Génesis 23:1-20
-
Ku kíimil Sara; le lugar tuʼux muʼukoʼ (1-20)
23 Tuláakal u kʼiiniloʼob u kuxtal Saraeʼ tu chukaj 127 años.+
2 Letiʼeʼ kíim tu kaajil Kiriat-arbá+ wa Hebrón,+ tu luʼumil Canaán.+ Abraháneʼ tumen jach yaachaj u yóoleʼ káaj u yoʼtik u yatan.
3 Abrahán túuneʼ líikʼeʼ ka lukʼ teʼ tuʼux yaan u yatanoʼ, tsʼoʼoleʼ ka tu yaʼalaj tiʼ u paalaloʼob Et:+
4 «Teneʼ chéen juntúul j-táanxel luʼumil kajakbal ta wiknaleʼex,+ kin kʼáat óoltikteʼex ka a koneʼexten junpʼéel lugar utiaʼal in mukik in watan tsʼoʼok u kíimiloʼ».
5 U paalaloʼob túun Eteʼ tu yaʼaloʼob tiʼ Abrahán:
6 «In yuum, uʼuy baʼax ken k-aʼaltech. Toʼoneʼ k-ilkeʼ techeʼ juntúul máak yéeyaʼanech tumen Dios.+ Jeʼel u páajtal a mukik a watan teʼ lugar maas maʼalob yaantoʼonoʼ. Mix juntúul tiʼ toʼon jeʼel u yaʼalik maʼ ken u tsʼáatech junpʼéel lugar utiaʼal a mukik a watanoʼ».
7 Abrahán túuneʼ líikʼeʼ, ka chinlaj tu táan u paalal Et,+ u kajnáaliloʼob le kaajoʼ,
8 ka tu yaʼalajtiʼob: «Uʼuyeneʼexiʼ, wa de acuerdoʼex ka in muk in watan wayeʼ, beeteʼex uts a waʼalikeʼex tiʼ Efrón u hijo Zoareʼ
9 ka u konten le u sajkabil Makpelá yaantiʼoʼ, le yaan tu jáal u kʼaaxoʼ. Beeteʼex uts a waʼalikeʼextiʼ ka u yaʼalten ta táaneʼex bukaʼaj plata ken in boʼottiʼ,+ utiaʼal beyoʼ ka yanak tuʼux in mukik le máaxoʼob kun kíimloʼob tenoʼ».+
10 Efrón le ititaoʼ tiʼ kulukbal kaʼach ichil u paalal Eteʼ. Le oʼolaleʼ tu yaʼalaj tiʼ Abrahán tu táan u paalal Et yéetel tu táan tuláakal le máaxoʼob ku yookloʼob tu joonajil le kaajoʼ:+
11 «¡Maʼ in yuum! Baʼaxeʼ uʼuy baʼax ken in waʼaltech. Kin tsʼáaiktech tu kaʼapʼéelal: le kʼáaxoʼ bey xan le sajkab yaan teʼeloʼ. Kin tsʼáaiktech tu táan in wéet kaajaloʼob. Muk a watan teʼeloʼ».
12 Abrahán túuneʼ chinlaj tu táan u kajnáaliloʼob le kaajoʼ.
13 Ka tu yaʼalaj tiʼ Efrón tu táan le máakoʼoboʼ: «Beet uts a wuʼuyik baʼax ken in waʼaltech. Jach tu jaajil kin waʼaliktecheʼ yaan in tsʼáaiktech le plata ku tojoltik le kʼáaxoʼ. Chʼaʼe, beyoʼ jeʼel u páajtal in mukik in watan teʼeloʼ».
14 Efrón túuneʼ tu yaʼalaj tiʼ Abrahán:
15 «In yuum, uʼuyeniʼ. U tojol le luʼumaʼ kex 400 baʼaloʼob* de plata, chéen baʼaleʼ pʼat beyoʼ, xeeneʼ ka a muk a watan teʼeloʼ».
16 Abrahán túuneʼ le ka tu yuʼubaj leloʼ tu pesartaj le 400 baʼaloʼob* de plata tu yaʼalaj Efrónoʼ, tu beetaj tu táan u paalal Et. Lelaʼ tu pesartaj yéetel le medida suuk u meyaj tiʼ le j-koonoloʼoboʼ.+
17 Abrahán túuneʼ kʼuch u tiaʼalint u kʼaax Efrón yaan kaʼach teʼ Makpelá naatsʼ tiʼ Mamréoʼ, le sajkaboʼ bey xan le cheʼob yanoʼob teʼeloʼ.
18 Lelaʼ úuch le ka tu manaj tu táan u paalal Et yéetel tu táan tuláakal le máaxoʼob ku yookloʼob tu joonajil le kaajoʼ.
19 Ka tsʼoʼokeʼ Abraháneʼ tu mukaj Sara teʼ sajkab yaan tu kʼáaxil Makpelá, naatsʼ tiʼ Mamré wa Hebrón, teʼ tu luʼumil Canaánoʼ.
20 Bey túunoʼ le kʼáax bey xan u sajkabiloʼ tsʼaʼab tiʼ Abrahán tumen u paalal Et utiaʼal u mukik le máaxoʼob kun kíimil tiʼoʼ.+
Notas
^ Ich hebreoeʼ ku yaʼalaʼal kaʼach «400 siclos». Ilawil «Siclo», página 2580.
^ Ich hebreoeʼ ku yaʼalaʼal kaʼach «400 siclos».
