Génesis 27:1-46
27 Isaak túuneʼ tsʼoʼok kaʼach u chʼíijil yéetel tsʼoʼok u pʼáatal maʼ sáasil u paakatiʼ. Junpʼéel u kʼiinileʼ tu tʼanaj Esaú,+ u yáax hijoeʼ, ka tu yaʼalajtiʼ: «¡Hijo!». Esaú túuneʼ tu núukajtiʼ: «¡Way yaneneʼ papá!».
2 Isaakeʼ tu yaʼalajtiʼ: «Tsʼoʼok in jach chʼíijil. Maʼ in wojel baʼax kʼiin ken kíimkeniʼ.
3 Le beetkeʼ beet uts a chʼaʼik a arco yéetel a flechaʼobeʼ ka xiʼikech kʼáax a kíims juntúul baʼalcheʼ utiaʼal in jaante.+
4 Le kéen suunakecheʼ beet le janal jach kiʼ in wuʼuyikoʼ, tsʼoʼoleʼ ka taasikten utiaʼal ka in jaante. Teen túuneʼ yaan in bendecirkech antes tiʼ in kíimil».
5 Chéen baʼaleʼ Rebecaeʼ táan kaʼach u yuʼubik baʼax ku yaʼalik Isaak tiʼ Esaú. Esaú túuneʼ bin kʼáax utiaʼal u kíimsik le baʼalcheʼ utiaʼal u taasik tiʼ u papáoʼ.+
6 Rebeca túuneʼ tu yaʼalaj tiʼ Jacob, u hijo:+ «Táant in wuʼuyik u yaʼalik a papá tiʼ a sukuʼun Esaúeʼ:
7 ‹Xeen teʼ kʼáax a kíims juntúul baʼalcheʼ utiaʼal ka a beet le janal kiʼ in wuʼuyikoʼ. Tsʼoʼoleʼ ka taasik in jaante utiaʼal in bendecirkech tu táan Jéeoba antes tiʼ in kíimil›.+
8 Beora túunaʼ hijo, jach uʼuyen tubeel yéetel beet tuláakal le baʼax ken in waʼaltechaʼ.+
9 Jáan xeen teʼ tuʼux yaan le baʼalcheʼoboʼ utiaʼal a taasikten kaʼatúul tiʼ u maas tʼaʼajil le chan chivoʼoboʼ. Teen túuneʼ yaan in beetik junpʼéel kiʼikiʼ janal tiʼ a papá, jach jeʼex uts tu tʼaanoʼ.
10 Le kéen tsʼoʼokkeʼ ka bisiktiʼ utiaʼal ka u jaante yéetel utiaʼal ka u bendecirtech antes tiʼ u kíimil».
11 Jacob túuneʼ tu yaʼalaj tiʼ Rebeca, u maama: «Pero si in sukuʼun Esaúeʼ piim u tsoʼotsel u wíinklil,+ en cambio teneʼ maʼ beyeniʼ.
12 ¿Kux túun wa ku tatalkʼabtiken in papá?+ Yaan u tuklik chéen táan in burlarkinba tiʼ letiʼ. Tu lugar túun u bendecirkeneʼ yaan in beetik u maldecirken».
13 U maama túuneʼ tu yaʼalajtiʼ: «Hijo, wa beyoʼ lúubuk tin wóokʼol le maldición kun aʼalbil ta contraoʼ. Techeʼ chéen beet le baʼax tin waʼalajtechoʼ, xeen ka a taasten le baʼalcheʼoboʼ».+
14 Jacob túuneʼ bin u chʼaʼ le baʼalcheʼoboʼ ka tu taasaj tiʼ u maama, u maama túuneʼ tu beetaj junpʼéel kiʼikiʼ janal, jach jeʼex uts tu tʼaan Isaak, u papá Jacoboʼ.
15 Ka tsʼoʼokeʼ Rebecaeʼ ook tu yotocheʼ ka tu chʼaʼaj u maas maʼalob nookʼ Esaúeʼ ka tu tsʼáaj u búukint Jacob, le u tʼuupoʼ.+
16 Tu chʼaʼaj xan u kʼéewelil le chan chivoʼoboʼ ka tu tsʼáaj yóokʼol u kʼab bey xan tu kaal Jacob.+
17 Rebeca túuneʼ tu chʼaʼaj le kiʼikiʼ janal bey xan le waaj tu beetoʼ ka tu tsʼáaj tiʼ Jacob, u hijo.+
18 Jacob túuneʼ ook tuʼux yaan u papáeʼ ka tu yaʼalajtiʼ: «¡Papá!». U papá túuneʼ tu núukaj: «¡Way yaneneʼ! ¿Máaxech beyaʼ hijo?».
