1 Timoteo 4:1-16
4 Chéen baʼaleʼ le espíritu santooʼ* juntaatsʼ u yaʼalikeʼ teʼ kʼiinoʼob ku taaloʼoboʼ yaan máaxoʼob kun náachtaloʼob tiʼ le fe ikil u chʼenxikintikoʼob baʼaloʼob bey tiʼ Dios u taaloʼobeʼ chéen baʼaleʼ maʼ jaajtakoʼobiʼ,+ bey xan ikil u chʼenxikintikoʼob u kaʼansaj demonioʼob.
2 Lelaʼ ku yúuchul tu yoʼolal le tuus ku beetik le j-kaʼapʼéel ichoʼoboʼ.+ U conciencia le máakoʼobaʼ bey tóokaʼan yéetel junpʼéel chakjoleʼen fierro ku meyaj utiaʼal u yúuchul marcareʼ.
3 Letiʼobeʼ ku yaʼalikoʼob maʼ unaj u tsʼoʼokol u beel máakiʼ+ yéetel maʼ unaj u jaantaʼal jujunpʼéel janaloʼobiʼ+ kex leloʼobaʼ tsʼaʼanoʼob tumen Dios+ utiaʼal ka tsʼaʼabak gracias tu yoʼolaloʼob yéetel utiaʼal ka jaantaʼak tumen le máaxoʼob yaan u fejoʼob+ yéetel u kʼaj óoloʼob tubeel le jaajoʼ.
4 Tuláakal baʼax u beetmaj Dioseʼ jach maʼalob,+ yéetel unaj k-kʼamik+ tumen tsʼoʼok k-orar utiaʼal k-tsʼáaik gracias tu yoʼolal.
5 Le janaloʼ ku pʼáatal limpioil tu yoʼolal u tʼaan Dios bey xan tu yoʼolal le oración ku beetaʼal tu yoʼolaloʼ.
6 Timoteo, le kéen a tsʼáa le tsolnuʼuk tiʼ le sukuʼunoʼoboʼ yaan a kʼuchul a beetaba juntúul maʼalob j-meeyjil tiʼ Cristo Jesús, juntúul máax u tséentmuba yéetel u tʼaaniloʼob le fejoʼ bey xan yéetel le jach maʼalob kaʼansajoʼob tsʼoʼok u chúukpajal a wóol a tsʼoʼokbesoʼoboʼ.+
7 Chéen baʼaleʼ maʼ a wóotik a wuʼuy le kaʼansajoʼob maʼ jaajtak+ ku binoʼob tu contra Dios, jeʼex le ku tsikbaltik le x-nuukoʼoboʼ. Tsʼoʼoleʼ seguernak a maas tsʼáaik a wóol a meyajt Dios.
8 Tumen u beetik ejercicio máakeʼ chéen junpʼíit utsil ku taasik, chéen baʼaleʼ u jach kʼubik u yóol máak u meyajt Dioseʼ maas yaʼab utsil ku taasik ichil tuláakal baʼax ku beetik, tumen ku taasiktoʼon utsil ichil k-kuxtal bejlaʼeʼ bey xan ichil le kuxtal kun antaloʼ.+
9 Lelaʼ jach jaaj yéetel tuláakal máak unaj u creertik.
10 Tu yoʼolal lelaʼ táan k-tsʼáaik k-óol yéetel táan k-xachikba meyaj+ tumen tsʼoʼok k-kʼubik k-óol tiʼ juntúul Dios kuxaʼan, u Salvador+ tuláakal u jejeláasil máakoʼob,+ maases tiʼ le máaxoʼob chúukaʼan u yóoloʼob u meyajtoʼoboʼ.
11 Maʼ u xuʼulul a waʼalik ka beetaʼak le baʼaloʼobaʼ yéetel kaʼans bix unaj u beetaʼaloʼob.
12 Maʼ a chaʼik tiʼ mix máak ka u mixbaʼalkúunt a táankelmil, baʼaxeʼ yéetel le baʼaxoʼob ka beetkoʼ eʼes tiʼ le máakoʼob chúukaʼan u yóoloʼoboʼ bix unaj u tʼaanoʼob, bix unaj u kuxtaloʼob, bix unaj u yeʼeskoʼob yaabilaj, bix unaj u yeʼeskoʼob fe yéetel bix jeʼel u yantaltiʼob junpʼéel kuxtal limpio tu táan Dioseʼ.
13 Mientras in kʼuchleʼ maʼ u xuʼulul a tsʼáaik a wóol xook tu táan u maasil,+ maʼ u xuʼulul a líiʼsik u yóoloʼob yéetel a kaʼanskoʼob.
14 Ilawil maʼ u xuʼulul u meyajtech le baʼax siʼibtech tumen Diosoʼ. Lelaʼ tsʼaʼabtech tu yoʼolal junpʼéel profecía aʼalaʼab ta woʼolal le ka tu tsʼáaj u kʼaboʼob le junmúuchʼ ancianoʼob ta wóokʼoloʼ.+
15 Chʼik a tuukul tiʼ le baʼaloʼobaʼ, jach tsʼáa a wóol a beetoʼob utiaʼal ka jach ilaʼak tumen tuláakal máak bix a bin táanil.
16 Maʼ u xuʼulul a kanáantkaba yéetel mantatsʼ jach kanáant baʼax ka kaʼansik.+ Maʼ u xuʼulul a beetik le baʼaloʼobaʼ tumen beyoʼ yaan a salvarkaba bey xan le máaxoʼob chʼenxikintikechoʼ.+
Notas
^ Ilawil «Espíritu santo», página 2562.
