2 Reyes 15:1-38
15 Veintisiete años káajak u reinar Jeroboán,* u reyil Israel, ka káaj u reinar Azarías*+ u hijo Amasías,+ u reyil Judá.+
2 Azaríaseʼ 16 años yaan kaʼach tiʼ ka joʼopʼ u beetik u reyil, yéetel 52 años xáanchaj táan u reinar desde tu kaajil Jerusalén. U kʼaabaʼ u maamaeʼ Jecolías, le koʼolelaʼ Jerusalén u taal.
3 Azaríaseʼ seguernaj u beetik baʼax maʼalob tu táan Jéeoba jeʼex úuchik u beetaʼal tumen Amasías, u papáoʼ.+
4 Kex beyoʼ le kaʼanal lugaroʼob tuʼux ku adorar le kaajoʼ maʼ luʼsaʼaboʼobiʼ+ yéetel láayliʼ táan kaʼach u kʼubkoʼob sacrificioʼob yéetel láayliʼ táan u beetkoʼob u butsʼilankil u sacrificioʼob teʼ kaʼanal lugaroʼoboʼ.+
5 Jéeoba túuneʼ tu beetaj u tsaʼayal lepra+ tiʼ le reyoʼ, bey pʼáatik tak le kʼiin ka kíimoʼ. Letiʼeʼ kajlaj tu juunal tiʼ yaanal naj,+ u hijo túuneʼ letiʼ kaʼach nuʼuktik le najoʼ* yéetel letiʼ juzgartik le máakoʼoboʼ.+ U kʼaabaʼ kaʼach u hijoeʼ Jotán.+
6 Tuláakal u maasil baʼaloʼob úuch ichil u kuxtal Azarías,+ tuláakal le baʼaloʼob tu beetoʼ, ¿maʼ wa tiʼ tsʼíibtaʼan tu libroil u tsikbalil u kuxtal le reyoʼob yanchajoʼob Judáoʼ?
7 Azaríaseʼ kíimeʼ* ka muʼuk teʼ tuʼux mukaʼan u yúuchben láakʼtsiloʼob+ teʼ tu Kaajal Davidoʼ. Jotán, u hijo túuneʼ, káaj u beetik u reyil tu lugar.
8 Treintiocho años káajak u reinar Azarías+ u reyil Judá, ka káaj u beetik u reyil Zacarías,+ u hijo Jeroboán. Zacaríaseʼ reinarnaj yóokʼol Israel desde tu kaajil Samaria, yéetel seis meses xáanchaj táan u reinar.
9 Letiʼeʼ tu beetaj baʼax kʼaas tu táan Jéeoba jeʼex úuchik u beetik u yúuchben láakʼtsiloʼoboʼ. Seguernaj u beetik le baʼaloʼob kʼaastak túulchʼintaʼab u beet u kaajil Israel tumen Jeroboán u hijo Nebatoʼ.+
10 Salum, u hijo Jabés túuneʼ, tu traicionarteʼ ka tu kíimsaj+ tu kaajil Ibleam.+ Le ka tsʼoʼok u kíimskeʼ tu beetuba reyil tu lugar.
11 Tuláakal u maasil baʼaloʼob úuch ichil u kuxtal Zacaríasoʼ tiʼ tsʼíibtaʼan tu libroil u tsikbalil u kuxtal le reyoʼob yanchajoʼob Israeloʼ.
12 Bey béeychajik le baʼax u yaʼalmaj Jéeoba tiʼ Jehúoʼ: «Tu trono Israeleʼ yaan u kutal a hijo,+ a wáabil, a kaʼa áabil yéetel a óox áabil».+ Lelaʼ jach bey úuchikoʼ.
13 Treintinueve años káajak u beetik u reyil Uzías+ tu kaajil Judá, ka káaj u beetik u reyil Salum u hijo Jabés. Salumeʼ junpʼéel túulis mes xáanchaj táan u reinar tu kaajil Samaria.
14 Teʼ kʼiinoʼob jeʼeloʼ, Menaem u hijo Gadíe’, lukʼ tu kaajil Tirzáeʼ+ ka bin tu kaajil Samaria, teʼeloʼ tiʼ tu kíimsaj Salum+ u hijo Jabesiʼ. Le ka tsʼoʼok u kíimskeʼ tu beetuba reyil tu lugar.
15 Tuláakal u maasil baʼaloʼob úuch ichil u kuxtal Salumoʼ bey xan le bix úuchik u muchʼkuba yéetel uláakʼ máakoʼob utiaʼal u traicionarkoʼob le reyoʼ, tiʼ tsʼíibtaʼan tu libroil u tsikbalil u kuxtal le reyoʼob yanchajoʼob Israeloʼ.
