1 Samuel 21:1-15
21 Le ka tsʼoʼokeʼ Davideʼ bin tak tu kaajil Nob+ tu yiknal Aimélek le sacerdoteoʼ. Aimélekeʼ le ka tu yilaj Davideʼ joʼopʼ u kikilankileʼ ka tu yaʼalajtiʼ: «¿Baʼaxten chéen ta juunal yanech yéetel mix máak taal ta wéetel?».+
2 Davideʼ tu núukaj tiʼ Aimélek, le sacerdoteoʼ: «Le reyoʼ tu kʼubéentajten ka in beet junpʼéel baʼal, chéen baʼaleʼ tu yaʼalajten: ‹Mix máak unaj u yojéeltik le baʼax tin túuxtech a beetoʼ mix le bix tin tsoliltech ka a beetoʼ›. Tsʼoʼok in waʼalik tiʼ le máakoʼob láakʼintiken tuʼux ken k-ilbaoʼ.
3 Wa yaantech cinco u pʼéelal waajeʼ tsʼáaten wa tsʼáaten jeʼel baʼaxak yaan utiaʼal jaantbileʼ».
4 Chéen baʼaleʼ le sacerdoteoʼ tu núukajtiʼ: «Le waaj yanoʼ maʼ chéen jeʼel baʼalak waajileʼ, waaj santo,+ letiʼobeʼ jeʼel u páajtal u jaantikoʼob wa maʼ náatsʼkoʼob tiʼ koʼoleloʼobiʼ».*+
5 Davideʼ tu núukaj tiʼ le sacerdoteoʼ: «Jach tu jaajileʼ toʼoneʼ maʼ náatsʼkoʼon tiʼ mix juntúul koʼoleliʼ, bey suuk in beetik le kéen jóokʼken baʼateloʼ.+ ¡Wa le kéen jóokʼkoʼob u beetoʼob le baʼax ku kʼubéentaʼaltiʼob u suukil limpio yaniloʼobeʼ, teʼ meyaj especialaʼ maas ku yilik u pʼáatloʼob limpioʼob!».
6 Le sacerdote túunoʼ tu tsʼáaj le waaj santo+ tiʼoʼ, tumen teʼeloʼ minaʼan uláakʼ clase waajiʼ chéen le waaj ku tsʼaʼabal yóoʼ mesaoʼ, le waajaʼ letiʼe luʼsaʼab tu táan Jéeoba utiaʼal u tsʼaʼabal uláakʼ waaj túumben beetaʼaniloʼ.
7 Teʼ kʼiin jeʼeloʼ juntúul tiʼ le máaxoʼob meyajtik Saúloʼ tiaʼan tu kaajil Nob tu táan Jéeobaeʼ. U kʼaabaʼ le máakaʼ Doeg,+ le edomitaoʼ,+ letiʼeʼ u nojchil le máaxoʼob kanáantik u yalakʼ tamanoʼob Saúloʼ.
8 David túuneʼ tu yaʼalaj tiʼ Aimélek: «¿Yaan wa teʼex junpʼéel lanza wa junpʼéel espada wayeʼ? Es ke maʼ tin chʼaʼaj in espadaiʼ mix in armaʼobiʼ, tumen le reyoʼ tu yaʼalaj ka k-beet tu séebaʼanil le baʼax tu kʼubéentajtoʼonoʼ».
9 Le sacerdoteoʼ tu yaʼalaj: «Way yaan u espada Goliat+ le filisteoeʼ, le máax ta kíimsaj tu Táax Luʼumil Elajoʼ,+ toʼan yéetel junpʼéel nookʼ, tiaʼan paachil tiʼ le efodoʼ.*+ Wa a kʼáateʼ chʼaʼe, tumen minaʼan uláakʼ espada wayeʼ». Davideʼ tu yaʼalaj: «Minaʼan uláakʼ espada jeʼex le jeʼeloʼ. Tsʼáaten».
10 Teʼ kʼiin jeʼeloʼ Davideʼ líikʼeʼ ka seguernaj u púutsʼul+ tiʼ Saúl hasta ka kʼuch tu yiknal Akís, u reyil Gat.+
11 Le máaxoʼob meyajtik Akísoʼ tu yaʼaloʼobtiʼ: «Le máakaʼ, ¿maʼ wa David u reyil Israeliʼ? ¿Maʼ wa tu yoʼolal letiʼ kʼaaynaj le koʼoleloʼob mientras táan u yóokʼotoʼoboʼ? Letiʼobeʼ tu kʼayoʼob:
‹Saúleʼ tsʼoʼok u kíimsik u milesil u enemigoʼob,yéetel Davideʼ u decenasil u milesil+ u enemigoʼob›».
12 Davideʼ jach tuukulnaj tiʼ le baʼax aʼalaʼabaʼ ka jach sajakchaj+ tiʼ Akís, u reyil Gat.
13 Le oʼolaleʼ tu táanoʼobeʼ tu beetaj bey maʼ tu yóol yaneʼ, mientras tiaʼan tu yiknaloʼobeʼ* tu beetaj bey chokochajaʼan u pooleʼ.+ Letiʼeʼ joʼopʼ u beetik marcaʼob teʼ joonajoʼoboʼ ka joʼopʼ u chaʼik u chooj u kʼaab* u chiʼ tu meʼex.
14 Akís túuneʼ tu yaʼalaj tiʼ le máaxoʼob meyajtikoʼ: «Wa táan a wilkeʼex chokochajaʼan u pool le máakaʼ, ¿baʼaxten ta taaseʼex tin táan?
15 ¿Maʼ wa yaan yéetel le bukaʼaj máakoʼob chokochajaʼan u pooloʼob yanoʼob tin wiknal utiaʼal ka a taaseʼexten le uláakʼ juntúulaʼ? ¿Unaj wa u yokol tin wotoch?».
Notas
^ Wa «maʼ yanak relaciones sexuales tiʼob yéetel koʼoleloʼobiʼ».
^ Lelaʼ bey junpʼéel mandileʼ.
^ Ich hebreoeʼ ku yaʼalaʼal kaʼach «mientras tiaʼan tu kʼaboʼobeʼ».
^ Tuláakʼ tuʼuxeʼ ku yaʼalaʼal «lúul».
