Jeremías 24:1-10
-
Higoʼob maʼalobtak yéetel higoʼob maʼ maʼalobtakiʼ (1-10)
24 Le ka tsʼoʼokeʼ Jéeobaeʼ tu yeʼesajten kaʼapʼéel canasta higoʼob tsʼaʼan aktáan tiʼ u templo Jéeoba. Lelaʼ tu yeʼesajten ka tsʼoʼok u bisaʼal táanxel luʼumil Jeconías*+ u paal Jeoyakim,+ u reyil Judá. Letiʼeʼ bisaʼab paʼteʼ yéetel u príncipeiloʼob Judá, paʼteʼ yéetel le máaxoʼob ku beetkoʼob jatsʼuts baʼaloʼoboʼ bey xan yéetel le máaxoʼob meyajtik metaloʼ.* Letiʼobeʼ chʼaʼaboʼob Jerusaléneʼ ka bisaʼaboʼob Babilonia tumen Nabucodonosor, u reyil Babilonia.+
2 Tiʼ junpʼéel canastaeʼ yaan higoʼob jach maʼalobtakiʼ, jeʼex u yáax ich le higoʼoboʼ. Pero tiʼ uláakʼ canastaeʼ yaan higoʼob jach maʼ maʼalobtakiʼ, tumen tsʼoʼok u sen kʼastaloʼobeʼ maʼ tu páajtal u jaantaʼaloʼob.
3 Jéeoba túuneʼ tu kʼáatajten: «¿Baʼax ka wilik Jeremías?». Teen túuneʼ tin waʼalaj: «Táan in wilik higoʼob. Le higoʼob maʼalobtakoʼ jach táaj maʼalobtak. Pero le higoʼob maʼ maʼalobtakoʼ tsʼoʼok u jach kʼastaloʼob, tumen tsʼoʼok u sen kʼastaloʼobeʼ maʼ tu páajtal u jaantaʼaloʼob».+
4 Le ka tsʼoʼokeʼ Jéeobaeʼ tu tʼaneneʼ ka tu yaʼalaj:
5 «Lelaʼ letiʼe baʼax ku yaʼalik Jéeoba u Dios Israeloʼ: ‹Jeʼex le higoʼob maʼalobtakaʼ bey ken in wilil le u kajnáaliloʼob Judá bisaʼanoʼob táanxel luʼumiloʼ, le máaxoʼob tin beetaj u jóokʼloʼob way luʼum utiaʼal ka xiʼikoʼob tu luʼum le caldeoʼoboʼ.
6 Utiaʼal u bin utsil tiʼobeʼ maʼ ken in luʼs in paakat tu yóokʼoloʼob. Teneʼ yaan in beetik u suutoʼob way luʼumeʼ.+ Teneʼ yaan in beetik u bin utsil tiʼob, maʼ ken in xuʼulstiʼob. Yaan in pakʼikoʼob, maʼ ken in jóokpaytoʼob.+
7 Teneʼ yaan in tsʼáaiktiʼob junpʼéel puksiʼikʼal ku tsʼíiboltik u kʼaj óoltiken, letiʼob túuneʼ yaan u yojéeltikoʼob de ke teneʼ Jéeobaen.+ Letiʼobeʼ yaan u suutoʼob tin wiknal yéetel tuláakal u puksiʼikʼaloʼob,+ le oʼolal yaan u beetkubaʼob in kaajal, yéetel teneʼ yaan in beetkinba u Diosoʼob.+
8 Pero tu yoʼolal le higoʼob maʼ maʼalobtak, le tsʼoʼok u sen kʼastaloʼob maʼ tu páajtal u jaantaʼaloʼ,+ Jéeobaeʼ ku yaʼalik: «Bey ken in wilil Sedequías,+ u reyil Judáoʼ. Bey xan ken in wilil le príncipeʼoboʼ, le u yalab u kajnáaliloʼob Jerusalén pʼaatloʼob way luʼumeʼ, bey xan le bijaʼanoʼob kajtal tu luʼumil Egiptooʼ.+
9 Yaan in beetik u sen sajaktal tuláakal le luʼumoʼob le kéen u yiloʼob baʼax úuchtiʼoboʼ.+ Yaan u chʼiʼinil tu yichoʼob baʼax úuchtiʼob, yaan u yaʼalaʼal baʼal tiʼob, yaan u pʼaʼastaʼaloʼob yéetel yaan u maldecirtaʼaloʼob+ teʼ tuʼuxoʼob ken in kʼiʼitbesoʼoboʼ.+
10 Yaan in beetik u taal espada,+ wiʼijil yéetel kʼaakʼas kʼojaʼanil tu yóokʼoloʼob.+ Bey ken in xuʼulsiloʼob teʼ luʼum tin tsʼáaj tiʼ letiʼob yéetel tiʼ u yúuchben láakʼtsiloʼoboʼ»›».
Notas
^ Uláakʼ bix kʼaj óolaʼanileʼ Joaquín yéetel Conías.
^ Uláakʼ bix u traducirtaʼaleʼ «le máakoʼob ku beetkoʼob nukuch pakʼoʼoboʼ».
