1 Samuel 6:1-21
-
Le filisteoʼoboʼ ku sutkoʼob u cajail le pacto tiʼ Israeloʼ (1-21)
6 U cajail u pacto+ Jéeobaeʼ siete meses tu beetaj tu territorio le filisteoʼoboʼ.
2 Le filisteoʼob túunoʼ tu túuxtoʼob tʼanbil le sacerdoteʼob yéetel le j-meenoʼoboʼ+ ka tu kʼáatoʼobtiʼob: «¿Baʼax unaj k-beetik yéetel u cajail u pacto Jéeoba? Aʼaleʼextoʼon bix unaj k-túuxtik teʼ tuʼux yaan kaʼachoʼ».
3 Letiʼob túuneʼ tu núukoʼob: «Wa yaan a sutkeʼex u cajail u pacto Jéeoba, u Dios le israelitaʼoboʼ, maʼ unaj a túuxtikeʼex sin ke a tsʼáaikeʼex junpʼéel ofrendaiʼ. Jach ilawil a túuxtikeʼex junmúuchʼ yéetel junpʼéel ofrenda yoʼolal le culpaoʼ.+ Tumen chéen jaʼaliʼ bey kan utstaleʼexoʼ yéetel yaan u kʼuchul a wojéelteʼex baʼaxten láayliʼ táan u castigarkeʼexeʼ».
4 Letiʼob túuneʼ tu kʼáatoʼob: «¿Baʼax ofrendail yoʼolal le culpa unaj k-túuxtiktiʼoʼ?». Letiʼobeʼ tu yaʼaloʼob: «Yaan a túuxtikeʼex cinco u pʼéelel hemorroides de oro yéetel cinco u pʼéelel chʼoʼob* de oro, yaan a túuxtikeʼex según le jaytúul u nuuktakil le filisteoʼoboʼ,+ tumen junpʼéeliliʼ castigo tsʼaʼab tiʼ teʼex bey xan tiʼ u nuuktakil a kaajaleʼexoʼ.
5 Unaj a beetkeʼex u imageniloʼob le hemorroidesoʼ bey xan u imageniloʼob le chʼoʼob+ táan u kʼaskúuntikoʼob le luʼumoʼ, yéetel unaj a respetarkeʼex u Dios le israelitaʼoboʼ. Beyoʼ maʼ xaaneʼ letiʼeʼ jeʼel u xuʼulul u castigarkeʼexeʼ, u castigartik a dioseʼex bey xan u castigartik a luʼumeʼex.+
6 ¿Baʼaxten bíin a beet a tercoileʼex+ jeʼex úuchik u beetik Faraón yéetel u kaajil Egiptoeʼ? Le ka sen castigartaʼaboʼob+ tumen Dioseʼ letiʼobeʼ yanchaj u chaʼikoʼob u jóokʼol u kaajil Israel.+
7 Beora túunaʼ, beeteʼex junpʼéel túumben carreta yéetel chʼaʼex kaʼatúul vacaʼob yaan u mejniloʼob yéetel mix juntéen tsʼaʼabak u cheʼil kuuch tu yóokʼoloʼob. Le kéen tsʼoʼokkeʼ tsʼáaʼex le carreta utiaʼal ka jíitaʼak tumen le vacaʼoboʼ, chéen baʼaleʼ unaj a sutkeʼex u mejniloʼoboʼ.
8 Chʼaʼex túun u cajail u pacto Jéeobaeʼ ka a tsʼáaʼex teʼ carretaoʼ, le baʼaloʼob xan de oro táan a túuxtikeʼextiʼ bey junpʼéel ofrenda yoʼolal le culpaoʼ, unaj a tsʼáaikeʼex tiʼ junpʼéel caja, yéetel unaj a tsʼáaikeʼex tu tséel u cajail le pactooʼ.+ Le kéen tsʼoʼokok túuneʼ beeteʼex u bisaʼal
9 yéetel ileʼex baʼax kun úuchul: wa ku naʼaksaʼal teʼ bej ku bin Bet-semes,+ teʼ tu territoriooʼ, u kʼáat u yaʼaleʼ u Dios u kaajil Israel beet u yúuchultoʼon le baʼax jach kʼaasaʼ. Pero wa maʼ tu yúuchul beyoʼ, yaan k-ojéeltikeʼ maʼ letiʼ castigartoʼoniʼ, chéen casualidad le baʼax úuchtoʼonoʼ».
10 Le máakoʼob túunoʼ bey tu beetiloʼoboʼ. Tu chʼaʼajoʼob kaʼatúul vacaʼob yaan u mejniloʼobeʼ ka tu tsʼáajoʼob utiaʼal ka u jíitoʼob le carretaoʼ, pero le u mejniloʼoboʼ tu kʼaloʼob tu corraloʼob.
11 Tu tsʼáajoʼob túun u cajail u pacto Jéeoba yóokʼol le carretaoʼ bey xan le caja tuʼux yaan le chʼoʼob de orooʼ bey xan u imageniloʼob le hemorroidesoʼ.
