1 Pedro 4:1-19
4 Cristoeʼ muʼyajnaj le ka kuxlaj bey wíinikeʼ,+ teʼex xaneʼ le kéen muʼyajnakeʼexeʼ tuukulneneʼex jeʼex úuchik u tuukul letiʼoʼ. Tumen máax ku muʼyajeʼ tsʼoʼok u náachtal tiʼ le kʼebanoʼ,+
2 bey túunoʼ mientras kuxaʼaneʼ yaan u beetik baʼax u kʼáat Dios,+ maʼ ken u beet baʼax ku tsʼíiboltik wíinik.+
3 Teʼexeʼ xáanchaj táan kaʼach a beetkeʼex le baʼax u kʼáat u máakiloʼob le yóokʼol kaabaʼ.+ Teʼ kʼiinoʼob jeʼeloʼ kuxlajeʼex ich x-maʼ suʼtalil, maʼatech a controlartik a tsʼíibolaleʼex, ku píitmáan a wukʼikeʼex vino, ka máaneʼex tiʼ fiestaʼob tuʼux mix baʼal ku tsʼaʼabal u pʼiis, ka muchʼtaleʼex káaltal yéetel ka adorarkeʼex imagenoʼob kex ku bin tu contra le leyoʼ.+
4 Bejlaʼeʼ u máakiloʼob le yóokʼol kaabaʼ ku jaʼakʼal u yóoloʼob tumen ku yilkoʼob maʼ ta bineʼex tu paachoʼob teʼ kʼaakʼas bej ku biskoʼoboʼ, le oʼolal ku tʼaanoʼob kʼaas ta woʼolaleʼex.+
5 Chéen baʼaleʼ le máakoʼobaʼ yaan u kʼubkoʼob cuenta tiʼ le máax tsʼaʼan utiaʼal ka u juzgart le kuxaʼanoʼoboʼ bey xan le kimenoʼoboʼ.+
6 Le oʼolaleʼ tsikbaltaʼab u tʼaan Dios* tiʼ le máaxoʼob kimenoʼoboʼ,*+ utiaʼal beyoʼ kex ka juzgartaʼakoʼob jeʼex u beetik wíinikeʼ ka páajchajak u kuxtaloʼob tu táan Dios jeʼex u nuʼuktaʼaltiʼob tumen le espíritu santooʼ.
7 U jaajileʼ tsʼoʼok u náatsʼal u xuul tuláakal baʼal, le beetkeʼ ilawil a tuukuleʼex tubeel+ yéetel maʼ u xuʼulul a orareʼex yéetel u jaajil a wóoleʼex.+
8 Junpʼéel baʼal jach unaj a beetkeʼexeʼ a jach yaabiltikabaʼex ta baatsileʼex,+ tumen le máax yaan u yaabilajoʼ mantatsʼ ku perdonartik u maasil.+
9 Kʼamabaʼex yéetel utsil, maʼ a tutukchiʼex kéen a beeteʼex.+
10 Cada juntúul tiʼ teʼexeʼ u yáant u yéet máakil yéetel le bukaʼaj baʼaloʼob síiʼantiʼoʼ. Beyoʼ yaan a weʼeskeʼex jach maʼalob bix u meyajteʼex le nojoch utsil u kʼubéentmajteʼex Diosoʼ. Letiʼeʼ jejeláas bix u yeʼesik u yutsil.+
11 Wa yaan máax jach u yojel tʼaaneʼ tʼaanak tiʼ le baʼaloʼob u yaʼalmaj Diosoʼ. Wa yaan máax ku meyajtik u maasileʼ u beet yéetel le bukaʼaj muukʼ ku tsʼáaik Diosoʼ,+ beyoʼ yaan u alabartaʼal Dios+ tiʼ tuláakal baʼal tu yoʼolal Jesucristo. Dioseʼ u yuumil le muukʼ yéetel le páajtalil minaʼan u xuuloʼ. Ka béeyak.*
12 In yaabilaj sukuʼuneʼex, maʼ u péek a wóoleʼex yoʼolal le yaayaj baʼaloʼob táan a muʼyajtikeʼexoʼ,+ mix a tuklikeʼex wa jelaʼan le baʼax ku yúuchulteʼexoʼ.
13 Baʼax unaj a beetkeʼexeʼ u kiʼimaktal a wóoleʼex mantatsʼ+ ikil a muʼyajeʼex jeʼex muʼyajnajik Cristoeʼ,+ bey túunoʼ tu kʼiinil le kéen chíikbesaʼak yéetel nojoch podereʼ ka jach chuʼupuk xan a puksiʼikʼaleʼex yéetel yaʼab kiʼimak óolal.+
14 Wa táan u beetaʼalteʼex loob* tu yoʼolal u kʼaabaʼ Cristoeʼ kiʼimakchajak a wóoleʼex,+ tumen le u kiʼichkelem espíritu santo Diosoʼ tiaʼan ta wóokʼoleʼexeʼ.
15 Chéen baʼaleʼ mix juntúul tiʼ teʼex ka muʼyajnak tumen j-kiimsaj máak, j-ookol, kʼasaʼan máak, wa tumen ku yoksikuba tiʼ baʼax maʼ unajiʼ.+
16 Pero wa yaan máax ku muʼyaj tumen táan u tsaypachtik Cristoeʼ maʼ u suʼlaktal,+ baʼaxeʼ seguernak u alabartik Dios tu kʼaabaʼ Cristo.
17 Tsʼoʼok u kʼuchul u kʼiinil u káajal le juicio tu yotoch Diosoʼ.+ Wa tak toʼon yaan k-juzgartaʼaleʼ,+ ¿bix túun kun bin tiʼ le máaxoʼob maʼ tu beetkoʼob u cuentail le baʼaloʼob maʼalobtak ku yaʼalik Dios le kéen juzgartaʼakoʼoboʼ?+
18 «Wa tak le utsul máak istikyaj u salvarkubaoʼ, ¿tuʼux túun kun tsʼoʼokol le máax ku kʼebantaloʼ?».+
19 Bey túunoʼ le máaxoʼob táan u muʼyajoʼob tumen táan u beetkoʼob baʼax u kʼáat Diosoʼ maʼ u xuʼulul u kʼubéentik u kuxtaloʼob tiʼ le Máax beet tuláakal baʼaloʼ, le máax chúukaʼan u yóoloʼ, tumen u beetkoʼob beyaʼ jach maʼalob.+
Notas
^ Wa «le maʼalob péektsil».
^ Teʼelaʼ táan u yúuchul tʼaan tiʼ máaxoʼob bey kimenoʼob tu táan Dioseʼ.
^ Wa «Amén».
^ Wa «táan a poʼochʼoleʼex».
