2 Timoteo 4:1-22
4 Cristo Jesúseʼ yaan u juzgartik+ le kuxaʼanoʼob yéetel le kimenoʼob+ le kéen u chíikbesuba+ yéetel le kéen kʼuchuk tu Reinooʼ.+ Tu táan letiʼ yéetel tu táan Dioseʼ kin kʼubéentiktech ka a beet lelaʼ:
2 tsikbalt u tʼaan Dios,+ jach tsʼáa a wóol a beet tiʼ maʼalob kʼiinoʼob bey xan tiʼ yaayaj kʼiinoʼob, tsol u nuʼuk tiʼ u maasil,+ tojkíint u beeloʼob, líiʼs u yóoloʼob, beet yéetel paciencia yéetel kaʼansajnen tubeel.+
3 Tumen yaan u kʼuchul u kʼiinileʼ le máakoʼoboʼ maʼ ken u yóot u yuʼuboʼob le maʼalob kaʼansajoʼ,+ baʼaxeʼ jeʼex u tsʼíiboltkoʼobeʼ yaan u kaxtikoʼob máakoʼob* jeʼel u yaʼaliktiʼob chéen baʼax u kʼáat u yuʼuboʼobeʼ.+
4 Yaan u xuʼulul u yuʼubikoʼob le u jaajil kaʼansajoʼ yéetel yaan u chʼenxikintikoʼob le baʼaloʼob maʼ jaajtak ku tsikbaltaʼaloʼ.
5 Chéen baʼaleʼ techeʼ eʼes maʼalob a tuukul tiʼ tuláakal baʼal, chúukpajak a wóol a muʼyajt le baʼaxoʼob ku yúuchultechoʼ,+ maʼ u xuʼulul a tsikbaltik le maʼalob baʼaloʼob ken u beet Diosoʼ yéetel beet tubeel le meyaj tsʼaʼantechoʼ.+
6 Beoraaʼ teneʼ táan in weʼekel bey jeʼex le vino ku kʼuʼubul teʼ altaroʼ,+ u kʼiinil in jáalkʼabtaʼaleʼ+ jach tsʼoʼok u náatsʼal.
7 Tsʼoʼok in baʼateʼel tu yoʼolal le fejoʼ,+ tsʼoʼok in wáalkabtik le bej tak tu xuuloʼ,+ tsʼoʼok in kuxtal jeʼex tu kaʼansaj Cristoeʼ.
8 Desde bejlaʼeʼ tsʼoʼok u líiʼsaʼal u coronail le justicia kun tsʼaabilten kéen kʼuchuk le kʼiin aʼalaʼanoʼ.+ Tsʼoʼok u líiʼsaʼal tumen Yuumtsil,+ le juez ku juzgar jeʼex unajoʼ.+ Chéen baʼaleʼ maʼ chéen tiʼ teen ken u tsʼáaiʼ tak tiʼ tuláakal le máaxoʼob jach ku tsʼíiboltkoʼob u chíikpajloʼ.
9 Timoteo, beet tuláakal le ku páajtal utiaʼal ka séeb taalakech tin wiknal.
10 Tumen Demaseʼ+ úuchik u maas yaabiltik le yóokʼol kaabaʼ tu xúumpʼatteneʼ ka bin Tesalónica, Crescenteeʼ bin Galacia, Titoeʼ bin Dalmacia.
11 Chéen Lucas pʼaatal tin wiknal. Le kéen taalakecheʼ taas xan Marcos ta wéetel, tumen jach jeʼel u yáantken in tsikbalt u tʼaan Dioseʼ.
12 Tíquicoeʼ+ tsʼoʼok in túuxtik Éfeso.
13 Le kéen taalakecheʼ taas le u nookʼil keʼel tin pʼataj tu kaajil Troas tu yiknal Carpoeʼ, taas xan le rolloʼoboʼ, maases le tsʼíiboʼob beetaʼanoʼob tiʼ kʼéeweloʼ.
14 Alejandro le máax ku meyajtik cobreoʼ jach tu beetaj in muʼyaj. Jéeoba kun boʼotiktiʼ le baʼaxoʼob tu beetajtenoʼ.+
15 Teech xaneʼ unaj a kanáantkaba tiʼ letiʼ tumen jach tu tsʼáajuba tu contra le meyaj k-beetkoʼ.
16 Le ka yáax tʼaanajen utiaʼal in defenderkinbaoʼ mix máak taal tin wiknal, baʼaxeʼ tuláakloʼob tu xúumpʼattenoʼob. Kex beyoʼ maʼ unaj u tsʼaʼabal u culpaʼob yoʼolal leloʼ.
17 Yuumtsileʼ waʼalaj naatsʼ tiʼ teneʼ ka tu tsʼáajten páajtalil, utiaʼal beyoʼ tin woʼolaleʼ ka páajchajak u tsʼaʼabal ojéeltbil tubeel u tʼaan Dios yéetel utiaʼal ka uʼuyaʼak tiʼ tuláakal luʼumiloʼob.+ Letiʼeʼ tu token tu chiʼ le leónoʼ.+
18 Yuumtsileʼ yaan u kanáantken tiʼ tuláakal baʼal kʼaas yéetel yaan u salvarken utiaʼal ka u bisen tu Reino yaan teʼ kaʼanoʼ.+ Letiʼ unaj u alabartaʼal utiaʼal kʼiinoʼob minaʼan u xuul. Ka béeyak.*
19 Tsʼáa in saludos tiʼ Prisca*+ yéetel tiʼ Áquila bey xan tiʼ le máaxoʼob yanoʼob tu yotoch Onesíforooʼ.+
20 Erastoeʼ+ pʼáat Corinto, chéen baʼaleʼ Trófimoeʼ+ kʼojaʼan le ka tin pʼataj tu kaajil Miletooʼ.
21 Beet tuláakal le ku páajtal utiaʼal a kʼuchul táanil tiʼ u káajal u kʼiinil keʼel.
Ku túuxtaʼaltech saludos tumen Eubulo bey xan tumen Pudente, Lino, Claudia yéetel tumen tuláakal le u maasil sukuʼunoʼoboʼ.
22 Yuumtsil ka yanak ta wéetel tu yoʼolal le jatsʼuts modos ka weʼesikoʼ. Ka yanak xan u nojoch utsil ta wéeteleʼex.
