1 Juan 5:1-21
5 Tuláakal le máaxoʼob ku creerkoʼob de ke Jesúseʼ letiʼ le Cristooʼ u paalaloʼob Dios.+ Tsʼoʼoleʼ tuláakal máax u yaabiltmaj Dioseʼ u yaabiltmaj xan u paalaloʼob Dios.
2 Lelaʼ letiʼe baʼax eʼesik k-yaabiltmaj u paalaloʼob Diosaʼ:+ k-yaabiltik Dios yéetel k-beetik le baʼaxoʼob ku yaʼalikoʼ.
3 Tumen le máax u yaabiltmaj Dioseʼ ku beetik le baʼaxoʼob ku yaʼalik* Diosoʼ,+ tsʼoʼoleʼ le baʼaxoʼob ku yaʼalikoʼ maʼ talam u beetaʼaloʼobiʼ,+
4 tumen le máaxoʼob u paalaloʼob Diosoʼ ku tsʼáanchaʼatikoʼob le yóokʼol kaaboʼ.+ Toʼoneʼ tu yoʼolal le fe yaantoʼonoʼ tsʼoʼok k-tsʼáanchaʼatik le yóokʼol kaaboʼ.+
5 ¿Máax jeʼel u páajtal u tsʼáanchaʼatik yóokʼol kaabeʼ?+ ¿Maʼ wa letiʼe máax u tsʼaamaj u fe de ke Jesúseʼ u Paal Dios?+
6 Jesucristoeʼ letiʼe máax taal yéetel jaʼ bey xan yéetel kʼiʼikʼoʼ. Letiʼeʼ maʼ chéen yéetel jaʼ taaliʼ,+ baʼaxeʼ tak yéetel kʼiʼikʼ.+ Le espíritu santooʼ ku yeʼesik jach jaaj leloʼ,+ tumen le espíritu santooʼ maʼatech u tuus.*
7 Tumen yaan óoxpʼéel baʼaloʼob eʼesik jach jaaj le baʼax ku yaʼalaʼaloʼ:
8 le espíritu santooʼ,+ le jaʼoʼ+ yéetel le kʼiʼikʼoʼ.+ Le óoxpʼéel baʼaloʼobaʼ tiʼ junpʼéeliliʼ baʼax ku tʼaanoʼob.
9 Wa k-creertik le baʼax ku yaʼalaʼal tumen le máakoʼoboʼ maas unaj k-creertik le baʼax ku yaʼalik Diosoʼ. Tumen letiʼeʼ yaan baʼax ku yaʼaliktoʼon yoʼolal u Paal.
10 Le máax ku tsʼáaik u fe tiʼ u Paal Dioseʼ ku yeʼesik tiaʼan ichil u puksiʼikʼal le baʼax tsʼoʼok u kaʼansaʼaltiʼ tumen Diosoʼ. Le máax maʼ u tsʼaamaj u fe tiʼ Dioseʼ ku tsʼáaik naʼatbileʼ Dioseʼ táan u tuus,+ tumen maʼ u tsʼaamaj u fe tiʼ le baʼax ku yaʼalik Dios yoʼolal u Paaloʼ.
11 Lelaʼ letiʼe baʼax ku yaʼaliktoʼonaʼ: Dioseʼ tu tsʼáajtoʼon kuxtal minaʼan u xuul+ yéetel le kuxtalaʼ ku taal tiʼ u Paal.+
12 Le máax junmúuchʼ yanil yéetel le Paaloʼ yaan le kuxtal tiʼaʼ, le máax maʼ junmúuchʼ yanil yéetel u Paal Dioseʼ minaʼan le kuxtal tiʼaʼ.+
13 Tiʼ teʼex ka tsʼáaik a fejeʼex tiʼ u kʼaabaʼ u Paal Dioseʼ+ kin tsʼíibtikteʼex lelaʼ utiaʼal ka a wojéelteʼex yaanteʼex kuxtal minaʼan u xuul.+
14 Toʼoneʼ k-ojleʼ jeʼel baʼalak ka k-kʼáat tiʼ Dioseʼ,+ wa maʼ tu bin tu contra u voluntadeʼ, letiʼeʼ yaan u yuʼubik.+
15 Tsʼoʼoleʼ wa k-ojel ku yuʼubik tuláakal baʼax k-kʼáatiktiʼeʼ k-ojel yaan u tsʼáaiktoʼon tuláakal le baʼax tsʼoʼok k-kʼáatikoʼ, tumen tiʼ letiʼ tsʼoʼok k-kʼáatik.+
16 Wa yaan máax ku yilik táan u kʼebantal u sukuʼun, chéen baʼaleʼ le kʼebanaʼ maʼ tu bisik tiʼ kíimileʼ, unaj u orar tiʼ Dios yoʼolal u sukuʼun, Dios túuneʼ yaan u tsʼáaik kuxtal tiʼ u sukuʼunoʼ.+ Jach beyoʼ Dioseʼ jeʼel u tsʼáaik kuxtal tiʼ máaxoʼob ku lúubloʼob tiʼ junpʼéel kʼeban maʼ tu bisik máak tiʼ kíimileʼ.+ Chéen baʼaleʼ yaan junpʼéel kʼeban ku bisik máak tiʼ kíimil, tu yoʼolal le kʼeban jeʼelaʼ maʼ tin waʼalik tiʼ mix máak ka orarnak.
17 Tuláakal baʼax maʼ maʼalobeʼ junpʼéel kʼeban,+ chéen baʼaleʼ yaan junpʼéel kʼeban maʼ tu bisik máak tiʼ kíimil.
18 K-ojleʼ u paalaloʼob Dioseʼ maʼ tu kuxtaloʼob ich kʼeban, baʼaxeʼ ku kanáantaʼaloʼob tumen le máax taal tiʼ Diosoʼ* yéetel maʼ tu páajtal u beetaʼaltiʼob mix baʼal* tumen le Kʼaasilbaʼaloʼ.*+
19 Toʼoneʼ k-ojel tiaʼanoʼon yáanal u páajtalil Dioseʼ, chéen baʼaleʼ u túulisil yóokʼol kaabeʼ tiaʼan yáanal u páajtalil le Kʼaasilbaʼaloʼ.*+
20 Toʼoneʼ k-ojel taaljaʼan u Paal Dios+ yéetel u tsʼaamajtoʼon naʼat utiaʼal ka k-kʼaj óolt le u jaajil Diosoʼ. Toʼoneʼ junmúuchʼ yaniloʼon tu yéetel,+ lelaʼ ku béeytal tu yoʼolal Jesucristo, u Paal. Jach beyoʼ u Taataeʼ letiʼ u jaajil Dios yéetel letiʼ tsʼáaik kuxtal minaʼan u xuul.+
21 In mejen paalaleʼex, náachkuntabaʼex tiʼ le imagenoʼoboʼ.+
Notas
^ Wa «ku tsʼoʼokbesik u mandamientoʼob».
^ Ich griegoeʼ ku yaʼalaʼal kaʼach «letiʼ u jaajil».
^ Ich griegoeʼ ku yaʼalaʼal kaʼach «le j-Kʼasaʼanoʼ».
^ Wa «maʼ tu páajtal u maʼachloʼob».
^ Teʼelaʼ táan u yúuchul tʼaan tiʼ Jesucristo, u Paal Dios.
^ Ich griegoeʼ ku yaʼalaʼal kaʼach «le j-Kʼasaʼanoʼ».
