Jeremías 36:1-32
36 Tu cuatro años káajak u reinar Jeoyakim+ u paal Josías, u reyil Judáeʼ, Jéeobaeʼ tu tʼanaj Jeremíaseʼ ka tu yaʼalajtiʼ:
2 «Chʼaʼ junpʼéel rolloeʼ* ka a tsʼíibt tuláakal le baʼax tsʼoʼok in waʼaliktech tu contra Israel, tu contra Judá+ yéetel tu contra tuláakal le kaajoʼoboʼ,+ le baʼaxoʼob tin waʼalajtech desde le yáax ka tin tʼanech tu kʼiiniloʼob Josías tak teʼ kʼiinaʼ.+
3 Maʼ xaaneʼ le kéen u yuʼub u kaajil Judá tuláakal le nojoch loob tsʼoʼok in chʼaʼtuklik in taasik tu yóokʼoloʼoboʼ, letiʼobeʼ jeʼel u pʼatkoʼob le bejoʼob maʼ maʼalobtak tuʼux ku binoʼoboʼ, teen túuneʼ yaan in perdonartik u kʼebanoʼob bey xan le baʼaloʼob maʼ maʼalobtak ku beetkoʼoboʼ».+
4 Le ka tsʼoʼokeʼ Jeremíaseʼ tu tʼanaj Baruk,+ u paal Neríaseʼ, ka tu yaʼalajtiʼ tuláakal le baʼax tsʼoʼok u yaʼalaʼaltiʼ tumen Jéeobaoʼ, Baruk túuneʼ tu tsʼíibtaj teʼ rollooʼ.+
5 Ka tsʼoʼokeʼ Jeremíaseʼ tu yaʼalaj tiʼ Baruk: «Teneʼ maʼ tu chaʼabal in wokol tu yotoch Jéeoba.
6 Le oʼolal teech unaj a wokol utiaʼal a kʼaʼam xokik le u tʼaan Jéeoba yaan teʼ rollooʼ, le rollo ta tsʼíibtaj le ka tin waʼalajtechoʼ. Unaj a xokik u yuʼub tuláakal le kaajoʼ, unaj a beetik tu kʼiinil táan u ayunaroʼob tu yotoch Jéeoba. Bey túunoʼ yaan a xokik u yuʼub tuláakal le máakoʼob ku taaloʼob tiʼ u kaajiloʼob Judáoʼ.
7 Maʼ xaaneʼ letiʼobeʼ jeʼel u oraroʼob tiʼ Jéeoba utiaʼal u chʼaʼabal óotsilil tiʼobeʼ, yéetel cada juntúul tiʼ letiʼobeʼ jeʼel u pʼatik le bej maʼ maʼalob ku biskoʼoboʼ, tumen Jéeobaeʼ tsʼoʼok u yaʼalik jach pʼujaʼan yéetel sen tsʼíikilnajaʼan tu contra le kaajaʼ».
8 Bey túunoʼ Baruk u paal Neríaseʼ tu beetaj tuláakal baʼax aʼalaʼabtiʼ tumen profeta Jeremías. Letiʼeʼ bin tu yotoch Jéeobaeʼ ka tu kʼaʼam xokaj le rollo tuʼux tu tsʼíibtaj le baʼax ku yaʼalik Jéeobaoʼ.+
9 Teʼ mes nueve,* tu cinco años káajak u reinar Jeoyakim+ u paal Josías, u reyil Judáeʼ, káaj u ayunar tu táan Jéeoba tuláakal u kajnáaliloʼob Jerusalén bey xan tuláakal le máakoʼob yanoʼob Jerusalén ku taaloʼob tiʼ le kaajoʼob yaan tu luʼumil Judáoʼ.+
10 Baruk túuneʼ tu kʼaʼam xokaj le baʼax aʼalaʼabtiʼ tumen Jeremías ka u tsʼíibt teʼ rollooʼ, tu xokaj tu yotoch Jéeoba teʼ cuarto* u tiaʼal Guemarías+ u paal Safán,+ le escribaoʼ,* teʼ táankab maas kaʼanal yaniloʼ, le yaan tu yookbal le túumben joonaj yaan tu yotoch Jéeobaoʼ.+ Letiʼeʼ tu xokaj u yuʼub tuláakal le kaajoʼ.
