Gálatas 6:1-18
6 Sukuʼuneʼex, wa juntúul máak ka wilkeʼex táan u jóokʼol tiʼ le bej yéetel maʼ u tsʼáa cuentaoʼ, teʼex le yaanteʼex le jatsʼuts modos ku taal tiʼ Diosoʼ, ilawil a tojkíintikeʼex u beel yéetel jeetsʼel óolal.+ Pero cada juntúuleʼ u kanáantuba,+ tumen bik táabsaʼak xan.+
2 Maʼ u xuʼulul a paklan áantkabaʼex utiaʼal a biskeʼex a kuucheʼex,+ tumen beyoʼ táan a tsʼoʼokbeskeʼex u ley Cristo.+
3 Tumen wa yaan máax ku taaskuba nojbaʼalil kex minaʼan baʼax oʼolaleʼ+ táan u tuskuba tu juunal.
4 Chéen baʼaleʼ cada juntúuleʼ u xíixt baʼax ku beetik+ yéetel maʼ unaj u ketik yéetel le baʼax ku beetik u yéet máakiloʼ.+ Beyoʼ yaan u kiʼimaktal u yóol yoʼolal le baʼaxoʼob tsʼoʼok u beetik letiʼoʼ.
5 Tumen cada juntúuleʼ yaan u bisik u kuuch.+
6 Tsʼoʼoleʼ jeʼel máaxak táan u kaʼansaʼal u tʼaan Dios tiʼeʼ unaj u compartirtik tuláakal baʼax maʼalob yéetel le máax kaʼansikoʼ.+
7 Maʼ a tuskabaʼex: mix máak jeʼel u páajtal u burlarkuba tiʼ Dioseʼ. Tumen jeʼel baʼaxak ka u pakʼ máakeʼ le xan ken u joche.+
8 Tsʼoʼoleʼ le máax chéen ku tuukul tiʼ u kʼeban wíinklil le kéen paakʼalnakeʼ yaan u jochik xuʼulsajil tiʼ u kʼeban wíinklil. Chéen baʼaleʼ le máax ku tuukul tiʼ u espíritu santo Dios le kéen paakʼalnakeʼ yaan u jochik kuxtal minaʼan u xuul tiʼ le espíritu santooʼ.+
9 Bey túunoʼ maʼ u xuʼulul k-beetik baʼax maʼalob, tumen wa maʼ t-kaʼanleʼ yaan k-jooch jach tu kʼiinil.+
10 Le oʼolaleʼ mientras ku páajtal k-beetkeʼ, koʼoneʼex beetik baʼax maʼalob utiaʼal k-áantik tuláakal máak, chéen baʼaleʼ maases tiʼ le sukuʼunoʼob yéetel le kiikoʼob teʼ múuchʼuliloʼ.
11 Lelaʼ jach teen tsʼíibt yéetel in kʼaboʼob. Ilawileʼex bukaʼaj nuuktakil le letraʼob úuchik in tsʼíib tiʼ teʼexoʼ.
12 Tuláakal le máaxoʼob táan u obligarkeʼexoʼob a circuncidartabaʼexoʼ, letiʼe máaxoʼob u kʼáatoʼob pʼáatal maʼalobil tu táan wíinikoʼ. Letiʼobeʼ ku beetkoʼob chéen utiaʼal maʼ u chʼaʼpachtaʼaloʼob tu yoʼolal* Cristo.
13 Tumen tak le máaxoʼob ku circuncidarkubaʼoboʼ maʼatech u tsʼoʼokbeskoʼob baʼax ku yaʼalik le Leyoʼ,+ baʼaxeʼ chéen u kʼáatoʼob ka a circuncidartabaʼex utiaʼal ka yanak baʼax oʼolal u nojbaʼalkúuntkubaʼob ta woʼolaleʼex.*
14 Chéen baʼaleʼ teneʼ jach junpuliʼ maʼ in kʼáat in nojbaʼalkúuntinba tu yoʼolal mix baʼaliʼ, baʼaxeʼ chéen tu yoʼolal k-Yuumtsil Jesucristo,+ le máax kíim tu cheʼil le muʼyajoʼ. Tu yoʼolal letiʼeʼ tin wiknaleʼ le yóokʼol kaaboʼ tsʼoʼok u kíimil,* yéetel teneʼ tsʼoʼok in kíimil utiaʼal le yóokʼol kaaboʼ.
15 Tumen mix baʼal u biilal u circuncidarkuba máak mix u pʼáatal maʼ u circuncidarkuba máak,+ chéen baʼax yaan u biilaleʼ letiʼe túumben máak ku beetaʼal tumen Diosoʼ.+
16 Tuláakal le máaxoʼob ku nuʼuktik u kuxtaloʼob tubeeloʼ ka yanaktiʼob jeetsʼel óolal yéetel ka chʼaʼabak óotsilil tiʼob; leloʼobaʼ u Israel Dios.+
17 Desde bejlaʼeʼ mix máak ka u yaʼal wa baʼax tin contra, tumen tin wíinklileʼ yaan marcaʼob eʼesik u esclavoen Jesús.+
18 Sukuʼuneʼex, yanak u nojoch utsil k-Yuumtsil Jesucristo ta wéeteleʼex le táan a weʼeskeʼex jatsʼuts modosoʼ. Ka béeyak.*
Notas
^ Ich griegoeʼ ku yaʼalaʼal kaʼach «tu yoʼolal u cheʼil u muʼyaj».
^ Ich griegoeʼ ku yaʼalaʼal kaʼach «tu yoʼolal a bakʼeleʼex».
^ Wa «tsʼoʼok u baʼajal tiʼ cheʼ».
^ Wa «Amén».
