Jeremías 13:1-27
13 Jéeobaeʼ tu yaʼalajten: «Xeen a man junpʼéel kʼaxnakʼ de lino, le kéen tsʼoʼokkeʼ ka kʼaxik ta nakʼ, chéen baʼaleʼ maʼ unaj a woksik ich jaʼiʼ».
2 Ka túun tin manaj le kʼaxnakʼ jeʼex úuchik u yaʼalikten Jéeobaoʼ, tsʼoʼoleʼ ka tin kʼaxaj tin nakʼ.
3 Ka tsʼoʼokeʼ Jéeobaeʼ tu yaʼalajten:
4 «Líiʼkecheʼ ka a chʼaʼ le kʼaxnakʼ ta manaj yéetel ta kʼaxaj ta nakʼoʼ ka xiʼikech teʼ Éufratesoʼ, teʼeloʼ tiʼ ken a taʼak tu yáam junpʼéel nuxiʼ tuunichiʼ».
5 Ka túun bineneʼ ka tin taʼakaj naatsʼ tiʼ le Éufrates jeʼex úuchik u yaʼalikten Jéeobaoʼ.
6 Ka tsʼoʼok u máan yaʼab kʼiinoʼobeʼ Jéeobaeʼ tu yaʼalajten: «Líiʼkecheʼ ka xiʼikech a chʼaʼ le kʼaxnakʼ tin waʼalajtech ka a taʼak teʼ Éufratesoʼ».
7 Ka túun binen teʼ Éufratesoʼ, ka kʼucheneʼ tin páanaj le kʼaxnakʼ teʼ tuʼux in taʼakmoʼ, ka tin wileʼ tsʼoʼok u kʼastal, mix baʼal u biilal.
8 Ka túun tin wuʼuyaj u yaʼalik Jéeoba:
9 «Lelaʼ letiʼe baʼax ku yaʼalik Jéeobaaʼ: ‹Jeʼex úuchik tiʼ le kʼaxnakʼaʼ bey xan kun úuchul tiʼ u kaʼanal ichil Judá yéetel tiʼ u sen kaʼanal ichil Jerusalénoʼ.+
10 Le kʼasaʼan máakoʼobaʼ maʼatech u yuʼubikoʼob in tʼaan,+ jach tercoʼob yéetel chéen ku beetkoʼob baʼax ku tsʼíiboltik u puksiʼikʼaloʼob,+ ku binoʼob tu paach uláakʼ diosoʼob, ku meyajtikoʼob yéetel ku chintaloʼob tu táanoʼob, tuláakloʼobeʼ yaan u pʼáatal mix baʼal u biilaloʼob jeʼex le kʼaxnakʼaʼ›.
11 Jéeobaeʼ ku yaʼalik: ‹Le kéen tsʼaʼabak junpʼéel kʼaxnakʼeʼ ku jéepʼel tu wíinklil máak, u kajnáaliloʼob Israel yéetel u kajnáaliloʼob Judáeʼ pʼáatoʼob xan bey junpʼéel kʼaxnakʼ tiʼ teneʼ, tin beetaj utiaʼal ka kʼuchuk u beetubaʼob in kaajal,+ utiaʼal ka kʼaj óoltaʼak in kʼaabaʼ,+ utiaʼal ka alabartaʼaken yéetel utiaʼal ka ilaʼak minaʼan uláakʼ jeʼex teneʼ. Pero letiʼobeʼ maʼ tu yuʼuboʼob tʼaaniʼ›.+
12 Lelaʼ letiʼe baʼax unaj a tsʼáaik u yojéeltoʼobaʼ: ‹Lelaʼ letiʼe baʼax ku yaʼalik Jéeoba u Dios u kaajil Israelaʼ: «Tuláakal tinajaeʼ unaj u chuʼupul yéetel vino»›. Letiʼob túuneʼ yaan u yaʼalikoʼobtech: ‹A tuklikeʼ, ¿maʼ wa k-ojel de ke tuláakal tinajaeʼ unaj u chuʼupul yéetel vino?›.
13 Teech túuneʼ yaan a waʼaliktiʼob: ‹Jéeobaeʼ ku yaʼalik: «Uʼuy a wuʼuyeʼex, yaan in chupik u nakʼ tuláakal u kajnáaliloʼob luʼum tak ken káalchajkoʼob,+ bey xan ken in beetil tiʼ le reyoʼob ku kutaloʼob tu trono Davidoʼ, le sacerdoteʼoboʼ, le profetaʼoboʼ yéetel tiʼ tuláakal u kajnáaliloʼob Jerusalén.
