Gálatas 3:1-29
-
U beetaʼal wa baʼax tu yoʼolal fe wa tu yoʼolal Ley (1-14)
-
Máax toj u kuxtaleʼ yoʼolal u fejeʼ yaan u seguer u kuxtal (11)
-
-
Maʼ tu yoʼolal Ley tsʼaʼab le promesa tiʼ Abrahánoʼ (15-18)
-
U chʼiʼibal Abraháneʼ Cristo (16)
-
-
Baʼax oʼolal tsʼaʼab le Leyoʼ (19-25)
-
Tumen yaan u fejoʼobeʼ u paalaloʼob Dios (26-29)
-
U chʼiʼibal Abraháneʼ u tiaʼaloʼob Cristo (29)
-
3 Galaciaileʼex, ¡jach túun minaʼan a naʼateʼex! ¿Máax tuseʼex?+ Si tiʼ teʼexeʼ tsoʼol tubeel baʼax oʼolal clavartaʼab Jesucristo teʼ cheʼoʼ.+
2 Teneʼ chéen taak in kʼáatikteʼex lelaʼ: ¿Ta kʼameʼex wa espíritu santo* úuchik a beetkeʼex le baʼax ku yaʼalik le leyoʼ, wa letiʼe úuchik a tsʼáaik a fejeʼex tiʼ le baʼax ta wuʼuyeʼexoʼ?+
3 ¿Jach wa minaʼan a naʼateʼex? Wa tsʼoʼok a káajsik a kuxtaleʼex jeʼex u nuʼuktik u espíritu santo Dioseʼ, ¿baʼaxten túun beoraaʼ táan a chaʼik a nuʼuktaʼaleʼex tumen u tuukul luʼumkabil máakoʼob?+
4 ¿Chéen wa kunel úuchik a sen muʼyajeʼex?* ¡Jach in waʼalikeʼ maʼ chéen kuneliʼ!
5 Le máax ku tsʼáaikteʼex espíritu santo yéetel ku beetik milagroʼob+ ichileʼexoʼ, ¿ku beetik wa tumen ka tsʼoʼokbeskeʼex baʼax ku yaʼalik le leyoʼ, wa tumen ka tsʼáaik a fejeʼex tiʼ le baʼax ta wuʼuyeʼexoʼ?
6 Jeʼex Abraháneʼ, letiʼeʼ «tu tsʼáaj u fe tiʼ Jéeobaeʼ* ka ilaʼab bey juntúul máak toj u kuxtaleʼ».+
7 Jach in waʼalikeʼ teʼexeʼ a wojleʼex u paalaloʼob Abraháneʼ letiʼe máaxoʼob mantatsʼ ku yeʼeskoʼob yaan u fejoʼoboʼ.+
8 Desde úuchjeakileʼ Dioseʼ tu yaʼalaj ka tsʼíibtaʼakeʼ letiʼeʼ yaan u yaʼalik toj u kuxtal le j-táanxel luʼumiloʼob tu yoʼolal u fejoʼoboʼ. Letiʼeʼ tu tsʼáaj u yojéelt Abrahán le baʼaloʼob maʼalobtak ku taal u kʼiinil u yúuchloʼ, tu yaʼalajtiʼ: «Ta woʼolaleʼ yaan u bendecirtaʼal tuláakal le naciónoʼoboʼ».+
9 Tu yoʼolal lelaʼ, le máaxoʼob yaan u fejoʼoboʼ ku bendecirtaʼaloʼob junmúuchʼ yéetel Abrahán, le máax yanchaj u fejoʼ.+
10 Tuláakal le máaxoʼob u kʼubmaj u yóoloʼob chéen tiʼ le baʼax ku yaʼalik le leyoʼ, maldecirtaʼanoʼob; tumen tsʼíibtaʼan: «Maldecirtaʼak le máax ku xuʼulul u beetik tuláakal baʼax ku yaʼalik u rolloil le Leyoʼ».+
11 Tsʼoʼoleʼ jeʼel u páajtal k-ilkeʼ mix máak ku yaʼalaʼal toj u kuxtal tu táan Dios chéen ikil u tsʼoʼokbesik le leyoʼ,+ tumen «le máax toj u kuxtaloʼ tu yoʼolal u fejeʼ yaan u seguer u kuxtal».+
12 Chéen baʼaleʼ le Leyoʼ maʼ tu yaʼalik wa kʼaʼabéet u yantal fe tiʼ máak, baʼaxeʼ ku yaʼalik: «Le máax kun beetik le baʼaloʼobaʼ yaan u kuxtal».+
13 Cristoeʼ le ka tu manoʼoneʼ+ tu tokoʼon+ tiʼ u maldiciónil le Leyoʼ, maldecirtaʼab letiʼ tu lugar k-maldecirtaʼal toʼon, tumen tsʼíibtaʼan: «Maldecirtaʼan le máax ku chʼuykíintaʼal tiʼ cheʼoʼ».+
14 Jeʼex aʼalaʼabik tiʼ Abraháneʼ lelaʼ úuch utiaʼal ka bendecirtaʼak le luʼumiloʼob tu yoʼolal Jesucristooʼ,+ utiaʼal beyoʼ ka k-kʼam le espíritu santo+ tu yoʼolal k-fejoʼ.
15 Sukuʼuneʼex, nikaʼaj in waʼalteʼex junpʼéel baʼal suuk u yúuchul ichil máakoʼob: le kéen tsʼoʼokok u jéetsʼel junpʼéel acuerdoeʼ, kex chéen máak ka u beete, mix máak jeʼel u páajtal u jubikeʼ mix u yoksik uláakʼ baʼaloʼob ichil.
