Isaías 6:1-13
6 Teʼ año ka kíim rey Uzíasoʼ,+ teneʼ tin wilaj Jéeoba kulukbal tiʼ junpʼéel trono kaʼanal yanil.+ U chowakil le nookʼ u takmoʼ jayakbal tuláakal ichil le templooʼ.
2 Yaan xan kaʼach serafínoʼob* waʼalakbaloʼob baʼpach tiʼ letiʼ. Cada juntúuleʼ yaan seis u pʼéelal u xiikʼoʼob. Cada juntúuleʼ* u pixmaj u yich yéetel kaʼapʼéel u xiikʼoʼob, yéetel uláakʼ kaʼapʼéeleʼ u pixmaj u yookoʼob, le u tsʼook kaʼapʼéeloʼ ku meyajtiʼob utiaʼal u xikʼnaloʼob.
3 Letiʼobeʼ tu kʼaʼam aʼaloʼob tu baatsiloʼob:
«Santo, santo, santo Jéeoba, le máax gobernartik le ángeloʼoboʼ.+
Tuláakal le baʼaxoʼob yaan teʼ luʼumoʼ ku yeʼesik bukaʼaj nojchil u poder».
4 U marcoil le joonajoʼoboʼ tu tíitubaʼob tu yoʼolal u kʼaʼam tʼaanoʼob,* yéetel le najoʼ chuʼup yéetel buutsʼ.+
5 Teen túuneʼ tin waʼalaj: «¡Tsʼoʼokten beyaʼ!
¡Seguro yaan in kíimil,tumen in wichoʼobeʼ tsʼoʼok u yilkoʼob le Reyoʼ, tsʼoʼok u yilkoʼob Jéeoba,*tsʼoʼoleʼ j-kʼeban máaken yéetel tin chiʼeʼ ku jóokʼol baʼaloʼob maʼ maʼalobtakiʼ+yéetel tiʼ kajaʼanen ichil junpʼéel kaaj ku jóokʼol xan tu chiʼob baʼaloʼob maʼ maʼalobtakiʼ!».
6 Tiʼ le súutukoʼ, juntúul tiʼ le serafínoʼoboʼ taal xikʼnalil tin wiknal. Letiʼeʼ u machmaj yéetel junpʼéel chowak pinza junpʼéel chakjoleʼen chúuk+ tu chʼaʼaj teʼ altaroʼ.*+
7 Letiʼeʼ tu kóojsaj tin chiʼeʼ ka tu yaʼalaj:
«¡Ilawile! Teneʼ tsʼoʼok in nakik le chúuk ta chiʼoʼ,desde beoraaʼ tsʼoʼok u pʼáatal minaʼan a culpa,yéetel tsʼoʼok u perdonartaʼal a kʼeban».
8 Ka tsʼoʼokeʼ tin wuʼuyaj Jéeoba táan u yaʼalik: «¿Máax ken in túuxte? ¿Máax jeʼel u bin tʼaan t-oʼolaleʼ?».+ Teen túuneʼ tin waʼalaj: «¡Way yaneneʼ! ¡Túuxteniʼ!».+
9 Letiʼeʼ tu yaʼalajten: «Xeen a waʼal tiʼ le kaajoʼ:
‹Kex ka a sen uʼuyeʼex le baʼax kun aʼalbiloʼmaʼ ken a naʼateʼex,kex ka a sen ileʼexeʼmix baʼal ken a kaneʼex›.+
10 Beet u chichtal u puksiʼikʼal le kaajoʼ,+pix u xiknoʼob+bey xan u yichoʼob,utiaʼal maʼ u paakatoʼobyéetel utiaʼal maʼ u yuʼubikoʼob mix baʼal,bey túunoʼ u puksiʼikʼaloʼobeʼ maʼ ken u naʼatoʼob mix baʼal,yéetel maʼ kun suutoʼob tin wiknal utiaʼal ka in tsʼakoʼob».+
11 Teen túuneʼ tin waʼalaj: «Jéeoba Dios, ¿baʼax kʼiin u xuʼulul u beetaʼal baʼal beyoʼ?». Letiʼ túuneʼ tu yaʼalaj:
«Yaan u xuʼulul le kéen pʼáatak juʼujut u pakʼiloʼob le kaajoʼoboʼ yéetel kéen pʼáatak minaʼan u kajnáaliloʼob,le kéen pʼáatak mix máak kajaʼan teʼ najoʼoboʼ,le kéen kʼaskúuntaʼak le luʼum yéetel le kéen pʼáatak mix baʼal u biilaloʼ,+
12 le kéen u beet Jéeoba u bisaʼal táanxel luʼumil le máakoʼoboʼ+yéetel le kéen pʼáatak óoliʼ bey junpʼéel desierto tuláakal le luʼumoʼ.
13 Pero tiʼ cada diez israelitaʼobeʼ yaan u pʼáatal juntúuliʼ, chéen baʼaleʼ kéen tsʼoʼokkeʼ yaan u kaʼa tóokaʼal jeʼex junkúul nuxiʼ cheʼ wa jeʼex junkúul encinoeʼ. Le cheʼobaʼ le kéen chʼaʼakakoʼobeʼ ku pʼáatal u chuun cheʼil. Le kʼuʼukʼ kun jóokʼol teʼ chuun cheʼoʼ* santo tu táan Dios».
Notas
^ Ilawil página 2580.
^ Ich hebreoeʼ ku yaʼalaʼal kaʼach «Letiʼeʼ».
^ Ich hebreoeʼ ku yaʼalaʼal kaʼach «u kʼaʼam tʼaan».
^ Wa «Jéeoba, le máax gobernartik le ángeloʼoboʼ».
^ Ilawil página 2554.
^ Wa «descendencia».
