
10 Tumen wa ka ilaʼakech tumen wa máax, teech máax yaantech kʼaj óolalil kulukbalech janal teʼ templo tuʼux ku adorartaʼal imagenoʼoboʼ, ¿maʼ wa le máax maʼ muʼukʼaʼan yaniloʼ jeʼel u túulchʼintaʼal tumen u conciencia ka u jaant baʼaloʼob kʼubaʼan tiʼ imagenoʼobeʼ?
11 U jaajileʼ tu yoʼolal baʼax a wojel techoʼ ka kʼaskúuntik le máax maʼ muʼukʼaʼan u fejoʼ, le a sukuʼun tu yoʼolal máax kíim Cristooʼ.+
12 Bey túunoʼ, le kéen kʼebanchajkeʼex tu contra a sukuʼuneʼex yéetel le kéen a túulchʼinteʼexoʼob u beetoʼob baʼaloʼob ku binoʼob tu contra u concienciaʼob maʼ muʼukʼaʼanoʼ,+ teʼexeʼ táan a kʼebantaleʼex tu contra Cristo.
13 Le oʼolaleʼ wa le baʼax kin jaantik ku beetik u tʼóochpajal in sukuʼuneʼ junpuliʼ maʼ ken in kaʼa jaant bakʼ utiaʼal maʼ in beetik u tʼóochpajal in sukuʼun.+