16 Teʼ kʼiinoʼob jeʼeloʼ Menaemeʼ lukʼ tu kaajil Tirzáeʼ ka bin u xuʼuls tiʼ Tifsa, tiʼ le máaxoʼob kajaʼanoʼob teʼeloʼ bey xan tiʼ le yanoʼob ichil u territoriooʼ. Letiʼeʼ tu beetaj beyoʼ tumen maʼ jeʼekʼabtaʼab u joonajil le kaaj utiaʼal ka ookkoʼ. Tu xuʼulsaj tiʼ Tifsa yéetel tu bujaj le koʼoleloʼob embarazadaʼoboʼ.
17 Treintinueve años káajak u beetik u reyil Azarías tu kaajil Judá, ka káaj u beetik u reyil Menaem, u hijo Gadí, yóokʼol u kaajil Israel. Menaemeʼ diez años xáanchaj táan u reinar tu kaajil Samaria.
18 Letiʼeʼ seguernaj u beetik baʼax kʼaas tu táan Jéeoba. Ichil tuláakal u kuxtaleʼ maʼ xuʼul u beetik le baʼaloʼob kʼaastak túulchʼintaʼab u beet u kaajil Israel+ tumen Jeroboán u hijo Nebatoʼ.
19 Juntéenjeakeʼ, Pul+ u reyil Asiriaeʼ, taal tu contra u luʼumil Israel. Menaem túuneʼ tu tsʼáaj 34 toneladas yéetel 200 kilos* plata tiʼ Pul utiaʼal u chaʼik u maas antal u poder yóokʼol le reinooʼ.+
20 Menaemeʼ tu muchʼkíintaj le plataoʼ. Lelaʼ tu kʼáataj tiʼ le ayikʼal máakoʼob yanoʼob Israeloʼ, máakoʼob jach kʼaj óolaʼanoʼob.+ Tu chʼaʼajeʼ ka tu tsʼáaj tiʼ u reyil Asiria. Tu tsʼáaj 570 gramos* plata yoʼolal cada juntúul máak. U reyil Asiria túuneʼ lukʼ teʼeloʼ ka bini.
21 Tuláakal u maasil baʼaloʼob úuch ichil u kuxtal Menaem+ yéetel tuláakal le baʼaloʼob tu beetoʼ, ¿maʼ wa tiʼ tsʼíibtaʼan tu libroil u tsikbalil u kuxtal le reyoʼob yanchajoʼob Israeloʼ?
22 Menaemeʼ kíimeʼ* ka muʼuki. Pekaías, u hijo túuneʼ, káaj u beetik u reyil tu lugar.
23 Cincuenta años káajak u beetik u reyil Azarías tu kaajil Judá, ka káaj u beetik u reyil Pekaías u hijo Menaem tu yóokʼol Israel desde tu kaajil Samaria. Letiʼeʼ dos años xáanchaj táan u reinar.
24 Pekaíaseʼ seguernaj u beetik baʼax kʼaas tu táan Jéeoba. Seguernaj u beetik le baʼaloʼob kʼaastak túulchʼintaʼab u beet u kaajil Israel+ tumen Jeroboán u hijo Nebatoʼ.
25 Péka+ u hijo Remalíaseʼ juntúul soldado áantik kaʼach rey Pekaías, le soldadoaʼ tu traicionartaj le reyoʼ ka tu kíimsaj tu kaajil Samaria teʼ torre yaan tu yotoch* le reyoʼ. Teʼeloʼ tiʼ xan tu kíimsaj Argob yéetel Ariejiʼ. Tu yiknal Pékaeʼ yaan kaʼach 50 máakoʼob ku taaloʼob tiʼ u kaajil Galaad. Le ka tsʼoʼok u kíimsik Pekaíaseʼ, Pékaeʼ tu beetuba reyil tu lugar.
26 Tuláakal u maasil baʼaloʼob úuch ichil u kuxtal Pekaías yéetel tuláakal le baʼax tu beetoʼ tiʼ tsʼíibtaʼan tu libroil u tsikbalil u kuxtal le reyoʼob yanchajoʼob Israeloʼ.
27 Cincuentidós años káajak u beetik u reyil Azarías tu kaajil Judá, ka káaj u beetik u reyil Péka+ u hijo Remalías tu yóokʼol Israel desde tu kaajil Samaria. Letiʼeʼ 20 años xáanchaj táan u reinar.
