1 Pedro 1:1-25
1 Teneʼ Pedroen, u apóstolen+ Jesucristo, táan in tsʼíib tiʼ le máaxoʼob kʼiʼitpajaʼanoʼob yéetel kajaʼanoʼob bey uʼulaboʼob tu luʼumil Ponto, Galacia, Capadocia,+ Asia yéetel Bitiniaoʼ. Táan in tsʼíib tiʼ le máaxoʼob yéeyaʼanoʼob
2 tumen Dios, le Taataoʼ.+ Letiʼeʼ desde úuchjeakil tu chʼaʼtuklaj u yéeyikoʼob. Le jeʼeloʼobaʼ junpáaykuntaʼanoʼob yéetel espíritu santo*+ utiaʼal ka u yuʼuboʼob tʼaan bey xan utiaʼal u pʼoʼobloʼob* yéetel u kʼiʼikʼel Jesucristo,+ teneʼ kin tsʼíibtiktiʼob:
Ka maas eʼesaʼakteʼex nojoch utsil tumen Dios bey xan ka maas yanakteʼex jeetsʼelil.
3 Alabartaʼak u Dios yéetel u Taata k-Yuumtsil Jesucristo, tumen tu yoʼolal u nojoch chʼaʼ óotsilaleʼ tu beetaj k-kaʼa síijil,+ yoʼolal leloʼ le baʼax táan k-páaʼtikoʼ+ k-ojel jach yaan u béeytal, tumen tu kaʼa kuxkíintaj Jesucristo ichil le kimenoʼoboʼ.+
4 Bey túunoʼ Dioseʼ yaan u tsʼáaikteʼex junpʼéel herencia maʼ tu kʼastal,+ minaʼan mix baʼal kʼaas tiʼ yéetel mix máak jeʼel u páajtal u xuʼulsiktiʼeʼ. Le herenciaaʼ a tiaʼaleʼex, tiʼ líiʼsaʼan teʼ kaʼanoʼ.+
5 Teʼexeʼ táan a kanáantaʼaleʼex yéetel u páajtalil Dios tu yoʼolal le fe ku tsʼáaik salvaciónoʼ. Le salvaciónaʼ yaan u maas tsʼaʼabal ojéeltbil teʼ tu tsʼook kʼiinoʼoboʼ.
6 Le oʼolaleʼ teʼexeʼ jach kiʼimak a wóoleʼex, kex maʼ xaaneʼ tsʼoʼok a muʼyajeʼex* u chan súutuk tu yoʼolal jejeláas baʼaloʼob.+
7 Le baʼaloʼobaʼ ku yúuchul utiaʼal u probartaʼal a fejeʼex+ yéetel utiaʼal ka ilaʼak maas koʼoj u tojol ke le oro ku kʼastal kex tsʼoʼok u máansaʼal tiʼ kʼáakʼoʼ. Yoʼolal le fe beyaʼ teʼexeʼ yaan a alabartaʼaleʼex yéetel yaan a respetartaʼaleʼex tu kʼiinil u chíikbesaʼal Jesucristo.+
8 Kex mix juntéen ta wileʼex Jesucristoeʼ a yaabiltmeʼex. Kex beora maʼ táan a wilkeʼexaʼ a tsʼaamaj a fejeʼex tiʼ letiʼ yéetel jach táaj kiʼimak a wóoleʼex jeʼex mix juntéen kiʼimakchajak a wóoleʼexeʼ.
9 Teʼexeʼ yaan a salvartaʼaleʼex yoʼolal le fe yaanteʼexoʼ,+ leloʼ yaan u beetik u jach kiʼimaktal a wóoleʼex.
10 Le profetaʼob tʼaanajoʼob úuchjeakil tiʼ le nojoch utsil kun eʼesbilteʼexaʼ tu jach tsʼáaj u yóoloʼob u xakʼaltoʼob le tsʼíiboʼob utiaʼal u naʼatkoʼob bix kun antal le salvaciónaʼ.+
11 Tiʼ Dioseʼ meyajnaj u espíritu santo utiaʼal u tsʼáaik u yojéeltoʼob de ke Cristoeʼ+ yaan u muʼyaj, chéen baʼaleʼ le kéen tsʼoʼokkeʼ yaan u tsʼaʼabaltiʼ junpʼéel puesto maas maʼalob. Le oʼolal le profetaʼoboʼ seguernaj u xakʼaltikoʼob jach baʼax kun úuchul tiʼ Cristo+ yéetel jach baʼax kʼiin ken úuchuk.
12 Tiʼ letiʼobeʼ tsʼaʼab u yojéeltoʼob maʼ táan u meyajoʼob utiaʼal u yutsiloʼobiʼ, baʼaxeʼ utiaʼal a wutsileʼex. Le profetaʼoboʼ letiʼob tsʼíibt le maʼalob baʼaloʼob tsʼaʼab a wojéelteʼex tumen le máaxoʼob kʼam le espíritu santo ku taal teʼ kaʼanoʼ.+ Le ángeloʼob xanoʼ jach taak u yojéeltikoʼob bix u bin u béeytal le baʼaloʼobaʼ.
