2 Timoteo 3:1-17
3 Chéen baʼaleʼ ojéelteʼ tu tsʼook kʼiinoʼobeʼ+ yaan u yilaʼal yaayaj kʼiinoʼob yéetel istikyaj ken u máansil u kuxtal máak.
2 Tumen le máakoʼoboʼ yaan u kaxtikoʼob chéen u yutsiloʼob, yaan u yaabiltikoʼob taakʼin, yaan u creerkubaʼob, yaan u kaʼantal u yichoʼob, yaan u suuktal u poochʼiloʼob, maʼ ken u yuʼuboʼob u tʼaan u taataʼob, maʼ ken u tsʼáaʼob u diosboʼotikil mix baʼal, yaan u xúumpʼatkoʼob u amigoʼob,*
3 yaan u pʼáatal minaʼan u yaabilajoʼob, junpuliʼ maʼ ken u yóotoʼob u tsʼáaubaʼob de acuerdoil, yaan u yaʼalikoʼob baʼaloʼob maʼ jaajtak tu contra u maasil, maʼ ken u kan u controlartubaʼob, jach yaan u tsʼíiktaloʼob, maʼ ken u yaabiltoʼob baʼax uts,
4 yaan u suutoʼob traicioneroil, yaan u tercotaloʼob, yaan u taaskubaʼob jach nojbaʼalil yéetel tu lugar u yaabiltikoʼob Dioseʼ yaan u yaabiltikoʼob chéen le baʼaloʼob taasik kiʼimak óolal tiʼoboʼ.
5 Tsʼoʼoleʼ kex ka u yaʼaloʼob jach u tsʼaamaj u yóoloʼob u adorartoʼob Dioseʼ yéetel u kuxtaloʼobeʼ ku yeʼeskoʼob maʼ beyiʼ.+ Náachkuntaba tiʼ le máakoʼobaʼ.
6 Ichiloʼobeʼ yaan u yantal máakoʼob jach u yojloʼob tuus ku binoʼob tu yotoch máak utiaʼal ka tuusnakoʼob. Letiʼobeʼ ku tuskoʼob le koʼoleloʼob maʼ muʼukʼaʼan u fejoʼoboʼ, koʼoleloʼob chuupoʼob yéetel kʼeban, ku chaʼik u controlartaʼaloʼob tumen u tsʼíibolaloʼob.
7 Le koʼoleloʼobaʼ kex mantatsʼ táan u kaanbaloʼobeʼ maʼ tu páajtal u kʼaj óoltikoʼob tubeel le jaajoʼ.
8 Le máakoʼobaʼ táan u tsʼáaikubaʼob tu contra le jaajoʼ jach jeʼex úuchik u tsʼáaikuba Janes yéetel Jambres tu contra Moiséseʼ. Tsʼoʼoleʼ jach kʼaschajaʼan u tuukuloʼob yéetel maʼ kʼamaʼanoʼob tumen Diosiʼ, tumen maʼ táan u kuxtaloʼob jeʼex kaʼansaʼabik tumen Cristoeʼ.
9 Chéen baʼaleʼ maʼ kun páajtal u seguer u tsʼáaikubaʼob tu contra le jaajoʼ tumen tuláakal máak ken u yil jach minaʼan u naʼatoʼob, yaan u yúuchultiʼob jeʼex úuchik tiʼ le kaʼatúul máakoʼoboʼ.+
10 Chéen baʼaleʼ techeʼ jach tsʼoʼok a chʼenxikintik in kaʼansaj, jach a wojel bix kuxliken,+ baʼax in chʼaʼtukultmaj in beetik, bix le fe yaantenoʼ, bix le paciencia kin weʼesikoʼ, bix le yaabilaj yaantenoʼ yéetel bix u chúukpajal in wóol muʼyaj.
11 Tsʼoʼoleʼ a wojel xan baʼaxoʼob tin muʼyajtaj Antioquía,+ Iconio+ yéetel Listra.+ Teneʼ tin muʼyajtaj chʼaʼpachtajil teʼ kaajoʼobaʼ chéen baʼaleʼ Yuumtsileʼ tu salvarten.+
12 U jaajileʼ tuláakal le máaxoʼob u kʼáatoʼob u tsʼáaʼob ichil u kuxtaloʼob baʼax tu kaʼansaj Cristo yéetel u adorartoʼob Dioseʼ yaan xan u chʼaʼpachtaʼaloʼob.+
13 Chéen baʼaleʼ le kʼasaʼan máakoʼob bey xan le máakoʼob yaanal máax u taaskubaʼoboʼ yaan u bin u maas kʼastaloʼob táan u tuskoʼob uláakʼ máakoʼob yéetel táan u tuʼusloʼob xan.+
14 Chéen baʼaleʼ techeʼ maʼ u xuʼulul a tsʼáaik a wóol tiʼ le baʼaxoʼob ta kanaj yéetel áantaʼabech utiaʼal ka a creertoʼ,+ tumen a wojel máaxoʼob kaʼanstech.
15 Tsʼoʼoleʼ desde ta chichnil+ ta kʼaj óoltaj le u tʼaan Dios+ jeʼel u tsʼáaiktech naʼat utiaʼal ka a salvartaba tu yoʼolal le fe ka tsʼáaik tiʼ Cristo Jesúsoʼ.+
16 Tuláakal Tsʼíibeʼ* tiʼ Dios u taal tumen letiʼ tsʼáa tu tuukul le máakoʼob utiaʼal ka u tsʼíibtoʼoboʼ.+ Le oʼolal le baʼax ku yaʼalikoʼ maʼalob utiaʼal kaʼansaj,+ utiaʼal u yaʼalaʼal u nuʼuk tiʼ máak, utiaʼal u tojkíintaʼal u kuxtal máak bey xan utiaʼal u yúuchul tsolnuʼuk jeʼex unajeʼ.+
17 Beyoʼ le máax meyajtik Diosoʼ yaan u kanik yéetel yaan u páajtal u beetik jach tubeel tuláakal maʼalob meyaj.
Notas
^ Wa «yaan u xúumpʼatkoʼob Dios».
^ Lelaʼ táan u tʼaan tiʼ le tsʼíiboʼob oksaʼaboʼob ichil le Bibliaoʼ.
