1 Pedro 2:1-25
2 Le oʼolaleʼ pʼateʼex tuláakal baʼaloʼob kʼaastak,+ tuusil, kaʼapʼéel ichil, líiʼsaj tʼaan yéetel maʼ a tsʼíiboltkeʼex baʼax u tiaʼal u maasil.
2 Jeʼel bix mejen paalal táant u síijloʼobeʼ+ ilawileʼex u taaktal a wukʼikeʼex le maʼalob leche* ku taal tiʼ u tʼaan Diosoʼ, utiaʼal beyoʼ ka nojochchajkeʼex yéetel ka yanakteʼex salvación.+
3 Tumen teʼexeʼ tsʼoʼok a wilkeʼexeʼ* Yuumtsileʼ jach uts.
4 Le máakoʼoboʼ maʼ tu yóotoʼob u chʼaʼob+ le tuunich kuxaʼanoʼ, chéen baʼaleʼ Dioseʼ tsʼoʼok u yéeyik, yéetel kiʼichkelem tu táan.+ Le kéen a natsʼabaʼex tu yiknaleʼ
5 teʼex xaneʼ beyeʼex tuunichoʼob kuxaʼanoʼob yéetel ku meyajoʼob utiaʼal u beetaʼal junpʼéel naj yéetel u yáantaj le espíritu santooʼ.+ Beyoʼ teʼexeʼ yaan u kʼuchul a beetabaʼex sacerdoteʼob santoʼob, yéetel yaan a nuʼuktaʼaleʼex tumen le espíritu santo utiaʼal ka a kʼubeʼex sacrificioʼob+ tiʼ Dios tu yoʼolal Jesucristooʼ.+
6 Tumen u Tʼaan Dioseʼ ku yaʼalik: «¡Ilawileʼex!, tu kaajil Sióneʼ yaan in tsʼáaik junpʼéel tuunich yéeyaʼan, junpʼéel u jatsʼuts tuunichil le cimiento jach maʼaloboʼ. Jeʼel máaxak ka u tsʼáa u fe tiʼ letiʼeʼ maʼ kun pʼatbil ich suʼtsilil».+
7 Le oʼolaleʼ a tiaʼaleʼexeʼ le tuunichaʼ kiʼichkelem tumen ka tsʼáaik a fejeʼex tiʼ letiʼ. Chéen baʼaleʼ tiʼ le máaxoʼob maʼ tu tsʼáaik u fejoʼob tiʼ letiʼoʼ u Tʼaan Dioseʼ ku yaʼalik: «Le tuunich maʼ tu yóotaj u chʼaʼa+ le máaxoʼob beet le najoʼ letiʼe nojoch tuunich yéeyaʼab utiaʼal u cimientoil* le najoʼ».+
8 Lelaʼ «junpʼéel u tuunichil tʼóochpajal yéetel junpʼéel nojoch tuunich ku beetik u lúubul máak».+ Letiʼobeʼ ku tʼóochpajloʼob tumen maʼatech u yuʼubikoʼob u tʼaan Dios. Leloʼ letiʼe baʼax kun úuchul tiʼ le máakoʼobaʼ.
9 Chéen baʼaleʼ teʼexeʼ «junpʼéel tribu yéeyaʼaneʼex, sacerdoteʼex yéetel reyeʼex, junpʼéel kaaj santoʼex,+ junpʼéel kaaj tiaʼalintaʼan tumen Dios,+ le oʼolal unaj a tsikbaltikeʼex tu táan u maasil u jatsʼuts modos»+ le Máax tʼaneʼex utiaʼal ka jóokʼkeʼex tiʼ le éeʼjochʼeʼeniloʼ yéetel utiaʼal ka náatsʼkeʼex tiʼ u kiʼichkelem sáasil.+
10 Teʼex kaʼacheʼ maʼ kaajeʼexiʼ, chéen baʼaleʼ beoraaʼ u kaajaleʼex Dios.+ Teʼex kaʼacheʼ mix máak chʼaʼikteʼex óotsilil, chéen baʼaleʼ beoraaʼ tsʼoʼok u chʼaʼabalteʼex óotsilil.+
11 In yaabilaj sukuʼuneʼex, teʼexeʼ j-táanxel luʼumileʼex yéetel kajaʼaneʼex bey uʼulabeʼexeʼ.+ Teneʼ kin kʼubéentikteʼex ka a náachkuntabaʼex tiʼ u tsʼíibolal le bakʼoʼ,+ tumen leloʼ ku baʼateʼel ta contraʼex.+
12 Maʼ u xuʼulul a weʼeskeʼex jatsʼuts modos ichil le kaajoʼob tuʼux kajaʼaneʼexoʼ,+ tumen beyoʼ le kéen aʼalaʼak kʼasaʼan máakeʼexeʼ le máakoʼoboʼ yaan u páajtal u yilkoʼob le baʼaloʼob maʼalobtak ka beetkeʼexoʼ.+ Letiʼob túuneʼ yaan u alabarkoʼob Dios tu kʼiinil u kʼuʼubul cuenta tiʼ letiʼ.
