Jeremías 11:1-23
11 Jéeobaeʼ tu tʼanaj Jeremíaseʼ ka tu yaʼalajtiʼ:
2 «¡Máakeʼex, jach uʼuyeʼex le baʼaxoʼob táakaʼan ichil le pactooʼ!*
Tʼan* le xiiboʼob yaan Judá yéetel u kajnáaliloʼob Jerusalénoʼ
3 ka a waʼaltiʼob: ‹Jéeoba u Dios Israeleʼ ku yaʼalik: «Xiʼik kʼaasil tiʼ máax maʼ tu tsʼoʼokbesik le baʼaxoʼob táakaʼan ichil le pactooʼ,+
4 le baʼaxoʼob tin waʼalaj unaj u beetik a úuchben láakʼtsileʼex le kʼiin ka tin jóoʼsoʼob tu luʼumil Egipto,+ le lugar bey horno tuʼux ku yiʼibil fierrooʼ,+ teneʼ tin waʼalajtiʼob: ‹Uʼuyeʼex in tʼaan yéetel beeteʼex tuláakal jach jeʼex in waʼalikteʼexoʼ. Bey túunoʼ yaan a beetkabaʼex in kaajal yéetel teneʼ yaan in beetkinba a Dioseʼex.+
5 Teneʼ yaan in béeykuntik le baʼax tin jurartaj tiʼ a úuchben láakʼtsileʼexoʼ, tin waʼalaj yaan in tsʼáaiktiʼob junpʼéel luʼum tuʼux ku tuul leche yéetel kaab,+ letiʼe luʼum tuʼux kajaʼaneʼex tak bejlaʼaʼ›»›».
Teen túuneʼ tin waʼalaj: «Yuum Jéeoba, ka béeyak».*
6 Jéeoba túuneʼ tu yaʼalajten: «Tiʼ tuláakal u kaajiloʼob Judá yéetel tiʼ tuláakal le bejoʼob yaan Jerusalénoʼ unaj a waʼalik lelaʼ: ‹Uʼuy a wuʼuyeʼex le baʼaxoʼob táakaʼan ichil le pactooʼ yéetel ilawil a tsʼoʼokbeskeʼex.
7 Teneʼ jach tin tsolaj u nuʼuk tiʼ a úuchben láakʼtsileʼex le ka tin jóoʼsoʼob tu luʼumil Egipto jeʼex in beetik tak bejlaʼoʼ. Teneʼ mantatsʼ tin tsolaj u nuʼuk tiʼob,* tin waʼalajtiʼob: «Uʼuyeʼex in tʼaan».+
8 Pero letiʼobeʼ maʼ tu yuʼuboʼob baʼax kin waʼalikiʼ mix tu chʼenxikintenoʼobiʼ, baʼaxeʼ tumen tercoʼobeʼ, cada juntúuleʼ seguernaj u beetik baʼax ku tsʼíiboltik u kʼasaʼan puksiʼikʼal.+ Le oʼolal tin castigartoʼob jeʼex aʼalaʼanil ichil le pactooʼ. Teneʼ tin waʼalajtiʼob ka u tsʼoʼokbesoʼob, pero maʼ tu yóotaj u beetoʼobiʼ›».
9 Jéeoba túuneʼ tu yaʼalajten: «Le xiiboʼob yanoʼob Judá yéetel u kajnáaliloʼob Jerusalénoʼ yaan junpʼéel baʼax maʼ maʼalob tsʼoʼok u múul chʼaʼtuklikoʼobiʼ.
10 Tsʼoʼok u joʼopʼol u beetkoʼob le baʼaxoʼob maʼ maʼalobtak ku beetik kaʼach u yúuchben láakʼtsiloʼoboʼ, le máaxoʼob maʼ tu yóotoʼob u yuʼuboʼob in tʼaanoʼ.+ Letiʼobeʼ tsʼoʼok xan u binoʼob tu paach uláakʼ diosoʼob yéetel tsʼoʼok u meyajtikoʼob.+ U kajnáaliloʼob Israel yéetel u kajnáaliloʼob Judáeʼ maʼ u tsʼoʼokbesoʼob le pacto tin beetaj yéetel u yúuchben láakʼtsiloʼoboʼ.+
11 Tu yoʼolal leloʼ Jéeobaeʼ ku yaʼalik: ‹Nikaʼaj in taas junpʼéel nojoch loob+ tu yóokʼoloʼob yéetel maʼ kun páajtal u púutsʼloʼob tiʼ. Kex ka u sen kʼáatoʼobten áantajeʼ maʼ ken in chʼenxikintoʼob.+
12 U kaajiloʼob Judá túun yéetel u kajnáaliloʼob Jerusaléneʼ yaan u binoʼob u sen kʼáatoʼob áantaj tiʼ u diosoʼob,+ le ku kʼubkoʼob sacrificioʼob* tiʼoboʼ, pero junpuliʼ maʼ kun salvarbiloʼob tu kʼiinil táan u muʼyajoʼob.