19 Jacobeʼ tu yaʼalaj tiʼ u papá: «Teen Esaú, a yáax hijo.+ Tsʼoʼok in beetik jach jeʼex ta waʼaliltenoʼ. Jáan kulen a jaant junpʼíit tiʼ le bakʼ tin taasajtechoʼ utiaʼal ka a bendecirten».+
20 Isaak túuneʼ tu yaʼalaj tiʼ Jacob: «Hijo, ¿bix túun úuchik a séeb kaxtik le baʼalcheʼoʼ?». Letiʼeʼ tu núukajtiʼ: «Es ke Jéeoba a Dios beet u taal tin wiknal».
21 Isaak túuneʼ tu yaʼalaj tiʼ Jacob: «Hijo, beet uts a natsʼkaba utiaʼal ka in tatalkʼabtech, utiaʼal in wojéeltik wa jach tu jaajil teech Esaú».+
22 Jacob túuneʼ náatsʼ tu yiknal Isaak, u papá. Isaak túuneʼ tu tatalkʼabteʼ ka tu yaʼalajtiʼ: «A vozeʼ jach u voz Jacob, pero a kʼaboʼobeʼ jach u kʼaboʼob Esaú».+
23 Letiʼeʼ maʼ tu kʼaj óoltaj Jacobiʼ, tumen u kʼaboʼobeʼ piim u tsoʼotsel jeʼex u kʼaboʼob Esaú, u sukuʼuneʼ. Le oʼolal tu bendecirtaj.+
24 Isaak túuneʼ tu kʼáatajtiʼ: «¿Jach wa tu jaajil in hijo Esaúech?». Letiʼ túuneʼ tu núukaj: «Jach jaaj, teen».
25 Isaak túuneʼ tu yaʼalajtiʼ: «Hijo, taasten junpʼíit u bakʼel le baʼalcheʼ ta kíimsoʼ utiaʼal ka in jaante, tsʼoʼoleʼ kin bendecirkech». Jacob túuneʼ tu taasaj le bakʼ tiʼoʼ ka tu jaantaj, tsʼoʼoleʼ tu taasaj vino xan tiʼeʼ ka tu yukʼaj.
26 Le ka tsʼoʼokeʼ Isaak, u papáeʼ, tu yaʼalajtiʼ: «Hijo, beet uts a natsʼkaba utiaʼal ka a tsʼuʼutsʼen».+
27 Jacob túuneʼ tu natsʼubaeʼ ka tu tsʼuʼutsʼaj, Isaak túuneʼ páajchaj u yuʼubik u book u nookʼ.+ Ka tu bendecirtaj táan u yaʼalik:
«U book in hijoeʼ bey jeʼex le book yaan tiʼ le kʼáax u bendecirmaj Jéeobaoʼ.
28 Le u jaajil Diosoʼ ka u tsʼáatech u serenoil le kaʼanoʼ,+ maʼalob luʼumoʼob,+ túumben vino yéetel ka u beet u yaʼabtal u yich le semilla ka pakʼikoʼ.+
29 Le kaajoʼob xanoʼ ka u servirtechoʼob, yéetel le naciónoʼoboʼ ka chinlakoʼob ta táan. Dominart a láakʼtsiloʼob, yéetel letiʼobeʼ ka chinlakoʼob ta táan.+ Maldecirtaʼak jeʼel máaxak ka u maldecirtecheʼ yéetel bendecirtaʼak jeʼel máaxak ka u bendecirtecheʼ».+
30 Le jach táant u bendecirtaʼal Jacob tumen u papáoʼ, yéetel le jach táant u lukʼul tu yiknaloʼ, kʼuch Esaú yéetel le baʼalcheʼ tu kíimsoʼ.+
31 Letiʼ xaneʼ tu preparartaj junpʼéel kiʼikiʼ janaleʼ ka tu bisaj tiʼ u papá, ka tu yaʼalajtiʼ: «Papá, líiʼkech a jaant junpʼíit u bakʼel le baʼalcheʼ tin preparartajtechoʼ utiaʼal ka a bendecirten».
32 Isaak, u papáeʼ, tu yaʼalajtiʼ: «¿Máaxechiʼ?». Letiʼ túuneʼ tu yaʼalajtiʼ: «Teen Esaú a yáax hijo».+
33 Isaak túuneʼ káaj u sen kikilankileʼ ka tu yaʼalaj: «¿Máax túun le yáax taasten u bakʼel le baʼalcheʼ utiaʼal ka in jaantoʼ? Tumen antes tiʼ a taaleʼ tsʼokaʼaniliʼ in jaantik le janaloʼ yéetel tsʼoʼok xan in bendecirtik le máax taasoʼ. Letiʼ túuneʼ yaan u kʼamik le baʼaloʼob tin waʼalajtiʼoʼ».
