1 Juan 3:1-24
3 ¡Ilawileʼex bukaʼaj nojchil le yaabilaj tsʼoʼok u yeʼesiktoʼon le Taataoʼ!+ Letiʼeʼ tu tsʼáajtoʼon u páajtalil u yaʼalaʼal u paalaloʼon,*+ u jaajil xaneʼ u paalaloʼon Dios. Le oʼolal le yóokʼol kaaboʼ maʼ u kʼaj óoloʼoniʼ+ tumen maʼ kʼuchuk u kʼaj óolt Diosiʼ.+
2 In yaabilaj sukuʼuneʼex, beoraaʼ u paalaloʼon Dios,+ chéen baʼaleʼ maʼ eʼesaʼaktoʼon bix le kuxtal kun tsʼaabiltoʼonoʼ,+ baʼax k-ojleʼ le kéen chíikbesaʼakeʼ yaan k-pʼáatal jeʼex letiʼeʼ, tumen yaan k-ilik jach bix letiʼ.
3 Tuláakal máax táan u páaʼtik u yilkeʼ ku limpiokíinkuba+ tumen letiʼeʼ limpio.
4 Tuláakal máax ku kʼebantaleʼ ku bin tu contra le leyoʼ, tumen le kʼebanoʼ tiʼ yaan tu contra le leyoʼ.
5 Teʼexeʼ a wojleʼex xaneʼ Jesúseʼ taal utiaʼal u luʼsik k-kʼebanoʼob,+ yéetel tiʼ letiʼeʼ minaʼan kʼeban.
6 Tuláakal máax ku pʼáatal junmúuchʼ tu yéeteleʼ maʼ tu kʼebantal.+ Le máax ku kuxtal ich kʼebaneʼ maʼ u yiliʼ yéetel mix kʼuchuk u kʼaj óoltiʼ.
7 In mejen paalaleʼex, maʼ a chaʼik a tuʼusleʼex tumen mix máak. Le máax ku beetik baʼax tojeʼ toj u kuxtal jeʼex Jesús toj u kuxtaleʼ.
8 Le máax ku kuxtal ich kʼebaneʼ tiʼ le Kʼaasilbaʼal* u taaloʼ, tumen le Kʼaasilbaʼaloʼ desde tu káajbaleʼ táan u kʼebantal.+ Le oʼolal u Paal Dioseʼ taal utiaʼal u xuʼulsik tiʼ le baʼaloʼob u beetmaj le Kʼaasilbaʼaloʼ.+
9 Tuláakal máax tsʼoʼok u síijil tiʼ Dioseʼ maʼ tu kuxtal ich kʼeban,+ tumen u semilla Dioseʼ tiʼ ku pʼáatal ichil u puksiʼikʼaleʼ, yéetel maʼ tu páajtal u kʼebantal tumen tiʼ Dios síiji.+
10 U paalal Dios yéetel u paalal le Kʼaasilbaʼaloʼ maʼ igualoʼobiʼ, tumen tuláakal máax maʼatech u beetik baʼax tojeʼ maʼ tiʼ Dios u taaliʼ, mix le máax maʼ tu yaabiltik u sukuʼunoʼ.+
11 Lelaʼ letiʼe baʼax ta wuʼuyeʼex desde tu káajbaloʼ: ka k-paklan yaabiltbaʼex,+
12 maʼ jeʼex Caíneʼ, letiʼeʼ tiʼ le Kʼaasilbaʼal* u taaloʼ yéetel tu kíimsaj u yíitsʼin.+ ¿Baʼax oʼolal túun tu kíimsaj? Tumen kʼaastak le baʼaxoʼob ku beetkoʼ,+ chéen baʼaleʼ le baʼaxoʼob ku beetik kaʼach u yíitsʼinoʼ maʼalobtak.+
13 Sukuʼuneʼex, maʼ u jaʼakʼal a wóoleʼex wa pʼektaʼaneʼex tumen le yóokʼol kaaboʼ.+