14 Teen túuneʼ yaan in beetik u paklan kʼolkubaʼob utiaʼal u xíikloʼob, lelaʼ bey ken in beetil tiʼ taatatsiloʼob bey xan tiʼ paalaloʼob», leloʼ bey u yaʼalik Jéeoba.+ «Maʼ ken in chʼaʼ óotsilil tiʼob mix kun yaatal in wóol tu yoʼolaloʼob. Mix baʼal ken u kʼatuba tin beel utiaʼal maʼ in xuʼulsiktiʼob»›.+
15 Uʼuyeʼex yéetel chʼenxikinteʼex baʼax ku yaʼalaʼal.
Maʼ a taaskabaʼex nojbaʼalil, Jéeobaeʼ tsʼoʼok u tʼaan.
16 Alabarteʼex Jéeoba a Dioseʼex,antes u taasik éeʼjochʼeʼenilyéetel antes a tʼóochpajleʼex teʼ montañaʼob le táan u taal u yéeʼsameʼentaloʼ.
Teʼex túuneʼ yaan a páaʼtkeʼex u sáasiltal,pero letiʼeʼ yaan u beetik u sen éeʼjochʼeʼental.
Le sáasiloʼ yaan u sutik éeʼjochʼeʼenil.+
17 Chéen baʼaleʼ wa maʼ ta wóotik a wuʼuyeʼex tʼaaneʼ,yaan in x-mukul okʼol tu yoʼolal a kaʼanal ichileʼex.
Teneʼ yaan u sen yáalal u jaʼil in wich, yaan u sen chooj u jaʼil in wich,+tumen u tamanoʼob Jéeobaeʼ+ tsʼoʼok u chuʼukloʼob yéetel tsʼoʼok u bisaʼaloʼob.
18 Tiʼ le rey yéetel tiʼ u maamaoʼ*+ unaj a waʼalik: ‹Kulakeʼex luʼum,tumen yaan u lúubul le kiʼichkelem corona yaan ta pooleʼexoʼ›.
19 Le kaajoʼob yaan noojoloʼ kʼalaʼanoʼob,* minaʼan mix máak jeʼekʼabtikoʼob.
Tsʼoʼok u bisaʼal tuláakal u kajnáaliloʼob Judá, tsʼoʼok u láaj bisaʼaloʼob táanxel luʼumil.+
20 Líiʼs a wicheʼ ka a wil le máaxoʼob ku taal tu tojil xamanoʼ.+
¿Tuʼux tsʼoʼok le kiʼichkelem tamanoʼob kʼubéentaʼabtechoʼ?+
21 ¿Baʼax ken a waʼal le kéen castigartaʼakechtumen le máaxoʼob ta tuklaj jach a amigoʼoboʼ?+
¿Maʼ kan muʼyaj wa jeʼex u muʼyaj juntúul koʼolel ku síijsik u chaambaleʼ?*+
22 Le kéen a waʼal ichil a puksiʼikʼal: ‹¿Baʼaxten tsʼoʼok u yúuchulten le baʼaloʼobaʼ?›.+
Unaj a wojéeltikeʼ tu yoʼolal a nukuch kʼebanoʼobeʼ tsʼoʼok u piʼitil a falda,+yéetel tsʼoʼok u sen yaatal a tuunkuy.
23 ¿Jeʼel wa u páajtal u kʼexik u yootʼel juntúul cusita,* wa u kʼexik u color juntúul leopardoeʼ?+
Wa ka béeyakeʼ, teʼexeʼ jeʼel u páajtal a beetkeʼex baʼax maʼalobeʼ,kex kaʼansaʼaneʼex a beeteʼex baʼax maʼ maʼalobiʼ.
24 Yoʼolal leloʼ, teneʼ yaan in kʼiʼitbeskeʼex jeʼex u kʼiʼitbesaʼal sojol tumen le iikʼ ku taal teʼ desiertooʼ.+
25 Lelaʼ letiʼe baʼax kun úuchultechaʼ, letiʼe baʼax tsʼoʼok in jóoʼsik utiaʼal in tsʼáatechoʼ», leloʼ bey u yaʼalik Jéeoba,«tumen tsʼoʼok a tuʼubsiken+ yéetel ka kʼubik a wóol tiʼ tuusoʼob.+
26 Le oʼolal yaan in chʼúuyik a falda, yaan u pixik a wich,yéetel yaan u yilaʼal a chaknuulil,+
27 yaan u yilaʼal bix a sen kʼebantal,+ yaan u yilaʼal a kʼaakʼas tsʼíibolalyéetel bukaʼaj kʼaasil* a prostituirkaba.
Teneʼ tsʼoʼok in wilik le baʼaxoʼob jach kʼaastak ka beetik+yóokʼol le puʼukoʼoboʼ, le ka beetik teʼ luʼumoʼ.
¡Óotsilech Jerusalén!
¿Baʼax kʼiin u xuʼulul a beetik baʼaloʼob kʼaastak?».+
Notas
^ Wa «tiʼ le xunáanoʼ».
^ Wa «baʼpachtaʼanoʼob».
^ Tuláakʼ tuʼuxeʼ ku yaʼalaʼal «chaanpal».
^ Wa «etíope».
^ Wa «suʼtsil».
