1 Corintios 9:1-27
9 ¿Maʼ wa jeʼel u páajtal in beetik jeʼel baʼalak in kʼáateʼ? ¿Maʼ wa apóstoleniʼ? ¿Maʼ wa in wilmaj k-Yuumtsil Jesúsiʼ?+ ¿Maʼ wa teʼex u yich le meyaj tu kʼubéentajten Yuumtsiloʼ?
2 Kex wa uláakʼ máakoʼob maʼ tu yilkenoʼob bey apóstoleʼ, teneʼ jach in wojel apóstolen a tiaʼaleʼex, tumen teʼexeʼ beyeʼex junpʼéel sello ku yeʼesik juntúul u apóstolen Yuumtsileʼ.
3 Lelaʼ letiʼe baʼax kin waʼalik tin woʼolal tu táan le máaxoʼob juzgarkenoʼ:
4 yaantoʼon u páajtalil k-jaantik yéetel k-ukʼik wa baʼax, ¿máasaʼ?
5 Yaantoʼon u páajtalil u tsʼoʼokol k-beel yéetel juntúul koʼolel ku meyajtik Dios+ yéetel k-bisik t-éetel, jeʼex u beetik u maasil apóstoloʼoboʼ, jeʼex u beetik u yíitsʼinoʼob Yuumtsiloʼ+ yéetel jeʼex u beetik Cefasoʼ,*+ ¿máasaʼ?
6 ¿Chéen wa teen yéetel Bernabé+ unaj k-meyaj utiaʼal k-kaxtik k-kuxtal?
7 ¿Máax soldadoil jeʼel u meyaj wa maʼatech u boʼotaʼaleʼ? ¿Máax ku pakʼik uva, pero maʼatech u jaantik u yich?+ Wa ¿máax ku kanáantik tamanoʼob, pero maʼatech u yukʼik mix junpʼíit tiʼ le leche ku tsʼáaikoʼoboʼ?
8 ¿Ka tuklikeʼex wa táan in waʼalik le baʼaloʼob chéen tumen bey suuk u beetik le máakoʼoboʼ? ¿Maʼ wa tak le Ley aʼalik le baʼaloʼobaʼ?
9 Tumen tsʼíibtaʼan tu Ley Moisés: «Maʼ unaj a pixik u chiʼ juntúul wakax tsʼaʼan u tsʼatsʼaʼchaʼat le trigo utiaʼal u jóoʼsaʼal u neekʼoʼ».+ ¿Táan wa kaʼach u tuukul Dios tiʼ wakaxoʼob?
10 ¿Maʼ wa t-oʼolal aʼalaʼab leloʼ? U jaajileʼ t-oʼolal tsʼíibtaʼabi, tumen le máax ku péeksik le luʼumoʼ bey xan le máax ku luʼsik u sojlil le neekʼoʼ unaj u beetik tumen táan u páaʼtik u tsʼaʼabaltiʼ junjaatsiʼ.
11 Wa toʼon tsʼoʼok k-pakʼik baʼaloʼob ku taal tiʼ Dios ichileʼexeʼ, ¿maʼ wa túun maʼalob ka a tsʼáaʼextoʼon jujunpʼéel baʼaloʼob kʼaʼabéettoʼon utiaʼal k-kuxtaliʼ?+
12 Wa uláakʼ máakoʼob yaantiʼob u derechoil u kʼáatkoʼobteʼex le baʼaloʼobaʼ, ¿maʼ wa túun maas yaan derecho toʼoniʼ? Kex beyoʼ toʼoneʼ maʼ meyajnaktoʼon le derechoaʼ,+ baʼaxeʼ ku chúukpajal k-óol k-muʼyajt tuláakal baʼal utiaʼal maʼ k-beetik wa baʼax jeʼel u kʼatik u beel le maʼalob baʼaloʼob ku máan tsikbaltbil tu yoʼolal Cristooʼ.+
13 ¿Maʼ wa a wojleʼexeʼ le máaxoʼob ku meyajoʼob teʼ templooʼ ku jaantikoʼob le baʼaloʼob yaan teʼ templooʼ, yéetel le máaxoʼob mantatsʼ ku meyajoʼob teʼ altaroʼ ku tsʼaʼabaltiʼob junjaats tiʼ le baʼaxoʼob yanoʼob teʼ altaroʼ?+
14 Yuumtsil xaneʼ tu yaʼaleʼ le máaxoʼob ku máan u tsikbaltoʼob u tʼaan Diosoʼ ka kuxlakoʼob tiʼ le meyaj ku beetkoʼobaʼ.+
15 Chéen baʼaleʼ teneʼ mix baʼal tsʼoʼok in kʼáatikteʼex.+ U jaajileʼ le baʼaloʼobaʼ maʼ tin tsʼíibtaj utiaʼal ka a beeteʼex tin woʼolaliʼ, ¡tumen maas maʼalob ka kíimken ke ka in chaʼa tiʼ wa máax u luʼsikten le baʼax oʼolal kin nojbaʼalkúuntkinbaoʼ!+
16 Beora túunaʼ kex táan in máan in tsikbalt u tʼaan Dioseʼ minaʼan baʼax óolal in nojbaʼalkúuntkinba tumen deporsi kʼaʼabéet in beetik. U jaajileʼ, ¡óotsilen wa maʼ in beetik le meyajaʼ!+
17 Wa kin beetik yéetel kiʼimak óolaleʼ yaan in kʼamik u boʼolil, chéen baʼaleʼ wa maʼ yéetel kiʼimak óolal kin beetkeʼ, jeʼel bixakeʼ, kʼubéentaʼanten ka in beet le nojoch meyajaʼ.+
18 ¿Máakalmáak túun le boʼol kin kʼamkoʼ? Letiʼe maʼ in boʼotaʼal ikil in máan in tsikbalt le jatsʼuts baʼaloʼob ken u beet Diosoʼ. Beyoʼ junpuliʼ maʼ ken in kʼáat le baʼaloʼob yaanten u derechoil in kʼáatik ikil in máan in tsikbalt u tʼaan Diosoʼ.