34 Le ka tu yuʼubaj le baʼax tu yaʼalaj u papáoʼ, Esaúeʼ jach náakʼ tiʼeʼ ka joʼopʼ u yawat okʼol táan u yaʼalik: «¡Bendecirten xaniʼ papá, bendecirten xaniʼ!».+
35 Chéen baʼaleʼ u papáeʼ tu yaʼalajtiʼ: «A wíitsʼineʼ taaleʼ ka tu tusen, le oʼolal letiʼ tin bendecirtaj, maʼ techiʼ».
36 Yoʼolal leloʼ Esaúeʼ tu yaʼalaj: «¿Maʼ wa le oʼolal Jacob* u kʼaabaʼiʼ? Tumen kaʼatéen tsʼoʼok u chʼaʼik in lugar.+ Tsʼoʼok u chʼaʼik le derecho yaanten bey yáax hijooʼ,+ tsʼoʼoleʼ beoraaʼ tsʼoʼok xan u bendecirtaʼal tu lugar in bendecirtaʼal teen».+ Tu yaʼalaj xan tiʼ u papá: «¿Maʼ wa túun tu páajtal a bendecirken xan?».
37 Isaak túuneʼ tu yaʼalaj tiʼ Esaú: «Tsʼoʼok in waʼalikeʼ a wíitsʼin ken u dominartech.+ Letiʼ xaneʼ yaan u meyajtaʼal tumen tuláakal u láakʼtsiloʼob, tsʼoʼoleʼ utiaʼal xan u kaxtik u kuxtaleʼ tsʼoʼok in waʼalik ka yanak u yich le semilla ken u pakʼoʼ yéetel ka yanak túumben vino tiʼ.+ Le beetkeʼ, ¿baʼax jeʼel u páajtal in tsʼáaiktecheʼ hijo?».
38 Esaúeʼ tu yaʼalaj tiʼ u papá: «¿Papá, chéen wa junpʼéel bendición ken a tsʼáae? ¡Bendecirten xaniʼ papá, bendecirten xaniʼ!». Esaú túuneʼ kʼaʼam awatnajeʼ ka joʼopʼ u sen okʼol.+
39 Isaak u papá túuneʼ tu yaʼalajtiʼ:
«Ilawile, techeʼ yaan a kajtal náach tiʼ le maʼalob luʼumoʼoboʼ, yéetel teʼ tuʼux kan kajtaloʼ maʼ kun antal le sereno ku taal teʼ kaʼanoʼ.+
40 Techeʼ mantatsʼ yéetel a espada kan máan+ yéetel yaan a servirtik a wíitsʼin,+ pero le kéen náakak a wóoleʼ yaan a tokikaba tiʼ».+
41 Esaú túuneʼ tu chʼaʼpʼektaj Jacob úuchik u bendecirtaʼal tumen u papá.+ Esaúeʼ joʼopʼ u yaʼalik ichil u tuukul: «Jach taʼaytak u kíimil in papá.+ Le kéen kíimkeʼ yaan in kíimsik in wíitsʼin Jacob».
42 Le ka aʼalaʼab tiʼ Rebeca baʼax tu yaʼalaj Esaú, u yáax hijooʼ, tu túuxtaj tʼanbil Jacobeʼ, ka tu yaʼalajtiʼ: «Ilawile, a sukuʼun Esaúeʼ táan u tuklik u kíimskech utiaʼal u vengarkuba.
43 Beoraaʼ hijo, beet le baʼax ken in waʼaltechaʼ. Líiʼkech, púutsʼen tu séebaʼanil tak tu kaajil Arán,+ tu yiknal in sukuʼun Labán.
44 Pʼáatkech mientras teʼeloʼ tak ken máanak u pʼujaʼanil a sukuʼun.
45 Le kéen máanak túun u pʼujaʼanil yéetel le kéen tuʼubuktiʼ baʼax ta beetajtiʼeʼ, teneʼ yaan in túuxtikech chʼaʼabil. Tumen teneʼ maʼ in kʼáat in perdert mix juntúul tiʼ teʼexiʼ».
46 Rebeca túuneʼ seguernaj u yaʼalik tiʼ Isaak: «Tsʼoʼok u náakal in wóol kuxtal tu culpa u hijaʼob Et.+ Wa ka kʼuchuk u chʼaʼ Jacob u yatan ichil u hijaʼob Et, jeʼex tu beetil Esaúeʼ, ¿baʼax u biilalten le kuxtalaʼ?».+
Notas
^ U kʼáat u yaʼal «Le Máax ku Machik u Tuunkuy Uláakʼoʼ; Le Máax ku Chʼaʼik u Lugar Uláakʼ Máakoʼ».
