Eclesiastés 8:1-17
8 ¿Máax jeʼel u páajtal u ketkuba yéetel juntúul máax yaan u naʼateʼ? ¿Máax u yojel bix jeʼel u yutskíintaʼal junpʼéel problemaeʼ? Le naʼat yaan tiʼ máakoʼ letiʼe baʼax beetik u chíikpajal kiʼimak u yóoloʼ yéetel letiʼe baʼax xan beetik maʼ u tsʼíiktal u yichoʼ.
2 Teneʼ kin waʼalik: «Beet baʼax ku yaʼalik le reyoʼ,+ tumen a beetmaj junpʼéel juramento* tu táan Dios.+
3 Maʼ a lukʼul tu séebaʼanil tu táan le reyoʼ.+ Maʼ a táakpajal tiʼ junpʼéel baʼax maʼ maʼalobiʼ,+ tumen letiʼeʼ jeʼel u páajtal u beetik jeʼel baʼaxak u kʼáateʼ.
4 Le baʼax ku yaʼalik juntúul reyoʼ letiʼe baʼax unaj u beetaʼaloʼ.+ ¿Máax jeʼel u páajtal u yaʼaliktiʼ, ‹¿Baʼax ka beetik?›?».
5 Le máax ku beetik baʼax ku yaʼalik le leyoʼ maʼ kun úuchul loob tiʼ,+ le máax yaan u naʼatoʼ yaan u yojéeltik baʼax kʼiin unaj u beetik wa baʼax yéetel bix unaj u beetik.+
6 Tumen yaʼab problemas ku yantal tiʼ máakeʼ, tuláakal baʼaleʼ unaj u beetik tu kʼiinil yéetel jeʼex unajeʼ.+
7 Tumen mix máak u yojel baʼax kun úuchleʼ, ¿máax jeʼel u páajtal u yaʼalik bix kun úuchleʼ?
8 Jeʼex mix máak jeʼel u páajtal u controlartik u muukʼil le kuxtaloʼ mix máak xan jeʼel u páajtal u controlartik u kʼiinil le kíimiloʼ.+ Jeʼex tu kʼiinil guerra maʼ tu túuxtaʼal juntúul soldado tu yotocheʼ, le baʼax kʼaas xanoʼ maʼ ken u chaʼa u púutsʼul le máaxoʼob suuk u beetik u kʼasaʼaniloʼoboʼ.*
9 Tuláakal lelaʼ tin tsʼáaj cuenta le ka chʼíik in puksiʼikʼal u jach il tuláakal le baʼaxoʼob tsʼoʼok u beetaʼal way yóokʼol kaabeʼ. Máakeʼ mantatsʼ ku pechʼ óoltik u yéet máakil utiaʼal u beetik kʼaas tiʼ.*+
10 Teneʼ tin wilaj u muʼukul le kʼasaʼan máakoʼoboʼ, le máaxoʼob ku yookloʼob yéetel ku jóokʼloʼob kaʼach teʼ lugar santooʼ, chéen baʼaleʼ séebaʼan úuchik u tuʼubsaʼaloʼob teʼ kaaj tuʼux tu beetaj u kʼasaʼaniloʼoboʼ.+ Leloʼ chéen kunel xan.
11 Wa maʼ tu jáan castigartaʼal le máax ku beetik baʼax kʼaasoʼ,+ ku pʼáatal maʼ sajak u puksiʼikʼal máak u beet baʼax kʼaasiʼ.+
12 Juntúul máax ku kʼebantal cien u téeneleʼ jeʼel u kuxtal yaʼab añoseʼ, kex beyoʼ kin tsʼáaik cuentaeʼ maas yaan u bin utsil tiʼ le máaxoʼob ku respetarkoʼob Diosoʼ, tumen tu jaajil u yóoloʼob ku respetarkoʼob.+
13 Pero le kʼasaʼan máak maʼatech u respetartik Diosoʼ maʼ kun bin utsil tiʼ,+ yéetel maʼ kun páajtal u maas yaʼabkuntik le u kʼiiniloʼob u kuxtal ku kʼáatmáan jeʼex junpʼéel boʼoyoʼ.+
14 Yaan junpʼéel baʼax jach yaj ku yúuchul way luʼumeʼ: yaan utsul máakoʼob ku tratartaʼaloʼob bey kʼasaʼan máakoʼobeʼ,+ yéetel yaan kʼasaʼan máakoʼob ku tratartaʼaloʼob bey utsul máakoʼobeʼ.+ Teneʼ kin waʼalikeʼ, leloʼ chéen kunel xan.
15 Teen túuneʼ tin waʼalajeʼ maas maʼalob le kiʼimak óolaloʼ.+ Tumen le baʼax maas maʼalob jeʼel u beetik máak way luʼumeʼ letiʼe u jaantik, u yukʼik yéetel u kiʼimakkúuntik u yóol yéetel le baʼaxoʼob yaantiʼoʼ. Lelaʼ letiʼe baʼax unaj u beetik máak mientras u tsʼaamaj u yóol meyaj way yóokʼol kaabeʼ, ichil tuláakal le u kʼiiniloʼob u kuxtal+ tsʼaʼantiʼ tumen u jaajil Diosoʼ.
16 Teneʼ tin chʼaʼtuklaj u yantal in naʼat bey xan in wilik tuláakal le baʼaxoʼob ku yúuchul* way luʼumeʼ,+ kex ka pʼáatak maʼ in wenel de kʼiin mix de áakʼab.*
17 Teen túuneʼ tin jach ilaj tuláakal baʼax ku beetik u jaajil Dios, ka tin tsʼáaj cuentaeʼ máakeʼ maʼ tu páajtal u kʼuchul u naʼat tuláakal le baʼax ku yúuchul way yóokʼol kaabeʼ.+ Kex jeʼel baʼaxak ka u beet máakeʼ maʼ tu páajtal u naʼatik. Kex ka u yaʼal máak jach yaan u naʼat yéetel jeʼel u páajtal u naʼatikeʼ, u jaajileʼ maʼ tu páajtal u naʼatik.+
Notas
^ Ilawil «Juramento», página 2567.
^ Uláakʼ bix u traducirtaʼaleʼ «le kʼasaʼan máakoʼ maʼ kun salvarbil tumen u kʼasaʼanil».
^ Wa «loob tiʼ».
^ Wa «beetaʼal».
^ Uláakʼ bix u traducirtaʼaleʼ «le máakoʼoboʼ maʼatech u weenloʼob mix de kʼiin mix de áakʼab».
