1 Samuel 29:1-11
-
Le filisteoʼoboʼ maʼ tu confiaroʼob tiʼ David (1-11)
29 Le filisteoʼoboʼ+ tu muchʼkíintoʼob tuláakal u soldadoʼob tu kaajil Afek, mientraseʼ le israelitaʼoboʼ tiʼ pʼaatloʼob kaʼach tu tséel le tuʼux ku síijil jaʼ yaan Jezreeloʼ.+
2 Le gobernanteʼob filisteoʼoboʼ joʼopʼ u binoʼob yéetel u grupoʼob de 100 soldadoʼob bey xan yéetel u grupoʼob de 1,000 soldadoʼob, paachil tiʼ letiʼobeʼ tiʼ ku bin kaʼach David yéetel le máakoʼob láakʼintikoʼ bey xan Akís.+
3 Chéen baʼaleʼ le príncipeʼob filisteoʼoboʼ tu yaʼaloʼob: «¿Baʼax ku beetik le hebreoʼob wayoʼ?». Akíseʼ tu núukajtiʼob: «Le máakaʼ David, letiʼeʼ ku meyajtik kaʼach Saúl, u reyil Israel, chéen baʼaleʼ tsʼoʼok junpʼéel año wa maas pʼáatak tin wéetel.+ Desde le día ka púutsʼ tu kaajal utiaʼal u taal tin wiknaleʼ mix baʼal kʼaas tsʼoʼok in wilik u beetik».
4 Chéen baʼaleʼ le príncipeʼob filisteoʼoboʼ tsʼíikilnajoʼob yéetel Akíseʼ, ka tu yaʼaloʼobtiʼ: «Beet u suut le máakoʼ.+ Suunak teʼ lugar ta tsʼáajtiʼoʼ. Maʼ a chaʼik u bin t-éetel utiaʼal maʼ u tsʼáaikuba t-contra teʼ baʼateloʼ.+ Tumen ¿yaan wa uláakʼ forma maas maʼalob utiaʼal u kaʼa lúubul utsil tu táan u tsʼuulil? ¿Maʼ wa letiʼe ka u kíims k-soldadoʼoboʼ?
5 Le máakaʼ, ¿maʼ wa Davidiʼ? ¿Maʼ wa tu yoʼolal letiʼ kʼaaynaj le koʼoleloʼob mientras táan u yóokʼotoʼoboʼ? Letiʼobeʼ tu kʼayoʼob:
‹Saúleʼ tsʼoʼok u kíimsik u milesil u enemigoʼob,yéetel Davideʼ u decenasil u milesil u enemigoʼob›».+
6 Akís+ túuneʼ tu muchʼuba yéetel Davideʼ ka tu yaʼalajtiʼ: «Tu kʼaabaʼ Jéeoba, le Dios kuxaʼanoʼ, kin jurartiktech de ke teneʼ kin wilkech bey juntúul máak toj u kuxtaleʼ, kiʼimak xan in wóol ikil a jóokʼol baʼateʼel yéetel in ejército,+ tsʼoʼoleʼ desde ka taalech tin wiknaleʼ mix baʼal kʼaas tsʼoʼok in wilik a beetik.+ Chéen baʼaleʼ le uláakʼ gobernanteʼob filisteoʼoboʼ maʼ tu confiaroʼob tiʼ teech.+
7 Le oʼolaleʼ suunen, xiʼiktech utsil yéetel maʼ a beetik mix baʼal jeʼel u beetik u tsʼíikil le uláakʼ gobernanteʼoboʼ».
8 Chéen baʼaleʼ Davideʼ tu kʼáataj tiʼ Akís: «¿Baʼaxten? ¿Baʼax tsʼoʼok in beetik? ¿Yaan wa baʼax maʼ maʼalob tsʼoʼok a wilik in beetik desde le día ka taalen ta wiknal tak bejlaʼeʼ? Yuum rey, ¿baʼaxten maʼ unaj in bin ta wéetel baʼateʼel tu contra a enemigoʼobiʼ?».
9 Akíseʼ tu núukaj tiʼ David: «Teneʼ in wojleʼ techeʼ utsech, beyech juntúul u ángel Dioseʼ.+ Chéen baʼaleʼ le príncipeʼob filisteoʼoboʼ tu yaʼaloʼob: ‹Maʼ a chaʼik u bin t-éetel teʼ baʼateloʼ›.
10 Le oʼolaleʼ sáamal tempranoeʼ, teech yéetel le u j-meyajoʼob le rey taaloʼob ta wéeteloʼ, unaj a bineʼex chéen pʼelak u sáastaleʼ».
11 David yéetel le máakoʼob láakʼintikoʼ, líikʼoʼob temprano utiaʼal u suutoʼob tu luʼum le filisteoʼoboʼ, chéen baʼaleʼ le filisteoʼoboʼ naʼakoʼob tu kaajil Jezreel.+
