2 Crónicas 19:1-11
19 Jeosafat u reyil Judá túuneʼ suunaj yéetel utsil+ tu yotoch* tu kaajil Jerusalén.
2 Jehú+ u hijo Aananí,+ le máax ilik baʼax ku taal u kʼiinil u yúuchloʼ, jóokʼ u chʼaʼa u beel rey Jeosafateʼ ka tu yaʼalajtiʼ: «¿Unaj wa a wáantik le kʼasaʼan máakoʼ?+ ¿Unaj wa a yaabiltik le máaxoʼob u pʼekmoʼob Jéeobaoʼ?+ Tu yoʼolal le baʼax ta beetaʼ Jéeobaeʼ pʼujaʼan ta contra.
3 Chéen baʼaleʼ yaan baʼaloʼob maʼalobtak tsʼoʼok u yilik Dios tiʼ teech.+ Tumen techeʼ ta luʼsaj teʼ luʼum le cheʼob ku adorartaʼaloʼ yéetel tsʼoʼok a preparartik a puksiʼikʼal utiaʼal* a kaxtik le u jaajil Diosoʼ».+
4 Jeosafateʼ seguernaj u kajtal Jerusalén, yéetel bin tu kaʼatéen u xíimbalt le kaajoʼ. Letiʼeʼ bin desde Beer-seba tak tu montañailoʼob Efraín+ utiaʼal u líiʼsik u yóol le máakoʼob utiaʼal ka suunakoʼob tu yiknal Jéeoba, u Dios u yúuchben láakʼtsiloʼoboʼ.+
5 Tiʼ tuláakal le kaajoʼob yaan u baʼpakʼiloʼob tu luʼumil Judáoʼ letiʼeʼ tu tsʼáaj xan juezoʼobiʼ, tiʼ cada kaaj tu beetaj beyoʼ.+
6 Tsʼoʼoleʼ tu yaʼalaj tiʼ le juezoʼoboʼ: «Jach ilawileʼex baʼax ka beetkeʼex, tumen teʼexeʼ táan a juzgareʼex tu kʼaabaʼ Jéeoba, maʼ tu kʼaabaʼ wíinikiʼ. Le kéen juzgarnakeʼexeʼ letiʼeʼ yaan u yantal ta wéeteleʼex.+
7 Le oʼolaleʼ respetarteʼex Jéeoba.+ Kanáanteʼex baʼax ka beetkeʼex, tumen Jéeoba k-Dioseʼ maʼatech u beetik injusticia,+ igual bix u tratartik tuláakal máak,+ yéetel maʼatech u chaʼik u maʼanal».+
8 Tu kaajil Jerusaléneʼ Jeosafateʼ tu tsʼáaj xan jujuntúul levitaʼob, sacerdoteʼob yéetel jujuntúul tiʼ u nuuktakil le familiaʼob yanoʼob Israeloʼ. Tu tsʼáajoʼob utiaʼal ka juzgarnakoʼob tu kʼaabaʼ Jéeoba yéetel utiaʼal u yutskíintikoʼob le problemas ku yantal ichil u kajnáaliloʼob Jerusalénoʼ.+
9 Tsʼoʼoleʼ tu yaʼalaj xan tiʼob: «Le kéen a beet a meyajeʼexeʼ, eʼeseʼex respeto tiʼ Jéeoba, beeteʼex yéetel chúukaʼan óolal bey xan yéetel tuláakal a puksiʼikʼaleʼex.* Lelaʼ letiʼe baʼax unaj a beetkeʼexaʼ:
10 cada ken taalak a sukuʼuneʼex tiʼ uláakʼ kaajoʼob utiaʼal ka a wutskíinteʼex junpʼéel problema yaantiʼob yaan yil yéetel u kíimsaʼal máak,+ wa junpʼéel problema yaan yil yéetel junpʼéel ley, junpʼéel mandamiento, wa junpʼéel baʼax u yaʼalmaj Dioseʼ, teʼexeʼ unaj a tsolkeʼex u nuʼuk tiʼob utiaʼal maʼ u yantal u culpaʼob tu táan Jéeoba. Tumen wa maʼ ta beetkeʼex beyaʼ Dioseʼ yaan u pʼuʼujul ta contraʼex yéetel tu contra a sukuʼuneʼex. Bey unaj a beetkeʼex utiaʼal maʼ u yantal a culpaʼexoʼ.
11 Amarías le u nojchil le sacerdoteʼoboʼ letiʼ kun nuʼuktikeʼex yéetel letiʼ kun áantkeʼex utiaʼal ka a wojéelteʼex bix unaj u beetaʼal tuláakal baʼal tu táan Jéeoba.+ Zebadías u hijo Ismael u nojchil u tribu Judáeʼ, letiʼ kun ilik tuláakal le baʼaxoʼob yaan yil yéetel le reyoʼ. Yéetel yaan xan a wáantaʼaleʼex tumen le levitaʼoboʼ. Maʼ a chʼaʼikeʼex saajkil, baʼaxeʼ beeteʼex le meyaj kʼubéentaʼanteʼexoʼ. Jéeoba ka yanak yéetel le máaxoʼob beetik baʼax maʼaloboʼ».*+
Notas
^ Wa «palacio».
^ Wa «yéetel tsʼoʼok a chʼaʼtuklik ichil a puksiʼikʼal».
^ Wa «yéetel kʼub a wóol a meyajteʼex».
^ Wa «le baʼax utsoʼ».