13 Tu yoʼolal Yuumtsileʼ tsʼáabaʼex yáanal u páajtalil tuláakal autoridad tsʼaʼan tumen wíinik.+ Tsʼáabaʼex yáanal u páajtalil juntúul rey+ tumen letiʼeʼ nojoch u autoridad,
14 tsʼáabaʼex yáanal u páajtalil le gobernadoroʼoboʼ tumen letiʼobeʼ túuxtaʼanoʼob tumen le rey utiaʼal ka u castigartoʼob le kʼasaʼan máakoʼoboʼ yéetel utiaʼal u alabarkoʼob le máaxoʼob beetik baʼax utsoʼ.+
15 Tumen yéetel le baʼaloʼob maʼalobtak ka beetkeʼexoʼ Dioseʼ u kʼáat ka a makeʼex u chiʼ le máaxoʼob minaʼan u naʼatoʼob ku tʼaanoʼob tiʼ baʼax maʼ u yojloʼoboʼ.+
16 Kuxleneʼex jeʼex máakoʼob jáalkʼabtaʼanoʼobeʼ,+ chéen baʼaleʼ maʼ u meyajteʼex le jáalkʼabil yaanteʼex utiaʼal a balikeʼex le baʼaloʼob kʼaastak ka beetkeʼexoʼ,+ baʼaxeʼ meyajnakteʼex utiaʼal a beetkabaʼex esclavoil tiʼ Dios.+
17 Respetarteʼex tuláakal u jejeláasil máakoʼob,+ yaabilteʼex tuláakal le sukuʼunoʼoboʼ,+ chʼaʼex saajkil tiʼ Dios,+ respetarteʼex le reyoʼ.+
18 Le esclavoʼoboʼ unaj u tsʼáaikubaʼob yáanal u páajtalil u tsʼuuliloʼob yéetel u chʼaʼikoʼob saajkil tiʼob jeʼex unajeʼ,+ maʼ chéen tiʼ le uts u modosoʼob yéetel uts u puksiʼikʼaloʼoboʼ, baʼaxeʼ tak tiʼ le tsʼuuloʼob maʼ chéen chʼaʼabil u kiʼimakkúuntaʼal u yóoloʼoboʼ.
19 Tumen wa ikil u kaxtik máak ka yanak junpʼéel maʼalob conciencia tiʼ tu táan Dios,+ ku muʼyaj kex mix baʼal kʼaas u beetmaj yéetel ku chúukpajal u yóol u muʼyajt baʼax ku yúuchultiʼeʼ jach maʼalob baʼax ku beetik.
20 Tumen ¿baʼax utsil ku taasik u chúukpajal a wóol a muʼyajteʼex a loʼoloxaʼaleʼex wa kʼaas le baʼax ka beetkeʼexoʼ?+ Chéen baʼaleʼ wa ku chúukpajal a wóoleʼex muʼyaj ikil a beetkeʼex baʼax maʼalobeʼ leloʼ jach ku beetik u kiʼimaktal u yóol Dios.+
21 U jaajileʼ teʼexeʼ tʼaʼaneʼex utiaʼal le jeʼeloʼ, tumen tak Cristoeʼ muʼyajnaj ta woʼolaleʼex,+ yéetel tu yeʼesajteʼex bix jeʼel a xíimbaleʼex jach jeʼex úuchik u beetkoʼ.+
22 Letiʼeʼ maʼ kʼebanchajiʼ+ yéetel mix junpʼéel tuus jóokʼ tu chiʼ.+
23 Le táan u poʼopochʼaʼaloʼ*+ maʼ tu núukaj yéetel poochʼiloʼobiʼ.*+ Le táan u muʼyajoʼ+ maʼ tu amenazartaj mix máakiʼ, baʼaxeʼ tu kʼubéentuba tiʼ le Máax toj u juzgar+ utiaʼal ka kanáantaʼakoʼ.
24 Le ka baʼaj u wíinklil teʼ cheʼoʼ+ letiʼeʼ tu kuchaj k-kʼebanoʼob,+ beyoʼ tu tokoʼon tiʼ le kʼebanoʼ yéetel tu yáantoʼon k-bis junpʼéel toj kuxtal. Tsʼoʼoleʼ «tu yoʼolal le loob beetaʼab tu wíinkliloʼ tsʼaʼakeʼex».+
25 Tumen teʼex kaʼacheʼ beyeʼex tamanoʼob saatloʼobeʼ,+ chéen baʼaleʼ beoraaʼ tsʼoʼok a suuteʼex tu yiknal le j-kanan tamanoʼ,+ le máax kanáantik a kuxtaleʼexoʼ.
Notas
^ Wa «le leche maʼ xaʼakʼtaʼan».
^ Wa «a túuntkeʼexeʼ».
^ Wa «u chuunpakʼil».
^ Wa «u yaʼalaʼal baʼal tiʼoʼ».
^ Wa «maʼ tu yaʼalaj baʼal xaniʼ».
