1 Samuel 11:1-15
11 Teʼ kʼiinoʼob jeʼeloʼ Naas u rey le ammonitaʼoboʼ+ tu muchʼaj u soldadoʼobeʼ ka taal baʼateʼel tu contra u kaajil Jabés,+ tu luʼumil Galaad. Tuláakal le máakoʼob kajaʼanoʼob Jabésoʼ tu yaʼaloʼob tiʼ Naas: «Chʼaʼ junpʼéel acuerdo t-éetel, beyoʼ jeʼel k-meyajtikecheʼ».
2 Naas le ammonitaoʼ tu núukajtiʼob: «Jeʼel in chʼaʼik junpʼéel acuerdo ta wéeteleʼexeʼ, chéen baʼaleʼ tuláakleʼexeʼ yaan u jóoʼsaʼal a x-noʼoj icheʼex. Lelaʼ yaan in beetik utiaʼal in mixbaʼalkúuntik tuláakal u kaajil Israel».
3 U nuuktakil u kaajil Jabéseʼ tu núukoʼobtiʼ: «Tsʼáatoʼon siete días utiaʼal k-túuxtik jujuntúul máakoʼob tu luʼumil Israel utiaʼal u yaʼalikoʼob lelaʼ. Wa maʼ yanchaj máax salvarkoʼoneʼ yaan k-kʼubikba ta kʼab».
4 Le ka máan tiempoeʼ le máaxoʼob túuxtaʼaboʼoboʼ kʼuchoʼob tak tu kaajil Guibea,+ le tuʼux kajaʼan kaʼach Saúloʼ, ka tu yaʼaloʼob tu táan le kaaj le baʼax túuxtaʼan u yaʼaloʼoboʼ, tuláakal túun le kaajoʼ joʼopʼ u jach kʼaʼam okʼol.
5 Saúleʼ táan kaʼach u suut teʼ kʼáaxoʼ, táan u taal tu paach le wakaxoʼoboʼ, letiʼ túuneʼ tu kʼáataj: «¿Baʼax ku yúuchul tiʼ le kaajoʼ? ¿Baʼaxten táan u yóokʼoloʼob?». Ka túun tsikbaltaʼabtiʼ le baʼax tu yaʼalaj le máakoʼob taaloʼob desde Jabésoʼ.
6 U poder Dios túuneʼ taal tu yóokʼol Saúl+ le ka tu yuʼubaj le tʼaanoʼobaʼ, ka sen pʼuʼuji.
7 Tu chʼaʼaj túun kaʼatúul toroʼobeʼ ka tu xoʼoxotʼoʼob, ka tu tsʼáaj tiʼ le máaxoʼob taas le mensaje utiaʼal ka u bisoʼob tiʼ tuláakal u territorioil Israeloʼ. Le máakoʼob túunaʼ joʼopʼ u bin u yaʼalikoʼob: «¡Jeʼel máaxak maʼ tu apoyartik Saúl yéetel Samueleʼ, yaan u beetaʼal tiʼ u yalakʼ wakax jeʼex beetaʼabik tiʼ le wakaxoʼobaʼ!». Jéeoba túuneʼ tu beetaj u sajaktal le kaajoʼ yéetel tu beetaj u yeʼeskoʼob respeto, yoʼolal leloʼ tuláakloʼob múul meyajnajoʼob.
8 Saúl túuneʼ tu xokaj jaytúuloʼob teʼ lugar ku kʼaabaʼtik Bézekoʼ, tuláakal le israelitaʼoboʼ tu chukaj 300,000 yéetel le xiiboʼob ku taaloʼob Judáoʼ 30,000 u túulaloʼob.
9 Letiʼob túuneʼ tu yaʼaloʼob tiʼ le máaxoʼob taas le mensajeoʼ: «Lelaʼ letiʼe baʼax unaj a waʼalik tiʼ le máakoʼob kajaʼanoʼob tu kaajil Jabés, tu luʼumil Galaadoʼ: ‹Sáamal, le kéen chokochajak le kʼiinoʼ, teʼexeʼ yaan a salvartaʼaleʼex›». Le máakoʼob túun taas le mensajeoʼ bin u yaʼaloʼob tiʼ le máaxoʼob kajaʼanoʼob Jabés le baʼax aʼalaʼabtiʼoboʼ, u kajnáaliloʼob túun Jabéseʼ jach kiʼimakchaj u yóoloʼob.
10 Le máaxoʼob kajaʼanoʼob Jabés túunoʼ tu yaʼaloʼob: «Sáamaleʼ yaan k-kʼubikba ta kʼabeʼex, yéetel jeʼel u páajtal a beetkeʼex t-éetel le baʼax maʼalob a wilkeʼexoʼ».+
11 Tuláakʼ kʼiineʼ, Saúleʼ tu jóoʼsaj óoxjaats tiʼ le kaajoʼ. Letiʼobeʼ páajchaj u yookloʼob chúumuk teʼ tuʼux jelekbal le ammonitaʼob+ le maʼ sáasakoʼ,* ka tu xuʼulsoʼobtiʼob tak ka chokochaj le kʼiinoʼ. Le máaxoʼob maʼ kíimsaʼaboʼoboʼ kʼiʼitpajoʼob, mix máak pʼáat junmúuchʼ yéetel uláakʼ.
12 Le kaaj túunoʼ tu yaʼalaj tiʼ Samuel: «¿Máax táan kaʼach u yaʼalik: ‹¿Saúl wa ken u beet u reyil t-óokʼol?›?+ Taaseʼex le máakoʼob jeʼeloʼ ka k-kíimsoʼob».
13 Chéen baʼaleʼ Saúleʼ tu yaʼalaj: «Mix máak unaj u kíimsaʼal teʼ kʼiinaʼ,+ tumen bejlaʼeʼ Jéeobaeʼ tsʼoʼok u salvartik Israel».
14 Le ka tsʼoʼokeʼ Samueleʼ tu yaʼalaj tiʼ le kaajoʼ: «Koʼoteneʼex ka xiʼikoʼon Guilgal+ utiaʼal ka aʼalaʼak tu kaʼatéen de ke Saúleʼ letiʼ le reyoʼ».+
15 Tuláakal le kaaj túunoʼ bin Guilgal, teʼeloʼ beetaʼab reyil Saúl tu táan Jéeoba. Tu kʼuboʼob xan u ofrendailoʼob múul janal tu táan Jéeoba.+ Saúl yéetel tuláakal u kaajil Israel túuneʼ jach kiʼimakchaj u yóoloʼob.+
Notas
^ Lelaʼ kex entre láas 2:00 tak láas 6:00 de la mañana.
