1 Tesalonicenses 3:1-13
3 Tumen jach taak k-ojéeltik bix u binteʼexeʼ t-tuklaj maas maʼalob ka pʼáatkoʼon t-juunal tu kaajil Atenas,+
2 le oʼolal t-túuxtaj ta wiknaleʼex k-sukuʼun Timoteo,+ letiʼeʼ ku meyajtik Dios yéetel ku tsʼáaik ojéeltbil le maʼalob baʼaloʼob yaan yil yéetel Cristooʼ. Toʼoneʼ t-túuxtaj utiaʼal u líiʼsik a wóoleʼex yéetel utiaʼal ka u muʼukʼaʼankúunt a fejeʼex.
3 Beyoʼ mix juntúul tiʼ teʼex kun lúuʼsbil* u yóol tumen le baʼaxoʼob ku muʼyajtikoʼ. Tumen teʼexeʼ a wojleʼex maʼ tu páajtal k-jechik le baʼaloʼobaʼ.+
4 Tak le tiaʼanoʼon kaʼach ta wiknaleʼexoʼ suuk k-aʼalikteʼex yaniliʼ k-muʼyajtik yaayaj baʼaloʼobeʼ, jeʼex a wojlileʼexoʼ lelaʼ letiʼe baʼax tsʼoʼok u yúuchultoʼonoʼ.+
5 Le oʼolaleʼ taakchaj in wojéeltik bix u binteʼex, ka túun tin túuxtaj Timoteo utiaʼal ka u yil bix le chúukaʼan óolal yaanteʼexoʼ.+ Teneʼ saajken wa tsʼoʼok u túuntaʼal a wóoleʼex tumen le Kʼaasilbaʼaloʼ+ yéetel wa tsʼoʼok u pʼáatal chéen kunel le baʼax t-beetaj ta woʼolaleʼexoʼ.
6 Beoraaʼ Timoteoeʼ tsʼoʼok u lukʼul ta wiknaleʼex yéetel táant u kʼuchul t-iknaleʼ.+ Letiʼeʼ tsʼoʼok u yaʼaliktoʼoneʼ jach a kʼubmaj a wóoleʼex tiʼ Dios yéetel jach yaan a yaabilajeʼex. Tsʼoʼok xan u yaʼaliktoʼoneʼ mantatsʼ ka kʼaʼajskoʼoneʼex yéetel yaabilaj bey xan a kʼáat a wiloʼoneʼex jeʼex toʼon k-kʼáat xan k-ileʼexeʼ.
7 Le oʼolaleʼ sukuʼuneʼex, kex yaʼab baʼaloʼob beetik k-chiʼichnaktal yéetel kex táan k-sen muʼyajeʼ tsʼoʼok u kiʼimaktal k-óol ta woʼolaleʼex bey xan tu yoʼolal le chúukaʼan óolal ka weʼeskeʼexoʼ.+
8 Ku líiʼsik k-óol k-ojéeltik chúukaʼan a wóol a beeteʼex baʼax u kʼáat Yuumtsil.
9 Toʼoneʼ jach k-tsʼáaik gracias tiʼ Dios ta woʼolaleʼex tumen teʼexeʼ ka beetkeʼex u sen kiʼimaktal k-óol.
10 U jaajileʼ bul kʼiin yéetel bul áakʼab táan k-sen kʼáat óolal tiʼ Dios ka páajchajak k-ilkeʼex yéetel ka páajchajak k-áantkeʼex yéetel le baʼaxoʼob kʼaʼabéetteʼex utiaʼal ka muʼukʼaʼanchajak a fejeʼexoʼ.+
11 Beora túunaʼ k-tsʼíiboltik ka nuʼuktaʼak k-beel tumen k-Dios le k-Taataoʼ bey xan tumen k-Yuumtsil Jesús utiaʼal ka páajchajak k-bin ta wiknaleʼex.
12 K-tsʼíiboltik xan ka áantaʼakeʼex tumen Yuumtsil utiaʼal ka a paklan yaabiltabaʼex+ yéetel ka a yaabilteʼex u maasil. Jach beyoʼ k-kʼáat ka chuʼupuk a puksiʼikʼaleʼex yéetel yaabilaj jeʼex k-yaabiltmileʼexeʼ.
13 Bey túunoʼ tu kʼiinil way yaan* k-Yuumtsil Jesús+ yéetel tuláakal le máaxoʼob santoʼoboʼ, Dioseʼ yaan u beetik u muʼukʼaʼantal a puksiʼikʼaleʼex yéetel ka pʼáatak limpioil bey xan ka pʼáatak santoil tu táan k-Dios+ le k-Taataoʼ.