19 Tumen kex maʼ u esclavoen mix máakeʼ tsʼoʼok in beetkinba esclavo tiʼ tuláakal máak utiaʼal in natsʼik le bukaʼaj máakoʼob ku páajtal tu yiknal Cristooʼ.
20 Le oʼolaleʼ tiʼ le judíoʼoboʼ tin beetinba bey judío utiaʼal in natsʼik le judíoʼob tu yiknal Cristooʼ.+ Tiʼ le máaxoʼob yanoʼob yáanal leyoʼ tin beetinba bey tiʼ yanen yáanal leyeʼ, kex teneʼ minaʼanen yáanal ley, utiaʼal in natsʼik tu yiknal Cristo le máaxoʼob yanoʼob yáanal leyoʼ.+
21 Tiʼ le máaxoʼob minaʼanoʼob yáanal leyoʼ tin beetinba bey minaʼanen yáanal leyeʼ, kex teneʼ kin tsʼoʼokbesik u ley Dios bey xan u ley Cristo,+ utiaʼal in natsʼik tu yiknal Cristo le máaxoʼob minaʼanoʼob yáanal leyoʼ.
22 Tiʼ le minaʼan u muukʼoʼoboʼ tin beetaj bey minaʼan in muukʼeʼ,+ utiaʼal in natsʼik tu yiknal Cristo le máaxoʼob minaʼan u muukʼoʼoboʼ. Tsʼoʼok in beetkinba jeʼex tuláakal u jejeláasil máakoʼobeʼ, utiaʼal beyoʼ ka in beet tuláakal le ku páajtal utiaʼal in salvartik wa jaytúuliʼ.
23 Chéen baʼaleʼ tuláakal le baʼaloʼobaʼ kin beetik tu yoʼolal le maʼalob baʼaloʼob ku taal u kʼiinoʼ, yéetel utiaʼal ka páajchajak in tsikbaltik tiʼ uláakʼ máakoʼob le utsiloʼob ken u taasoʼ.+
24 ¿Maʼ wa a wojleʼexeʼ le máaxoʼob ku yáalkaboʼob tiʼ junpʼéel carreraeʼ tuláakloʼob ku yáalkaboʼob, pero chéen juntúul kʼamik le premiooʼ? Áalkabneneʼex yéetel u tuukulil a ganareʼex.+
25 Tsʼoʼoleʼ tuláakal máak* ku táakpajal tiʼ junpʼéel carreraeʼ u yojel u controlartuba tiʼ tuláakal baʼal. U jaajileʼ, letiʼobeʼ ku beetkoʼob utiaʼal u kʼamkoʼob junpʼéel corona ku kʼastal,+ chéen baʼaleʼ toʼoneʼ k-beetik utiaʼal k-kʼamik junpʼéel corona maʼatech u kʼastal.+
26 Le oʼolaleʼ le bix táan in wáalkaboʼ maʼ chéen minaʼan u cuentailiʼ.+ Le bix táan in looxoʼ maʼ utiaʼal in loxik le iikʼoʼ.
27 Baʼaxeʼ kin loʼoloxik in wíinklil+ yéetel kin nuʼuktik bey juntúul esclavoeʼ, utiaʼal beyoʼ maʼ u pʼáatal maʼ in kʼaʼamal tumen Dios kéen tsʼoʼokok in tsikbaltik tiʼ uláakʼ máakoʼob le jatsʼuts baʼaloʼob ken u beet Diosoʼ.