11 Le ka tu yuʼubaj Micaya u paal Guemarías, u paal Safán, u xoʼokol tuláakal le baʼax ku yaʼalik Jéeoba teʼ rollooʼ,
12 letiʼ túuneʼ bin tu yotoch* le reyoʼ, teʼ cuarto tuʼux ku meyaj le secretariooʼ. Teʼeloʼ tiʼ kulukbal kaʼach tuláakal le príncipeʼobaʼ:* Elisamá+ le secretariooʼ, Delayá u paal Semaya, Elnatán+ u paal Acbor,+ Guemarías u paal Safán, Sedequías u paal Aananías, bey xan tuláakal le u maasil príncipeʼoboʼ.
13 Micayaeʼ tu yaʼalajtiʼob tuláakal le baʼax xoʼok u yuʼub le kaajoʼ, tuláakal le baʼax tu xokaj Baruk teʼ rollooʼ.
14 Ka tsʼoʼokeʼ tuláakal le príncipeʼoboʼ tu túuxtoʼob Jeudí u paal Netanías, u paal Selemías u paal Cusí tu yiknal Baruk utiaʼal u yaʼaliktiʼ: «Koʼox, chʼaʼ le rollo ta xokaj u yuʼub le kaajoʼ». Baruk u paal Neríaseʼ tu chʼaʼaj le rollooʼ ka bin teʼ tuʼux yanoʼoboʼ.
15 Letiʼobeʼ tu yaʼaloʼobtiʼ: «Beet uts a kutal utiaʼal a xokik k-uʼuye». Le oʼolal Barukeʼ tu xokaj u yuʼuboʼob.
16 Ka tsʼoʼok u yuʼubikoʼob tuláakal le baʼax xoʼokoʼ sajakchajoʼobeʼ ka joʼopʼ u paktikubaʼob, ka tu yaʼaloʼob tiʼ Baruk: «Toʼoneʼ unaj k-tsʼáaik u yojéelt le rey tuláakal le baʼax tsʼoʼok k-uʼuyikoʼ».
17 Ka tsʼoʼokeʼ tu yaʼaloʼob tiʼ Baruk: «Beet uts a waʼaliktoʼon bix úuchik a tsʼíibtik tuláakal le tʼaanoʼobaʼ, ¿Jeremías wa aʼaltech?».
18 Barukeʼ tu yaʼalajtiʼob: «Letiʼ aʼalten tuláakal le tʼaanoʼobaʼ, teen túuneʼ tin chʼaʼaj tintaeʼ ka tin tsʼíibtaj teʼ rolloaʼ».
19 Le príncipeʼob túunoʼ tu yaʼaloʼob tiʼ Baruk: «Teech yéetel Jeremíaseʼ unaj a bin a taʼakabaʼex, mix máak unaj u yojéeltik tuʼux yaneʼex».+
20 Letiʼob túuneʼ binoʼob teʼ táankab tuʼux yaan le reyoʼ ka tu yaʼaloʼobtiʼ tuláakal le baʼax tu yuʼuboʼoboʼ, le rollooʼ tu pʼatoʼob teʼ cuarto tuʼux ku meyaj Elisamá le secretariooʼ.
21 Le rey túunoʼ tu túuxtaj Jeudí+ u chʼaʼ le rollooʼ, letiʼeʼ bin u chʼaʼ teʼ cuarto tuʼux ku meyaj Elisamá le secretariooʼ ka tu taasaj. Ka tsʼoʼokeʼ Jeudíeʼ káaj u xokik utiaʼal u yuʼubaʼal tumen le rey yéetel tumen tuláakal le príncipeʼob waʼalakbaloʼob naatsʼ tiʼ le reyoʼ.
22 Teʼ súutukoʼ le reyoʼ tiʼ kulukbal kaʼach teʼ naj tuʼux suuk u yantal tu kʼiiniloʼob keʼeloʼ, lelaʼ úuch teʼ mes nueveoʼ, mientras tiaʼan kaʼach le rey naatsʼ tiʼ junpʼéel nuʼukul tuʼux tʼabaʼan kʼáakʼoʼ.
23 Le kéen tsʼoʼokok kaʼach u xokik Jeudí óoxpʼéel wa kanpʼéel jaats tiʼ le baʼax tsʼíibtaʼanoʼ le reyoʼ ku chʼaʼik le cuchillo ku meyaj tiʼ le secretariooʼ ku xotik le tsʼoʼok u xoʼokloʼ, tsʼoʼoleʼ ku pulik ichil le kʼáakʼoʼ, bey úuchik u beetik tak ka tu láaj tóokaj le rollooʼ.