16 Bey túunoʼ le promesaʼoboʼ beetaʼab tiʼ Abrahán yéetel tiʼ u chʼiʼibal.*+ Maʼ aʼalaʼab wa «tiʼ a chʼiʼibaloʼob», bey táan u tʼaan tiʼ yaʼab chʼiʼibaloʼobeʼ. Baʼaxeʼ tu yaʼalaj «tiʼ a chʼiʼibal», chéen tʼaanaj tiʼ junpʼéel chʼiʼibal, leloʼ Cristo.+
17 Kin waʼalikteʼex xan lelaʼ: le Ley tsʼaʼab 430 años tsʼoʼokok u yaʼalaʼal leloʼ+ maʼ tu jubik le pacto u yáax beetmaj Dios yéetel Abrahán utiaʼal ka pʼáatak maʼ u béeytal le promesaoʼ.
18 Tumen wa ku tsʼaʼabal le herencia chéen tu yoʼolal le leyoʼ u kʼáat u yaʼaleʼ maʼ táan u tsʼaʼabal tu yoʼolal junpʼéel promesaiʼ. Chéen baʼaleʼ Dioseʼ yéetel u yutsil u puksiʼikʼal tu tsʼáaj le herencia tiʼ Abrahán tu yoʼolal junpʼéel promesaoʼ.+
19 ¿Baʼaxten túun tsʼaʼab le Leyoʼ? Tsʼaʼab utiaʼal ka u chíikbes u kʼeban wíinik+ tak ken kʼuchuk le chʼiʼibal,+ le máax tiʼ aʼalaʼan u tsʼaʼabal le herenciaoʼ. Le Leyaʼ tsʼaʼab kʼaj óoltbil tumen ángeloʼob+ yéetel u kʼab juntúul mediador.*+
20 Chéen baʼaleʼ maʼ kʼaʼabéet juntúul mediador wa chéen juntúul máax beet junpʼéel promesaiʼ, bey u yúuchul xan yéetel Diosoʼ tumen chéen letiʼ beet le promesaoʼ.
21 ¿Tiaʼan wa túun le Ley tu contra le promesaʼob u beetmaj Diosoʼ? ¡Jach junpuliʼ maʼ! Tumen wa ka tsʼaʼabak kaʼach junpʼéel ley ku páajtal u tsʼáaik kuxtal tiʼ máakeʼ jeʼel u páajtal kaʼach u yaʼalaʼal toj u kuxtal máak ikil u tsʼoʼokbesik le leyoʼ.
22 Chéen baʼaleʼ u Tʼaan Dioseʼ ku yeʼesikeʼ tuláakal máakeʼ kʼubaʼan tu kʼab le kʼebanoʼ, utiaʼal beyoʼ le máaxoʼob yaan u fejoʼoboʼ ka u kʼamoʼob le baʼax aʼalaʼan u tsʼaʼabal tiʼ le máaxoʼob ku tsʼáaik u fejoʼob tiʼ Jesucristooʼ.
23 Chéen baʼaleʼ le maʼ k-tsʼáa kaʼach k-fe tiʼ Cristoeʼ kanáantaʼanoʼon tumen le leyoʼ yéetel kʼubaʼanoʼon kaʼach yáanal u páajtalil. Lelaʼ úuch le táan k-páaʼtik u kʼuchul u kʼiinil k-tsʼáaik k-fe tiʼ le máax aʼalaʼanoʼ.+
24 Bey túunoʼ le Leyoʼ pʼáat bey juntúul máax ku kanáantkoʼon yéetel ku biskoʼon tu yiknal Cristo+ utiaʼal ka aʼalaʼak toj k-kuxtal yoʼolal k-fejeʼ.+
25 Chéen baʼaleʼ beora tsʼoʼok k-tsʼáaik k-fe tiʼ Cristoaʼ+ maʼ kʼubaʼanoʼon tiʼ mix máak utiaʼal ka kanáantaʼakoʼoniʼ.+
26 U jaajileʼ tuláakleʼexeʼ u paalaleʼex Dios+ tu yoʼolal a fejeʼex tiʼ Cristo Jesús.+
27 Tumen tuláakleʼex, máaxeʼex tsʼaʼab a wokjaʼex yéetel junmúuchʼ yanileʼex yéetel Cristoeʼ, tsʼoʼok a kuxtaleʼex jeʼex Cristoeʼ.*+
28 Tumen tuláakleʼexeʼ juntúuliliʼex junmúuchʼ yéetel Cristo Jesús,+ minaʼan judío mix griego,+ minaʼan esclavo mix wa maʼ esclavoiʼ,+ minaʼan xiib mix koʼolel.+
29 Tsʼoʼoleʼ wa u tiaʼaleʼex Cristoeʼ u jaajileʼ tiʼ u chʼiʼibal Abrahán a taaleʼex,+ yéetel yaan a tiaʼalintkeʼex+ le baʼax aʼalaʼan u tsʼaʼabaloʼ.+
Notas
^ Ilawil «Espíritu santo», página 2562.
^ Wa «a sen sufrireʼex?».
^ Ilawil página 2566.
^ Wa «descendencia».
^ Ilawil página 2571.
^ Ich griegoeʼ ku yaʼalaʼal kaʼach «tsʼoʼok a búukbeskabaʼex yéetel Cristo».