13 Judá, leloʼ bey kun úuchloʼ tumen a diosoʼobeʼ tsʼoʼok u sen yaʼabtaloʼob jeʼex bukaʼaj yaʼabil a kaajiloʼobeʼ, tsʼoʼoleʼ jeʼex bukaʼaj yaʼabil le bejoʼob yaan Jerusalénoʼ bukaʼaj xan yaʼabil le altaroʼob tsʼoʼok a beetik utiaʼal junpʼéel baʼal suʼtsiloʼ,* le jeʼeloʼobaʼ utiaʼal u kʼuʼubul sacrificioʼob tiʼ Baal›.+
14 Techeʼ* maʼ a orar tu yoʼolal le kaajaʼ. Maʼ a kʼáat óolal tu yoʼolaloʼob, mix a beetik junpʼéel oración tu yoʼolaloʼob,+ tumen maʼ ken in chʼenxikintoʼob le kéen joʼopʼok u sen kʼáatkoʼobten áantaj tu kʼiinil táan u muʼyajoʼob.
15 ¿Baʼax ku kaxtik tin wotoch le kaaj in yaabiltmajwa yaʼab tiʼ letiʼobeʼ tsʼoʼok u beetkoʼob baʼaloʼob maʼ maʼalobtakiʼ?
¿Ka tuklik wa jeʼel u jechkoʼob le nojoch loob kun taal ta wóokʼol* yoʼolal le baʼalcheʼob ku kʼubkoʼoboʼ?
¿Yaan wa u kiʼimaktal a wóol teʼ kʼiin jeʼeloʼ?
16 Kaʼacheʼ Jéeobaeʼ ku yaʼalikeʼ techeʼ junkúul maʼalob olivoech,kiʼichkelmech yéetel maʼalobtak a wich.
Pero le ka wáakʼ junpʼéel baʼaleʼ, letiʼeʼ tu beetaj a méekʼaʼal tumen kʼáakʼ,yéetel a enemigoʼobeʼ tu kachoʼob a kʼaboʼob.
17 Jéeoba, le máax gobernartik le ángeloʼob, le Máax Pakʼmilechoʼ,+ tsʼoʼok u yaʼalik yaan u taal junpʼéel nojoch loob ta wóokʼol yoʼolal le baʼaloʼob kʼaastak tu beetaj u kajnáaliloʼob Israel yéetel u kajnáaliloʼob Judáoʼ, letiʼobeʼ maʼ tu respetartoʼob Dios úuchik u kʼubkoʼob sacrificioʼob tiʼ Baaliʼ».+
18 Leloʼ Jéeoba tsʼáa in wojéelte.
In Dios, teʼ kʼiin jeʼeloʼ ta beetaj in wilik le baʼaxoʼob ku beetkoʼoboʼ.
19 Teneʼ beyen kaʼach juntúul taman jach suuk yéetel táan u bisaʼal kíimsbileʼ.
Maʼ in wojel kaʼach le baʼax táan u chʼaʼtuklikoʼob tin contraaʼ:+
«Koʼoneʼex kʼaskúuntik le cheʼ paʼteʼ yéetel u yichoʼ,koʼoneʼex xuʼulsik tiʼ u kuxtal,utiaʼal u tuʼubsaʼal u kʼaabaʼ».
20 Pero Jéeoba, le máax gobernartik le ángeloʼoboʼ, ku beetik justicia.
Letiʼeʼ ku jach ilik baʼax yaan ichil u puksiʼikʼal máak bey xan baʼax yaan tu tuukul.*+
Chaʼa in wilik bix a sutik u jeel tiʼob le baʼax ku beetkoʼoboʼ,tumen teneʼ tsʼoʼok in pʼatik ta kʼab utiaʼal ka a beetten justicia.
21 Lelaʼ letiʼe baʼax ku yaʼalik Jéeoba tiʼ le xiiboʼob yaan Anatot+ táan u yilik u kíimskenoʼoboʼ, le máaxoʼob ku yaʼalikoʼob: «Maʼ unaj a tʼaan tu kʼaabaʼ Jéeobaiʼ,+ tumen wa maʼeʼ yaan k-kíimskech».
22 Tu yoʼolal leloʼ, Jéeoba le máax gobernartik le ángeloʼoboʼ, ku yaʼalik: «Teneʼ nikaʼaj in kʼáat cuenta tiʼob. Le táankelmoʼoboʼ yaan u kíimsaʼaloʼob yéetel espada,+ tsʼoʼoleʼ u hijoʼob yéetel u hijaʼobeʼ yaan u kíimloʼob yéetel wiʼij.+
23 Maʼ kun pʼáatal mix juntúul tiʼ letiʼobiʼ, tumen yaan in taasik junpʼéel nojoch loob tu yóokʼol le xiiboʼob yaan Anatot+ teʼ kʼiin ken in kʼáat cuenta tiʼoboʼ».
Notas
^ Wa «acuerdooʼ».
^ Maʼ xaaneʼ tiʼ Jeremías ku yaʼalaʼal.
^ Wa «amén».
^ Ich hebreoeʼ ku yaʼalaʼal kaʼach «maʼ sáasak táan in líikʼil utiaʼal in tsolik u nuʼuk tiʼobiʼ».
^ Wa «ku beetkoʼob u kúulul u buutsʼil u sacrificioʼob».
^ Wa «le suʼtsil diosoʼ».
^ Lelaʼ tiʼ Jeremías ku yaʼalaʼal.
^ Teʼelaʼ táan u yúuchul tʼaan tiʼ Judá.
^ Wa «jach bix u yuʼubikuba». Ich hebreoeʼ ku yaʼalaʼal kaʼach «riñónoʼob».