24 Letiʼobeʼ maʼ tu chʼaʼajoʼob saajkiliʼ. Le rey yéetel le máaxoʼob meyajtikoʼ kex tu yuʼuboʼob tuláakal le baʼax xoʼokoʼ maʼ tu jataj u nookʼoʼob utiaʼal u yeʼeskoʼob yaachajaʼan u yóoloʼobiʼ.
25 Kex Elnatán,+ Delayá+ yéetel Guemarías+ tu sen aʼaloʼob tiʼ le rey maʼ u tóokik le rollooʼ letiʼeʼ maʼ tu yuʼubaj baʼax ku yaʼalikoʼobiʼ.
26 Tsʼoʼoleʼ le reyoʼ tu yaʼalaj tiʼ Jerameel u hijo, tiʼ Seraya u paal Azriel yéetel tiʼ Selemías u paal Abdeel ka xiʼik u machoʼob Baruk le secretariooʼ bey xan profeta Jeremías, chéen baʼaleʼ taʼakaʼaboʼob tumen Jéeoba.+
27 Le tsʼokaʼaniliʼ u tóokaʼal le rollo tumen le rey, le tuʼux tu tsʼíibtaj Baruk le baʼax aʼalaʼabtiʼ tumen Jeremíasoʼ,+ Jéeobaeʼ tu kaʼa tʼanaj Jeremíaseʼ ka tu yaʼalajtiʼ:
28 «Chʼaʼ uláakʼ junpʼéel rolloeʼ ka a tsʼíibt le baʼaxoʼob ta tsʼíibtaj teʼ rollo tóokaʼab tumen Jeoyakim u reyil Judáoʼ.+
29 Techeʼ unaj a waʼalik tiʼ Jeoyakim u reyil Judá: ‹Lelaʼ letiʼe baʼax ku yaʼalik Jéeobaaʼ: «Techeʼ ta tóokaj le rollooʼ yéetel ta waʼalaj: ‹¿Baʼaxten ta tsʼíibtaj teʼ rollooʼ: «U reyil Babiloniaeʼ yaan u taal yéetel yaan u xuʼulsik tiʼ le luʼumaʼ, yaan u míistik u kajnáaliloʼob bey xan u baʼalcheʼiloʼob»?›.+
30 Le oʼolal Jéeobaeʼ ku yaʼalik yoʼolal Jeoyakim u reyil Judá: ‹Mix juntúul u paalal kun pʼáatal kutal tu trono David.+ Le kéen kíimkeʼ chéen bey kun pʼáatal pektal u wíinkliloʼ, de díaeʼ yaan u juʼulul tumen Kʼiin yéetel de áakʼabeʼ yaan u kʼáaxal síis tu yóokʼol.+
31 Tu yoʼolal le baʼaloʼob maʼ maʼalobtak u beetmoʼoboʼ yaan in kʼáatik cuenta tiʼ letiʼ, tiʼ u paalal bey xan tiʼ u j-meyajoʼob. Tuláakal le nojoch loob in waʼalmoʼ yaan in taasik tu yóokʼol le máakoʼobaʼ, tu yóokʼol u kajnáaliloʼob Jerusalén yéetel tu yóokʼol le xiiboʼob yaan Judáoʼ,+ tumen mix juntúul tiʼ letiʼob tu yuʼubaj in tʼaaniʼ›»›».+
32 Jeremías túuneʼ tu chʼaʼaj uláakʼ junpʼéel rolloeʼ ka tu tsʼáaj tiʼ Baruk u paal Nerías, le secretariooʼ.+ Ka tsʼoʼokeʼ Barukeʼ tu tsʼíibtaj le baʼax aʼalaʼabtiʼ tumen Jeremíasoʼ, tuláakal le baʼax tsʼíibtaʼan kaʼach teʼ rollo tóokaʼab tumen Jeoyakim u reyil Judáoʼ.+ Teʼ rolloaʼ tsʼíibtaʼab xan yaʼab uláakʼ baʼaloʼob jeʼex le jeʼeloʼobaʼ.
Notas
^ Ilawil página 2577.
^ Lelaʼ ku káajal desde tu chúumuk noviembre tak tu chúumuk diciembre.
^ Wa «teʼ tuʼux ku yúuchul janal».
^ Ilawil página 2562.
^ Wa «le máaxoʼob tsʼaʼan autoridad tiʼoboʼ».
^ Wa «palacio».
