Jeremías 12:1-17
12 Jéeoba Dios, le kéen joʼopʼok in quejarkinba ta táan,yéetel le kéen joʼopʼok in tʼaan tiʼ a beetik justiciaeʼ,+ kin wilik jach tu jaajil justoech.
Chéen baʼaleʼ, ¿baʼaxten túun ku bin utsil tiʼ le kʼasaʼan máakoʼoboʼ?+
¿Baʼaxten yaan jeetsʼelil tiʼ le máaxoʼob ku traicionartik u yéet máakiloʼoboʼ?
2 Techeʼ ta pakʼoʼob, letiʼob túuneʼ tu tabaj u mootsoʼob,tsʼoʼok u nojochtaloʼob yéetel tsʼoʼok u yantal u yichoʼob.
Mantatsʼ ku chʼaʼchiʼitkechoʼob, pero náach yanilech tiʼ u puksiʼikʼaloʼob.+
3 Chéen baʼaleʼ Jéeoba Dios, techeʼ suuk a wilken, a kʼaj óolen tubeel,+tsʼoʼok a xakʼaltik in puksiʼikʼal yéetel tsʼoʼok a wilik chúukaʼan u yóol tiʼ teech.+
Pero letiʼobeʼ junpáaykuntoʼob jeʼex u junpáaykuntaʼal tamanoʼob utiaʼal kíimsbileʼ,junpáaykuntoʼob utiaʼal u kʼiinil le xuʼulsajoʼ.
4 ¿Baʼax kʼiin u xuʼulul u tijil le luʼumyéetel u tijil le kʼáaxoʼ?+
Tu yoʼolal u kʼasaʼanil le máaxoʼob kajaʼanoʼob teʼ luʼumoʼ,tsʼoʼok u pʼáatal minaʼan mix juntúul baʼalcheʼ yéetel mix juntúul chʼíichʼiʼ.
Le máakoʼoboʼ ku yaʼalikoʼob: «Letiʼeʼ maʼ tu páajtal u yilik bix kun tsʼoʼokoltoʼon».
5 Wa ka kaʼanal kéen ketlan áalkabnakech yéetel máakoʼobeʼ,¿bix túun kun páajtal a ketlan áalkab yéetel tsíiminoʼob?+
Techeʼ maʼalob a wuʼuyikaba tiʼ junpʼéel luʼum tuʼux tuláakal maʼalob yanil,chéen baʼaleʼ, ¿baʼax ken a beet le kéen yanakech ichil le júuʼcheʼ* yaan tu jáal le Jordánoʼ?
6 Tumen tak a sukuʼunoʼob,le máaxoʼob kajaʼanoʼob tu yotoch a papáoʼ, tsʼoʼok u traicionarkechoʼob.+
Letiʼobeʼ yaan baʼax ku yawtikoʼob ta contra.
Kex ka u yutsultʼantechoʼobeʼ,maʼ a kʼubik a wóol tiʼob.
7 «Tsʼoʼok in pʼatik in wotoch,+ tsʼoʼok in xúumpʼattik in herencia.+
Le kaaj in yaabiltmoʼ tsʼoʼok in kʼubik tu kʼab u enemigoʼob.+
8 Tsʼoʼok in wilkeʼ in herenciaeʼ bey juntúul león ku máan teʼ kʼáaxoʼ.
Letiʼeʼ tsʼoʼok u jéenkal tin contra.
Le oʼolal tsʼoʼok in pʼektik.
9 Tsʼoʼok in wilkeʼ in herenciaeʼ bey juntúul águila jejeláas u colorileʼ,ku baʼpachtaʼal yéetel ku atacartaʼal tumen u maasil águilaʼob.+
U baʼalcheʼileʼex kʼáax, koʼoteneʼex, muchʼlakeʼex wayeʼ,koʼoteneʼex janal.+
10 Yaʼab j-kanan tamanoʼob tsʼoʼok u kʼaskúuntikoʼob in pakʼal uva.+
Tsʼoʼok u yayaʼchaʼatkoʼob le luʼum in tiaʼaloʼ.+
Tsʼoʼok u pʼatkoʼob bey junpʼéel desierto le luʼum maas jatsʼuts yaantenoʼ.
11 Le luʼumoʼ tsʼoʼok u pʼáatal junpʼéel desierto,tsʼoʼok u sen tijil.*
Tin táaneʼ tsʼoʼok u pʼáatal mix baʼal yaniʼ.+
Tsʼoʼok u kʼaskúuntaʼal tuláakal le luʼumoʼ,pero mix máak beetik u cuentail.+
12 Le máaxoʼob ku xuʼulsajoʼoboʼ táan u taaloʼob tiʼ tuláakal le bejoʼob yaan* teʼ desiertooʼ.
U espada Jéeobaeʼ táan u xuʼulsik u kajnáaliloʼob tuláakal le luʼumaʼ.+
Minaʼan jeetsʼelil tiʼ mix máak.*
13 Tsʼoʼok u pakʼikoʼob trigo, pero kʼiʼix tu cosechartoʼob.+
Tsʼoʼok u sen meyajoʼob, pero mix junpʼéel utsil u taastiʼob.
Jéeobaeʼ sen pʼujaʼan tu yéeteloʼob, maʼ ken u beet u yantal u yich u meyajoʼob,leloʼ yaan u beetik u pʼáatloʼob ich suʼtsilil».
14 Lelaʼ letiʼe baʼax ku yaʼalik Jéeobaaʼ: «Tuláakal le kʼasaʼan máakoʼob* táan u kʼaskúuntikoʼob le herencia tin tsʼáaj tiʼ Israel in kaajaloʼ,+ nikaʼaj in jóokpaytoʼob teʼ luʼum tuʼux yanoʼoboʼ,+ yéetel nikaʼaj xan in jóokpayt u kajnáaliloʼob Judá ichiloʼob.
15 Pero le kéen tsʼoʼokok in jóokpaytikoʼobeʼ yaan in kaʼa chʼaʼik óotsilil tiʼob, yéetel cada juntúuleʼ yaan in beetik u suut tu luʼum, tu herencia».
16 «Wa jeʼex úuchik u tsʼáaik u yóoloʼob u kaʼansoʼob in kaajal jurar tu kʼaabaʼ Baal, bey xan ka u tsʼáa u yóoloʼob bin teʼ bejoʼob tuʼux ku bin in kaajal, yéetel ka jurarnakoʼob tin kʼaabaʼ táan u yaʼalikoʼob: ‹¡Kin jurartik tu kʼaabaʼ Jéeoba, le Dios kuxaʼanoʼ!›, letiʼob túuneʼ yaan u pʼáatloʼob ichil in kaajal.
17 Pero wa maʼ tu yóotik u yuʼuboʼob tʼaaneʼ, teneʼ yaan in jóokpaytik le kaajoʼ, yaan in jóokpaytik yéetel yaan in xuʼulsiktiʼ», leloʼ bey u yaʼalik Jéeoba.+
Notas
^ Wa «pokcheʼ».
^ Uláakʼ bix u traducirtaʼaleʼ «yaachajaʼan u yóol».
^ Wa «le bejoʼob ku formar ikil u sen máan máak».
^ Ich hebreoeʼ ku yaʼalaʼal kaʼach «tiʼ mix junpʼéel bakʼ».
^ Ich hebreoeʼ ku yaʼalaʼal kaʼach «in kʼasaʼan vecinoʼob».