13 Le oʼolaleʼ preparartabaʼex* utiaʼal meyaj,+ ilawileʼex maʼ u náayal a wóoleʼex mix junsúutuk,+ maʼ u xuʼulul a páaʼtkeʼex u yeʼesaʼalteʼex u nojoch utsil Dios le kéen chíikbesaʼak Jesucristooʼ.
14 Beoraaʼ teʼexeʼ u paalaleʼex Dios yéetel ka wuʼuyikeʼex u tʼaan. Le oʼolaleʼ maʼ unaj a chaʼikeʼex a controlartaʼaleʼex tumen le tsʼíibolaloʼob yaanteʼex kaʼach táanil tiʼ a kʼaj óoltikeʼex Diosoʼ.
15 Baʼax kʼaʼabéet a beetkeʼexeʼ a pʼáatleʼex santoil tiʼ tuláakal baʼal, tumen le Máax tʼaneʼexoʼ santo,+
16 tsʼoʼoleʼ tsʼíibtaʼan: «Teʼexeʼ unaj a pʼáatleʼex santoil, tumen teneʼ santoen».+
17 Tsʼoʼoleʼ wa ka chʼaʼchiʼitkeʼex u kʼaabaʼ le Taataoʼ kuxleneʼex yéetel saajkilil+ mientras kajaʼaneʼex junpʼíit tiempo way yóokʼol kaabeʼ. Le Taataoʼ mix máak jelaʼan u paktik,+ yéetel ku juzgartik cada máak tu yoʼolal le baʼaxoʼob u beetmoʼ.
18 Teʼexeʼ a wojleʼexeʼ le ka jáalkʼabtaʼabeʼex tiʼ le kuxtal minaʼan u biilal kaʼansaʼabteʼex tumen a úuchben láakʼtsileʼexoʼ maʼ jáalkʼabtaʼabeʼex yéetel baʼaloʼob ku kʼastaloʼob jeʼex plata wa oroiʼ,+
19 baʼaxeʼ yéetel kiʼichkelem kʼiʼikʼ.+ Le kʼiʼikʼaʼ bey jeʼex u kʼiʼikʼel juntúul maʼalob taman minaʼan mix baʼal kʼaas tiʼeʼ,+ lelaʼ u kʼiʼikʼel Cristo.+
20 U jaajileʼ letiʼeʼ yéeyaʼab desde tu káajbal yóokʼol kaab,*+ chéen baʼaleʼ chíikbesaʼab utiaʼal a wutsileʼex tu xuul le kʼiinoʼoboʼ.+
21 Tu yoʼolal letiʼeʼ ka creerkeʼex Dios,+ le máax líiʼs ichil le kimenoʼob+ yéetel tu tsʼáaj junpʼéel puesto maas maʼalob tiʼoʼ.+ Le baʼaloʼobaʼ úuchoʼob utiaʼal ka a tsʼáa a fejeʼex yéetel a esperanzaʼex tiʼ Dios.
22 Beoraaʼ teʼexeʼ tsʼoʼok u limpiotal a kuxtaleʼex ikil a tsʼoʼokbeskeʼex le u jaajil kaʼansaʼabteʼexoʼ. Le oʼolal ku páajtal a weʼeskeʼex junpʼéel yaabilaj jeʼex le ku yantal ichil sukuʼuntsiloʼoboʼ.+ Bey túunoʼ jach yaabiltabaʼex ta baatsileʼex, maʼ yéetel kaʼapʼéel ichiliʼ, baʼaxeʼ yéetel u jaajil u yóol a puksiʼikʼaleʼex.+
23 Tumen tsʼoʼok u beetaʼal a kaʼa síijleʼex,+ maʼ tiʼ junpʼéel semilla ku kʼastaliʼ, baʼaxeʼ tiʼ junpʼéel semilla maʼatech u kʼastal.*+ Lelaʼ úuch tu yoʼolal le baʼax u yaʼalmaj le kuxaʼan Dios minaʼan xuʼulul tiʼoʼ.+
24 Tumen «tuláakal wíinikeʼ bey jeʼex xíiweʼ, u jatsʼutsil xaneʼ bey jeʼex le looloʼob ku jóokʼol teʼ kʼáaxoʼ. Le kéen tijik le xíiwoʼ ku lúubul u lool.
25 Chéen baʼaleʼ u tʼaan Jéeobaeʼ* ku pʼáatal utiaʼal mantatsʼ».+ Le «tʼaan» jeʼelaʼ letiʼe maʼalob baʼaloʼob u yaʼalmaj u beetik Diosoʼ.+
Notas
^ Ilawil «Espíritu santo», página 2562.
^ Ich griegoeʼ ku yaʼalaʼal kaʼach «u wiʼiwitsʼaʼaloʼob».
^ Wa «a sufrireʼex».
^ Wa «muʼukʼaʼankúunt a tuukuleʼex».
^ Teʼelaʼ táan u yúuchul tʼaan tiʼ le kʼiinoʼob ka káaj u yantal u paalal Adán yéetel Evaoʼ.
^ Lelaʼ junpʼéel semilla ku jóokʼol yéetel ku tsʼáaik u yich.
^ Ilawil página 2566.
