2 Tesalonicenses 1:1-12
1 Le cartaaʼ táan u túuxtaʼal tumen Pablo, Silvano* yéetel Timoteo.+ Utiaʼal le múuchʼulil yaan Tesalónicaoʼ, letiʼobeʼ junmúuchʼ yaniloʼob yéetel Dios le k-Taataoʼ bey xan yéetel Yuumtsil Jesucristo:
2 Ka yanakteʼex le nojoch utsil yéetel le jeetsʼelil ku taal tiʼ Dios le Taataoʼ, bey xan le ku taal tiʼ Yuumtsil Jesucristooʼ.
3 Sukuʼuneʼex, mantatsʼ k-ilik kʼaʼabéet k-tsʼáaik gracias tiʼ Dios ta woʼolaleʼex. Bey unaj k-beetkoʼ tumen a fejeʼexeʼ táan u bin u maas nojochtal. Tsʼoʼoleʼ le yaabilaj ka wuʼuyikeʼex cada juntúul tiʼ teʼex ta baatsileʼexoʼ táan xan u bin u maas nojochtal.+
4 Toʼoneʼ k-tʼaan maʼalob tiʼ teʼex ichil u múuchʼuliloʼob Dios,+ tumen teʼexeʼ chúukaʼan a wóoleʼex yéetel ka weʼeskeʼex yaan a fejeʼex kex táan a sen chʼaʼpachtaʼaleʼex yéetel kex táan a sen muʼyajeʼex.*+
5 Tuláakal lelaʼ ku yeʼesikeʼ Dioseʼ jach toj bix u juzgar, tumen letiʼeʼ ku yilik ka náajmatikeʼex u Reino. Tu yoʼolal le Reinooʼ teʼexeʼ táan a muʼyajeʼex.+
6 Le oʼolal Dioseʼ maʼalob xan ka u beet u muʼyaj le máaxoʼob beetik a muʼyajeʼexoʼ.+
7 Chéen baʼaleʼ teʼex táan a muʼyajeʼexeʼ Dioseʼ yaan u beetik u xuʼulul a muʼyajeʼex junmúuchʼ t-éetel. Lelaʼ yaan u xuʼulul teʼ kʼiin ken chíikpajak Yuumtsil Jesús+ desde teʼ kaʼan yéetel u muʼukʼaʼan ángeloʼob+
8 ichil junpʼéel kʼáakʼ táan u tóochʼbaloʼ. Teʼ kʼiin jeʼeloʼ letiʼeʼ yaan u castigartik tuláakal le máaxoʼob maʼ u kʼaj óoloʼob Diosoʼ bey xan le máaxoʼob maʼ tu tsʼoʼokbeskoʼob le baʼax tsikbaltaʼabtiʼob tu yoʼolal k-Yuumtsil Jesúsoʼ.+
9 Le máakoʼobaʼ yaan u tsʼaʼabaltiʼob baʼax ku náajmatikoʼob, yaan u xuʼulsaʼaltiʼob utiaʼal mantatsʼ.+ Letiʼobeʼ yaan u náachkuntaʼaloʼob tiʼ Yuumtsil bey xan tiʼ u nojoch páajtalil.
10 Lelaʼ yaan u yúuchul teʼ kʼiin ken taalak Yuumtsil yéetel páajtalil junmúuchʼ yéetel le máaxoʼob santoʼoboʼ. Teʼ kʼiin jeʼeloʼ le máaxoʼob yaan u fejoʼoboʼ yaan u jaʼakʼal u yóoloʼob. Teʼexeʼ ta tsʼáaj a fejeʼex tiʼ le baʼax t-tsʼáaj a wojéelteʼexoʼ.
11 Toʼoneʼ k-orar mantatsʼ ta woʼolaleʼex utiaʼal k-aʼalik tiʼ k-Dios láayliʼ jeʼel u páajtal u tsʼáaikteʼex le kuxtal u yaʼalmajteʼexoʼ.+ Letiʼeʼ yéetel le páajtalil yaantiʼoʼ yaan u béeykuntik tuláakal le baʼaloʼob maʼalobtak u kʼáat u beetoʼ, yéetel yaan u beetik u jóokʼol maʼalobil le baʼaxoʼob ka beetkeʼex yoʼolal a fejeʼexoʼ.
12 Bey túunoʼ ta woʼolaleʼexeʼ yaan u alabartaʼal u kʼaabaʼ k-Yuumtsil Jesús. Teʼex xaneʼ yaan a alabartaʼaleʼex tu yoʼolal Yuumtsil. Lelaʼ yaan u béeytal tu yoʼolal u nojoch utsil k-Dios bey xan tu yoʼolal u nojoch utsil Yuumtsil Jesucristo.