12 Le vacaʼob túunoʼ binoʼob tu tojil le bej ku bin tak Bet-semesoʼ+ yéetel maʼ jóokʼoʼob tiʼ le bejoʼ, táan kaʼach u yawatoʼob le táan u binoʼoboʼ. Maʼ tséeloʼob mix tu x-noʼojoʼobiʼ mix tu x-tsʼíikoʼobiʼ. Mientras táan u binoʼobeʼ u nuuktakil le filisteoʼoboʼ táan kaʼach u binoʼob tu paachoʼob tak ka kʼuchoʼob tu fronterail Bet-semes.
13 Le máaxoʼob kajaʼanoʼob Bet-semesoʼ táan kaʼach u cosecharkoʼob le trigo yaan teʼ táax luʼumoʼ. Le ka tu líiʼsaj u paakatoʼob yéetel le ka tu yiloʼob u cajail le pactooʼ jach kiʼimakchaj u yóoloʼob.
14 Le carretaoʼ ook ichil u kʼaax Josué le betsemitaoʼ ka waʼalaj teʼeloʼ, naatsʼ tiʼ junpʼéel nuxiʼ tuunich. Le máakoʼob túunoʼ tu chʼakoʼob u cheʼil le carretaoʼ ka tu kʼuboʼob le vacaʼob+ tiʼ Jéeoba bey junpʼéel tóokbil ofrendaeʼ.*
15 Le levitaʼob+ túunoʼ tu yéemsoʼob u cajail u pacto Jéeoba bey xan le caja yaan tu tséeloʼ, le caja tuʼux tsʼaʼan le baʼaloʼob beetaʼan de orooʼ, ka tu tsʼáajoʼob tu yóokʼol le nuxiʼ tuunichoʼ. Teʼ kʼiin jeʼeloʼ le xiiboʼob yanoʼob Bet-semesoʼ+ tu kʼuboʼob ofrendaʼob yéetel sacrificioʼob tiʼ Jéeoba.
16 Le u cinco nuuktakil le filisteoʼoboʼ le ka tu yiloʼobeʼ suunajoʼob tu kaajil Ecrón teʼ kʼiin jeʼeloʼ.
17 Lelaʼ letiʼe hemorroides de oro tu túuxtaj le filisteoʼob tiʼ Jéeoba bey junpʼéel ofrenda yoʼolal le culpaoʼ:+ junpʼéel tu yoʼolal Asdod,+ junpʼéel tu yoʼolal Gaza, junpʼéel tu yoʼolal Askelón, junpʼéel tu yoʼolal Gat+ yéetel junpʼéel tu yoʼolal Ecrón.+
18 Le jaypʼéel chʼoʼob de oro túuxtaʼaboʼ igual yéetel le jaypʼéel kaajoʼob yaan tiʼ le u cinco u nuuktakil le filisteoʼoboʼ, ichiloʼobeʼ tiaʼan kaʼach le kaajoʼob yaan u pakʼiloʼob tu baʼpachoʼoboʼ bey xan le minaʼan u pakʼiloʼob tu baʼpachoʼoboʼ.
Le nuxiʼ tuunich yaan tu kʼaax Josué le betsemitaoʼ, le tuʼux pejkúuntaʼab u cajail u pacto Jéeobaoʼ, tak bejlaʼa ku meyaj bey juntúul testigoeʼ.
19 Chéen baʼaleʼ Dioseʼ tu xuʼulsaj le xiiboʼob kajaʼanoʼob Bet-semesoʼ, tumen letiʼobeʼ tu paktoʼob u cajail u pacto Jéeoba. Letiʼeʼ tu xuʼulsaj tiʼ 50,070* máakoʼob ichil le kaajoʼ, le kaaj túunoʼ sen yaachaj u yóol tumen Jéeobaeʼ jach yaʼab israelitaʼob tu xuʼulsaj.+
20 Le xiiboʼob kajaʼanoʼob túun Bet-semesoʼ joʼopʼ u kʼáatkoʼob: «¿Máax jeʼel u páajtal u waʼatal tu táan Jéeoba, le Dios santooʼ?+ ¿Tu yiknal máax kun bin le kéen u pʼatoʼon?».+
21 Letiʼob túuneʼ tu túuxtoʼob aʼalbil tiʼ le máaxoʼob kajaʼanoʼob Kiriat-jearimoʼ:+ «Le filisteoʼoboʼ tsʼoʼok u sutkoʼob u cajail u pacto Jéeoba. Éemkeʼex ka a biseʼex».+
Notas
^ Tuláakʼ tuʼuxeʼ ku yaʼalaʼal «pʼiich».
^ Ilawil «Tóokbil ofrenda», página 2582.
^ Ich hebreoeʼ ku yaʼalaʼal kaʼach «70 xiiboʼob, 50,000 xiiboʼob».
