1 Tesalonicenses 5:1-28
5 Beora túunaʼ, sukuʼuneʼex, tiʼ baʼax yaan yil yéetel le baʼaxoʼob tsʼaʼan u kʼiinil u yúuchloʼoboʼ maʼ kʼaʼabéet u tsʼíibtaʼalteʼex mix baʼaliʼ.
2 Tumen tak teʼex jach a wojleʼexeʼ u kʼiinil Jéeobaeʼ+ yaan u taal jach jeʼex u taal juntúul j-ookol de áakʼabeʼ.+
3 Le kéen aʼalaʼak tumen le máakoʼob: «¡Tuláakal jejetsʼkil yéetel maʼalob yanil!», letiʼ túun ken téek taalak xuʼulsajil tu yóokʼoloʼob,+ jeʼex le kʼiʼinam ku muʼyajtik juntúul koʼolel le táan u síijil u chaambaloʼ. Letiʼobeʼ junpuliʼ maʼ kun púutsʼloʼob.
4 Chéen baʼaleʼ, sukuʼuneʼex, teʼexeʼ minaʼaneʼex ich éeʼjochʼeʼenil jeʼex yanil le j-ookoloʼoboʼ, le oʼolal yaan a tsʼáaikeʼex cuenta le kéen téek taalak u kʼiinil Dios ta wóokʼoleʼex.
5 Teʼexeʼ tuláakleʼex u paalaleʼex le sáasiloʼ yéetel u tiaʼaleʼex le kʼiinoʼ.+ Toʼoneʼ maʼ u tiaʼaloʼon áakʼabiʼ mix u tiaʼaloʼon éeʼjochʼeʼeniliʼ.+
6 Le oʼolaleʼ maʼ unaj k-weenleʼex jeʼex u beetik le uláakʼ máakoʼoboʼ,+ baʼaxeʼ unaj k-pʼilik k-ich mantatsʼ+ yéetel unaj k-kanáantik maʼ u saʼatal k-óol.+
7 Tumen le máaxoʼob ku weenloʼoboʼ de áakʼab ku weenloʼob. Le máaxoʼob xan ku káaltaloʼoboʼ de áakʼab kalaʼanoʼob.+
8 Chéen baʼaleʼ toʼoneʼ u tiaʼaloʼon le kʼiinoʼ, le oʼolal unaj k-kanáantik maʼ u saʼatal k-óol. Toʼoneʼ unaj k-búukintik le fe yéetel le yaabilaj jeʼex u tsʼaʼabal junpʼéel corazaoʼ,* yéetel le esperanza yaantoʼon utiaʼal k-salvartaʼaloʼ unaj k-tsʼáaik jeʼex u tsʼaʼabal junpʼéel cascoeʼ.+
9 Dioseʼ maʼ tu yéeyoʼon utiaʼal u yeʼesiktoʼon u pʼujaʼaniliʼ, baʼaxeʼ utiaʼal ka salvartaʼakoʼon+ tu yoʼolal k-Yuumtsil Jesucristo.
10 Letiʼeʼ kíim t-oʼolal+ utiaʼal ka kuxlakoʼon junmúuchʼ tu yéetel kex kuxaʼanoʼon wa kex kimenoʼon.+
11 Le oʼolaleʼ seguernak a paklan líiʼsik a wóoleʼex yéetel a paklan muʼukʼaʼankúuntik a wóoleʼex+ jach jeʼex táan a beetkeʼexoʼ.
12 Beora túunaʼ, sukuʼuneʼex, k-kʼáatikteʼex ka a chʼaʼex en cuenta le máaxoʼob jach ku xupkubaʼob meyaj ichileʼexoʼ, tumen letiʼobeʼ ku nuʼuktikoʼob a beeleʼex utiaʼal a meyajtikeʼex Yuumtsil yéetel ku tsolkoʼob a xikneʼex.
13 Eʼeseʼex maas nojoch utsil tiʼ letiʼob yéetel yaabilteʼexoʼob tu yoʼolal le meyaj ku beetkoʼoboʼ.+ Ilawileʼex a kuxtaleʼex ich jeetsʼelil ta baatsileʼex.+
14 Yaan xan uláakʼ baʼal jach taak k-aʼalikteʼex sukuʼuneʼex: tsoleʼex u nuʼuk tiʼ le máaxoʼob maʼatech u yuʼubikoʼob tʼaanoʼ.+ Tʼaaneneʼex yéetel le máaxoʼob jach lubaʼan u yóoloʼoboʼ, líiʼseʼex u yóoloʼob. Áanteʼex le máaxoʼob minaʼan u muukʼoʼoboʼ, eʼeseʼex paciencia tiʼ tuláakal máak.+
15 Ilawileʼex maʼ u yantal mix máak ichileʼex ka u sut u jeel le baʼax ku beetaʼaltiʼoʼ,+ baʼaxeʼ eʼeseʼex a wutsileʼex ta baatsileʼex bey xan tiʼ u maasil máakoʼob.+
16 Kiʼimakchajak a wóoleʼex mantatsʼ.+
17 Maʼ u jáawal a orareʼex.+
18 Tsʼáaʼex u diosboʼotikil tuláakal baʼal.+ Leloʼ letiʼe baʼax u kʼáat Dios ka u beet le máaxoʼob tsaypachtik Cristo Jesúsoʼ.
19 Chaʼex u yáantkeʼex* le espíritu santooʼ.+
20 Maʼ a mixbaʼalkúuntikeʼex le profecíaʼoboʼ.+
21 Xakʼalteʼex tuláakal baʼal utiaʼal ka a wileʼex wa maʼalob.+ Chʼíikikeʼex a beeteʼex baʼax maʼalob.
22 Náachkuntabaʼex tiʼ tuláakal baʼax kʼaas.+
23 Teneʼ kin kʼáat óoltik tiʼ Dios, le máax tsʼáaik jeetsʼeliloʼ, ka u beet a pʼáatleʼex santoil utiaʼal a meyajtikeʼex. Sukuʼuneʼex, tu kʼiinil way yaan k-Yuumtsil Jesucristoeʼ kin tsʼíiboltik maʼ u yantal mix junpʼíit kʼasaʼanil ta tuukuleʼex, ta puksiʼikʼaleʼex yéetel ta wíinklileʼex, beyoʼ yaan a pʼáatleʼex maʼalobil tu táan Dios.+
24 Dioseʼ letiʼ tʼaneʼex, letiʼeʼ chúukaʼan u yóol tiʼ baʼax ku yaʼalik yéetel jach yaan u béeykuntik.
25 Sukuʼuneʼex, maʼ u xuʼulul a orareʼex t-oʼolal.+
26 Saludarteʼex tuláakal le sukuʼunoʼoboʼ yéetel tsʼuʼutsʼeʼexoʼob.
27 Kin kʼáatikteʼex tu kʼaabaʼ Yuumtsileʼ ka xoʼokok le carta tiʼ tuláakal le sukuʼunoʼoboʼ.+
28 Ka yanak u nojoch utsil k-Yuumtsil Jesucristo ta wéeteleʼex.
Notas
^ Lelaʼ junpʼéel baʼal ku tsʼáaik kaʼach le soldadoʼob utiaʼal u pixik u tseemoʼoboʼ.
^ Ich griegoeʼ ku yaʼalaʼal kaʼach «Maʼ a tupikeʼex u kʼáakʼil».