28 Pékaeʼ maʼ xuʼul u beetik baʼax kʼaas tu táan Jéeobaiʼ. Seguernaj u beetik le baʼaloʼob kʼaastak túulchʼintaʼab u beet u kaajil Israel+ tumen Jeroboán u hijo Nebatoʼ.
29 Tu kʼiiniloʼob Péka u reyil Israeleʼ, Tiglat-piléser+ u reyil Asiriaeʼ, bineʼ ka tu chʼaʼaj u kaajiloʼob Ijón, Abel-bet-maaká,+ Janoaj, Kedes,+ Azoor, Galaad+ yéetel Galilea, tu chʼaʼaj tuláakal u luʼumil Neftalí.+ Letiʼeʼ tu chʼaʼaj tuláakal u kajnáaliloʼob le kaajoʼobaʼ ka tu bisoʼob Asiria.+
30 Osea,+ u hijo Elaj túuneʼ, tu traicionartaj Péka u hijo Remalíaseʼ ka tu kíimsaj. Le ka tsʼoʼok u kíimskeʼ tu beetuba reyil tu lugar. Lelaʼ úuch 20 años káajak u reinar Jotán+ u hijo Uzías.
31 Tuláakal u maasil baʼaloʼob úuch ichil u kuxtal Péka yéetel tuláakal le baʼax tu beetoʼ tiʼ tsʼíibtaʼan tu libroil u tsikbalil u kuxtal le reyoʼob yanchajoʼob Israeloʼ.
32 Dos años káajak u beetik u reyil Péka u hijo Remalías tu yóokʼol Israel, ka káaj u beetik u reyil Jotán+ u hijo Uzías+ tu yóokʼol Judá.
33 Veinticinco años yaantiʼ ka káaj u beetik u reyil, yéetel 16 años xáanchaj táan u reinar tu kaajil Jerusalén. U kʼaabaʼ u maamaeʼ Jerusá, u hija Sadok.+
34 Jotáneʼ seguernaj u beetik baʼax maʼalob tu táan Jéeoba jeʼex úuchik u beetaʼal tumen Uzías, u papáoʼ.+
35 Kex beyoʼ le kaʼanal lugaroʼob tuʼux ku adorar le kaajoʼ maʼ luʼsaʼaboʼobiʼ yéetel láayliʼ táan kaʼach u kʼubkoʼob sacrificioʼob yéetel láayliʼ táan u beetkoʼob u butsʼilankil u sacrificioʼob teʼ kaʼanal lugaroʼoboʼ.+ Le Joonaj Yaan Maas Kaʼanal yaan tu yotoch Jéeobaoʼ letiʼe rey Jotán beetoʼ.+
36 Tuláakal u maasil baʼaloʼob úuch ichil u kuxtal Jotán, tuláakal le baʼaloʼob tu beetoʼ, ¿maʼ wa tiʼ tsʼíibtaʼan tu libroil u tsikbalil u kuxtal le reyoʼob yanchajoʼob Judáoʼ?
37 Teʼ kʼiinoʼob jeʼeloʼ Jéeobaeʼ tu péeksaj Rezín u reyil Siria bey xan Péka+ u hijo Remalías utiaʼal ka joʼopʼok u atacarkoʼob Judá.+
38 Jotán túuneʼ kíimeʼ* ka muʼuk teʼ tuʼux mukaʼan u yúuchben láakʼtsiloʼob teʼ tu Kaajal Davidoʼ. Acaz, u hijo túuneʼ, káaj u beetik u reyil tu lugar.
Notas
^ Lelaʼ Jeroboán Segundo.
^ U kʼáat u yaʼal «Jéeobaeʼ Tsʼoʼok u Yáantaj». Tiʼ 2 Reyes 15:13; 2 Crónicas 26:1-23; Isaías 6:1 yéetel Zacarías 14:5 ku yaʼalaʼaltiʼ «Uzías».
^ Wa «le palaciooʼ».
^ Ich hebreoeʼ ku yaʼalaʼal kaʼach «jeʼel yéetel u yúuchben láakʼtsiloʼob».
^ Ich hebreoeʼ ku yaʼalaʼal kaʼach «1,000 talentos».
^ Ich hebreoeʼ ku yaʼalaʼal kaʼach «50 siclos».
^ Ich hebreoeʼ ku yaʼalaʼal kaʼach «jeʼel yéetel u yúuchben láakʼtsiloʼob».
^ Wa «palacio».
^ Ich hebreoeʼ ku yaʼalaʼal kaʼach «jeʼel yéetel u yúuchben láakʼtsiloʼob».