14 Toʼoneʼ k-ojleʼ kimenoʼon kaʼachi,+ chéen baʼaleʼ beoraaʼ kuxaʼanoʼon tumen k-yaabiltmaj le sukuʼunoʼoboʼ.+ Le máax minaʼan u yaabilajeʼ láayliʼ kimeneʼ.+
15 Tuláakal máax u pʼekmaj u sukuʼuneʼ juntúul j-kiimsaj máak,+ yéetel a wojleʼexeʼ mix juntúul j-kiimsaj máak jeʼel u páajtal u kʼamik kuxtal minaʼan u xuuleʼ.+
16 Toʼoneʼ tsʼoʼok k-kʼuchul kʼaj óolt le yaabilajoʼ tumen Jesucristoeʼ tu kʼubaj u kuxtal t-oʼolal,+ toʼon túuneʼ ku páaʼtaʼal xan ka k-kʼub k-kuxtal tu yoʼolal k-sukuʼunoʼob.+
17 Wa juntúul máak yaan tuláakal baʼax kʼaʼabéettiʼ utiaʼal u kuxtal ku yilik u máansik óotsilil u sukuʼun, chéen baʼaleʼ maʼ tu yóotik u chʼaʼa óotsilil tiʼeʼ, ¿bix jeʼel u páajtal u yaʼalik u yaabiltmaj Dioseʼ?+
18 In mejen paalaleʼex, maʼ chéen unaj k-aʼalik yaan k-yaabilajeʼexiʼ,+ baʼaxeʼ kʼaʼabéet k-eʼesik yéetel le baʼaxoʼob k-beetkoʼ.+ Lelaʼ kʼaʼabéet k-beetik yéetel u jaajil k-óol.+
19 Tu yoʼolal le jeʼelaʼ yaan k-ojéeltik u tiaʼaloʼon le jaajoʼ, yéetel yaan k-tsʼáaik ichil k-puksiʼikʼaleʼ* Dioseʼ jach u yaabiltmoʼon.
20 Beyoʼ kex ka u tak k-pool k-puksiʼikʼal tiʼ jeʼel baʼalakeʼ k-ojleʼ Dioseʼ maas nojoch tiʼ k-puksiʼikʼal yéetel u kʼaj óol tuláakal le baʼaloʼoboʼ.+
21 In yaabilaj sukuʼuneʼex, wa k-puksiʼikʼal maʼ tu takik k-pooleʼ maʼ ken k-sajaktal tʼaan tu táan Dios.+
22 Tsʼoʼoleʼ jeʼel baʼalak ka k-kʼáat tiʼ letiʼeʼ jeʼel u tsʼáaik tiʼ toʼoneʼ,+ tumen táan k-tsʼoʼokbesik le baʼaxoʼob ku yaʼalikoʼ yéetel táan k-beetik le baʼaxoʼob uts tu yichoʼ.
23 U jaajileʼ letiʼe baʼax u yaʼalmaj ka k-beetaʼ: ka k-tsʼáa k-fe tiʼ u kʼaabaʼ Jesucristo le u Paaloʼ+ yéetel ka k-paklan yaabiltbaʼex+ jeʼex tu yaʼalajtoʼon ka k-beetoʼ.
24 Tsʼoʼoleʼ le máax ku tsʼoʼokbesik le baʼax ku yaʼalikoʼ ku pʼáatal junmúuchʼ tu yéetel, letiʼeʼ ku pʼáatal xan junmúuchʼ yéetel le máakaʼ.+ Tu yoʼolal le espíritu santo tu tsʼáajtoʼonoʼ ku páajtal k-ojéeltik tiʼ yaan junmúuchʼ t-éeteleʼ.+
Notas
^ Ich griegoeʼ ku yaʼalaʼal kaʼach «u paalaloʼon Dios».
^ Ich griegoeʼ ku yaʼalaʼal kaʼach «Diablo». Ilawil «Kʼaasilbaʼal», página 2568.
^ Ich griegoeʼ ku yaʼalaʼal kaʼach «le j-Kʼasaʼanoʼ».
^ Wa «yaan k-aʼalik tiʼ k-puksiʼikʼaleʼ; yaan k-eʼesik tiʼ k-puksiʼikʼaleʼ».
