1 Timoteo 3:1-16
3 Le baʼax kin waʼalikaʼ jach jaaj: wa juntúul xiib u kʼáat ka tsʼaʼabaktiʼ u meeyjil u kanáantaʼal le múuchʼuliloʼ+ jach maʼalob le baʼax ku tsʼíiboltikoʼ.
2 Le máax kanáantik le múuchʼuliloʼ kʼaʼabéet juntúul máak minaʼan baʼax oʼolal u kʼeʼeyel, juntúul máak chéen juntúul u yatan, ku tsʼáaik u pʼiis tuláakal baʼax ku beetik, maʼalob u tuukul,+ maʼ xaʼaxakʼaʼan u kuxtaliʼ, ku utsul kʼamik u yuʼulaboʼob,+ noʼojaʼan utiaʼal kaʼansaj,+
3 maʼ juntúul j-káaltal máakiʼ,+ maʼ juntúul máak kʼaas u pʼuʼujuliʼ,* baʼaxeʼ uts u puksiʼikʼal,+ maʼ j-kaxan baʼateliʼ,+ maʼ juntúul máak jach uts tu yich taakʼiniʼ,+
4 juntúul máak jach maʼalob bix u nuʼuktik u yotoch, ku yuʼubaʼal u tʼaan tumen u paalal yéetel ku beetaʼal baʼax maʼalob tumen u paalal.+
5 (U jaajileʼ wa juntúul máak mix u yotoch u yojel u nuʼukteʼ, ¿bix túun ken u kanáantil u múuchʼulil Dios?).
6 Maʼ juntúul túumben discípuloiʼ,+ tumen bik u taasuba nojbaʼalil ka u náajalt xan le castigo aʼalaʼan u tsʼaʼabal tiʼ le Kʼaasilbaʼaloʼ.*
7 Tsʼoʼoleʼ tak le máaxoʼob minaʼanoʼob ichil le múuchʼuliloʼ kʼaʼabéet maʼalob u tʼaanoʼob tu yoʼolal le máakaʼ,+ utiaʼal beyoʼ maʼ u yaʼalaʼal baʼal tiʼ, mix u táabsaʼal tumen le Kʼaasilbaʼaloʼ.
8 Le siervo ministerialoʼoboʼ kʼaʼabéet xan yiijchajaʼan u tuukuloʼob, maʼ j-kaʼapʼéel ichoʼobiʼ,* maʼ unaj u sen ukʼikoʼob vinoiʼ, maʼ unaj u tsʼíiboltkoʼob taakʼin maʼ uts bix náajaltaʼaniliʼ.+
9 Tsʼoʼoleʼ unaj u yantal junpʼéel maʼalob conciencia tiʼob yéetel unaj u kanáantkoʼob le baʼax taʼakaʼan tumen Dios yaan yil yéetel le fejoʼ.+
10 Baʼax kʼaʼabéet xan u yáax beetaʼaleʼ u yilaʼal wa noʼojaʼanoʼob utiaʼal le meyajoʼ, le kéen tsʼoʼokok túuneʼ wa minaʼan baʼax oʼolal u taʼakal u pooloʼobeʼ+ u beet u siervo ministerialiloʼob.
11 Le koʼoleloʼoboʼ kʼaʼabéet xan yiijchajaʼan u tuukuloʼob, maʼ x-líiʼsaj tʼaanoʼobiʼ,+ ku tsʼáaikoʼob u pʼiis le baʼaxoʼob ku beetkoʼoboʼ yéetel jach chúukaʼan u yóoloʼob tiʼ tuláakal baʼal.+
12 Le siervo ministerialoʼoboʼ kʼaʼabéet chéen juntúul u yatanoʼob yéetel kʼaʼabéet u nuʼuktikoʼob tubeel u paalaloʼob bey xan le uláakʼ máaxoʼob yanoʼob tu yotochoʼoboʼ.
13 Tumen le xiiboʼob jach maʼalob u meyajoʼoboʼ ku náajaltikoʼob ka úuchuk maʼalob tʼaan tu yoʼolaloʼob yéetel ku páajtal u tʼaanoʼob yéetel u jaajil u yóoloʼob tiʼ le fe yaantiʼob tu yoʼolal Cristo Jesúsoʼ.
14 Timoteo, in tuklikeʼ maʼ kun xáantal ken xiʼiken ta wiknal, chéen baʼaleʼ táan in tsʼíibtiktech le baʼaloʼobaʼ
15 tumen wa maʼ tin séeb kʼuchleʼ techeʼ a wojel bix jeʼel a portarkaba tu yotoch Dioseʼ.+ Lelaʼ u múuchʼulil le Dios kuxaʼanoʼ, u yokomil yéetel u chuunpakʼil le jaajoʼ.
16 U jaajileʼ le baʼax taʼakaʼan tumen Dios yaan yil yéetel le fejoʼ jach nojoch: ‹Jesúseʼ chíikbesaʼab bey wíinikeʼ,+ aʼalaʼab toj u kuxtal ka tsʼoʼok u tsʼaʼabal junpʼéel kaʼanilbeʼen wíinklil tiʼ,+ tu yeʼesuba tiʼ ángeloʼob,+ tsʼaʼab ojéeltbil u kʼaabaʼ teʼ luʼumoʼoboʼ,+ creertaʼab tumen u máakiloʼob le yóokʼol kaabaʼ,+ kʼaʼam teʼ kaʼanoʼ yéetel tsʼaʼab páajtalil tiʼ›.
Notas
^ Wa «maʼ juntúul máak ku jaatsʼiʼ».
^ Ich griegoeʼ ku yaʼalaʼal kaʼach «Diablo». Ilawil «Kʼaasilbaʼal», página 2568.
^ Wa «maʼatech u tuusoʼob».
