2 Crónicas 17:1-19
17 Jeosafat,+ u hijo Asá túuneʼ, káaj u beetik u reyil tu lugar u papá. Letiʼeʼ jach anchaj u páajtalil tu yóokʼol Israel.
2 Tiʼ tuláakal le kaajoʼob yaan u baʼpakʼiloʼob yanoʼob Judáoʼ tu tsʼáaj soldadoʼobiʼ. Tsʼoʼoleʼ tu tsʼáaj jejeláas múuchʼ soldadoʼob tiʼ tuláakal u luʼumil Judá bey xan tiʼ tuláakal le kaajoʼob tu chʼaʼaj Asá tu luʼumil Efraínoʼ.+
3 Jéeobaeʼ maʼ tu pʼataj Jeosafatiʼ, tumen Jeosafateʼ kuxlaj jeʼex kuxlajik David, u yúuchben láakʼtsiloʼ,+ yéetel maʼ tu adorartaj le Baaloʼoboʼ.
4 Tsʼoʼoleʼ Jeosafateʼ tu meyajtaj u Dios u papá,+ yéetel tu beetaj* le baʼax ku yaʼalik u mandamientoʼoboʼ, maʼ tu beetaj le baʼaloʼob suuk u beetik u kajnáaliloʼob Israeloʼ.+
5 Jéeoba túuneʼ tu beetaj u pʼáatal seguroil le reino yáanal u nuʼuktaj Jeosafatoʼ.+ Tuláakal u kajnáaliloʼob Judáeʼ ku taaskoʼob kaʼach baʼaloʼob u síiʼob tiʼ Jeosafat. Tiʼ letiʼeʼ yanchaj yaʼab ayikʼaliloʼob yéetel yaʼab páajtalil.+
6 Letiʼeʼ maʼ sajakchaj u beet baʼax ku yaʼalik Jéeobaiʼ, tu luʼsaj le kaʼanal lugaroʼob yéetel le cheʼob ku adorartaʼaloʼ. Tsʼoʼoleʼ tu luʼumil Judáeʼ tu luʼsaj le kaʼanal lugaroʼob+ yéetel le cheʼob ku adorartaʼaloʼoboʼ.+
7 Tres años káajak u reinar Jeosafat ka tu túuxtaj tʼanbil Ben-ail, Abdías, Zacarías, Netanel yéetel Micaya, le máaxoʼob u tsʼaamaj autoridad tiʼoboʼ. Tiʼ letiʼobeʼ tu yaʼalaj ka xiʼikoʼob utiaʼal ka kaʼansajnakoʼob tu kaajiloʼob Judá.
8 Tu yéeteloʼobeʼ bin le levitaʼoboʼ, bin Semaya, Netanías, Zebadías, Asael, Semiramot, Jeonatán, Adonías, Tobiya yéetel Tob-adonías. Tu yéeteloʼobeʼ bin xan Elisamá yéetel Jeoram, le sacerdoteʼoboʼ.+
9 Le ka binoʼobeʼ tu bisoʼob u libroil u Ley Jéeoba,+ ka joʼopʼ u kaʼansajoʼob tu luʼumil Judá. Letiʼobeʼ binoʼob tiʼ tuláakal u kaajiloʼob Judá utiaʼal u kaʼanskoʼob le máakoʼoboʼ.
10 Jéeoba túuneʼ tu beetaj u sajaktal le gobernanteʼob yanoʼob tu baʼpach u kaajiloʼob Judáoʼ. Le oʼolal letiʼobeʼ maʼ baʼatelnajoʼob tu contra Jeosafatiʼ.
11 Le filisteoʼoboʼ tu taasoʼob baʼaloʼob utiaʼal u síiʼob tiʼ Jeosafat bey xan taakʼin utiaʼal u boʼotkoʼob impuesto tiʼ. Le árabeʼoboʼ tu chʼaʼajoʼob 7,700 xibil tamanoʼob yéetel 7,700 chivoʼob ichil u yaalakʼoʼobeʼ ka tu bisoʼob tiʼ Jeosafat.
12 Jeosafateʼ joʼopʼ u maas antal u páajtalil,+ yéetel tu luʼumil Judáeʼ seguernaj u líiʼsik nukuch najoʼob kaʼanal u pakʼiloʼob+ bey xan kaajoʼob utiaʼal u almacenartaʼal baʼaloʼob.+
13 Tsʼoʼoleʼ tu kaajiloʼob Judáeʼ tu beetaj uláakʼ nukuch meyajoʼob. Tu kaajil Jerusaléneʼ u tsʼaamaj kaʼach soldadoʼobiʼ, máakoʼob jach u yojloʼob baʼateʼel.
14 Le soldadoʼobaʼ muʼuchʼoʼob según tiʼ baʼax familiail u taaloʼob. U nuuktakil le familiaʼob ku taaloʼob tiʼ Judáoʼ letiʼe jeʼeloʼobaʼ: le yáaxoʼ Adná, tu yéeteleʼ tiaʼan 300,000 soldadoʼob jach u yojloʼob baʼateliʼ.+
15 Yáanal u nuʼuktajeʼ tiaʼan Jeyoanániʼ, letiʼeʼ ku nuʼuktik 280,000 soldadoʼob.
16 Yáanal xan u nuʼuktaj Adnáeʼ tiaʼan Amasía u hijo Zicríiʼ, letiʼeʼ jach u tsʼaamaj u yóol u meyajt Jéeoba. Tu yéeteleʼ tiaʼan 200,000 soldadoʼob jach u yojloʼob baʼateliʼ.
17 Tiʼ u tribu Benjamíneʼ+ tiʼ u taal Eliadáiʼ, juntúul soldado jach u yojel baʼateʼel. Tu yéeteleʼ tiaʼan 200,000 soldadoʼob yaan u arcoʼob yéetel u escudoʼobiʼ.+
18 Yáanal u nuʼuktaj Eliadáeʼ tiaʼan Jeozabadiʼ, tu yéeteleʼ tiaʼan 180,000 soldadoʼob u prepararmubaʼob utiaʼal le baʼateloʼ.
19 Le soldadoʼobaʼ letiʼob meyajtik le reyoʼ. Aparte tiʼ letiʼobeʼ le reyoʼ u tsʼaamaj soldadoʼob tiʼ tuláakal u luʼumil Judá, teʼ kaajoʼob yaan u pakʼiloʼob tu baʼpachoʼoboʼ.+
Notas
^ Ich hebreoeʼ ku yaʼalaʼal kaʼach «yéetel xíimbalnaj tiʼ».
