Jeremías 5:1-31
5 Máankeʼex teʼ bejoʼob yaan ichil u kaajil Jerusalénoʼ.
Paakatnakeʼex tuláakal tuʼux yéetel jach pʼil a wicheʼex.
Kaaxannakeʼex tu kʼíiwikiloʼob.
Wa ka kaxtikeʼex juntúul máax ku beetik baʼax toj+yéetel ku yilik u chúukpajal u yóoleʼ,teneʼ yaan in perdonartik le kaajoʼ.
2 Kex ka u yaʼaloʼob: «¡Kin jurartik tu kʼaabaʼ Jéeoba, le Dios kuxaʼanoʼ!»,láayliʼ jeʼel u tuusoʼob le kéen jurarnakoʼobeʼ.+
3 Jéeoba Dios, ¿maʼ wa a wichoʼobeʼ táan u kaxtikoʼob juntúul máax chúukaʼan u yóol?+
Techeʼ ta castigartaj a kaajal, pero letiʼobeʼ maʼ yaj tu yuʼubiloʼobiʼ,*ta sen loobiltoʼob, pero maʼ kaanbalnajoʼob tiʼ leloʼ.+
Letiʼobeʼ tu maas chichkúuntaj u puksiʼikʼaloʼob* ke junpʼéel tuunich,+yéetel maʼ tu yóotoʼob suut ta wiknaliʼ.+
4 Teneʼ tin máansaj tin tuukul: «Letiʼe máaxoʼob óotsiloʼob beetik beyoʼ,ku beetkoʼob baʼaloʼob minaʼan u cuentail, tumen maʼ u yojloʼob baʼax uts tu tʼaan Jéeobaiʼ,maʼ u kʼaj óoloʼob u ley u Diosoʼobiʼ.
5 Le oʼolal yaan in bin tʼaan yéetel le máaxoʼob yaan páajtalil tiʼoboʼ,tumen letiʼobeʼ in waʼalikeʼ u yojloʼob baʼax uts tu tʼaan Jéeoba,u kʼaj óoloʼob u ley u Diosoʼob.+
Pero letiʼobeʼ tsʼokaʼaniliʼ bakáan u kachkoʼob le u cheʼil kuuchoʼyéetel tsʼokaʼaniliʼ u kotskoʼob le baʼax kʼaxmiloʼoboʼ».
6 Le oʼolal ku atacartaʼaloʼob tumen le leónoʼob yanoʼob kʼáaxoʼ,ku xuʼulsaʼaltiʼob tumen le loboʼob yanoʼob desiertooʼ,yéetel yaan leopardoʼob ku chʼúukoʼob naatsʼ tiʼ u kaajaloʼob.
Tuláakal máax ku jóokʼol tiʼ le kaajoʼoboʼ ku xeʼexetʼaʼal.
Letiʼobeʼ yaʼab baʼaxoʼob maʼ maʼalob ku beetkoʼobiʼ,tsʼoʼok u sen eʼeskoʼob maʼ chúukaʼan u yóoloʼobiʼ.+
7 In kaajal, ¿bix jeʼel in perdonarkech tu yoʼolal lelaʼ?
A paalaloʼobeʼ tsʼoʼok u xúumpʼatkenoʼob,yéetel ku juraroʼob tu yoʼolal baʼax maʼ Diosiʼ.+
Teneʼ tin tsʼáaj tuláakal baʼax kʼaʼabéettiʼob,pero letiʼobeʼ maʼ xuʼul u traicionarkenoʼobiʼ,yéetel ku muchʼkubaʼob utiaʼal u binoʼob tu yotoch juntúul koʼolel chéen bey u máanoʼ.
8 Beyoʼob tsíiminoʼob táan u yawatoʼob yéetel táan u kaxkubaʼobeʼ,táan u máan u choko pooliloʼob tu paach u yatan u yéet xiibiloʼob.+
9 Jéeobaeʼ ku yaʼalik: «¿Maʼ wa unaj in kʼáatiktiʼob cuenta tu yoʼolal le baʼax ku beetkoʼoboʼ?
Junpʼéel kaaj beyaʼ, ¿maʼ wa unaj in boʼotiktiʼ baʼax ku beetkiʼ?».+
10 «Xeeneʼex ichil u pakʼal uvaʼobeʼ ka a kʼaskúunteʼex,pero maʼ a láaj xuʼulskeʼex.+
Chʼakeʼex le u túumben kʼaboʼoboʼtumen maʼ u tiaʼaloʼob Jéeobaiʼ.
11 Beeteʼex beyoʼ tumen u kaajil Israel yéetel u kaajil Judáeʼtsʼoʼok u sen traicionarkenoʼob», leloʼ bey u yaʼalik Jéeoba.+
12 «Letiʼobeʼ tsʼoʼok u sutik u paachoʼob tiʼ Jéeoba yéetel maʼ tu xuʼulul u yaʼalikoʼob:
‹Letiʼeʼ mix baʼal ken u beete.*+
Maʼ kun taal mix junpʼéel loob t-óokʼol.
Maʼ ken k-il espada mix wiʼijil›.+
13 Le profetaʼoboʼ ku yaʼalikoʼob baʼaloʼob minaʼan u biilal,minaʼan u tʼaan Dios tu chiʼob.
¡Pʼáatkoʼob mix baʼal u biilaloʼob jeʼex le baʼaxoʼob ku yaʼalikoʼoboʼ!».
14 Le beetik túuneʼ, Jéeoba le Dios gobernartik le ángeloʼoboʼ, ku yaʼalik:
«Tu yoʼolal baʼax ku yaʼalik le máakoʼoboʼ,teneʼ yaan in beetik u pʼáatal bey junpʼéel kʼáakʼ in tʼaanoʼob ta chiʼeʼ,+le kaajoʼ letiʼ u siʼil,yaan u láaj tóokaʼaloʼob».+
15 Jéeobaeʼ ku yaʼalik: «U kaajil Israel, desde náachil ken in beet u taal junpʼéel kaaj ta wóokʼol.+
Junpʼéel úuchben kaaj,junpʼéel kaaj úuch yanak,junpʼéel kaaj maʼ a wojel bix u tʼaaniʼ,yéetel mix tu páajtal a naʼatik u tʼaan.+
16 Tuláakloʼobeʼ jach u yojloʼob baʼateʼel,le nuʼukul tuʼux ku tsʼáaik u flechaʼoboʼ bey junpʼéel muknal jeʼekʼabeʼ.
17 Letiʼobeʼ yaan u jaantikoʼob u yich a paakʼal bey xan le baʼax yaan utiaʼal a jaantoʼ,+yaan u jaantikoʼob a hijoʼob yéetel a hijaʼob,yaan u jaantikoʼob a walakʼ tamanoʼob yéetel a waakaxoʼob,yaan u jaantikoʼob u yich a pakʼal uva yéetel a pakʼal higo,yaan u xuʼulskoʼob yéetel espada le kaajoʼob kaʼanal u pakʼiloʼob ka kʼubik a wóol tiʼoboʼ».
18 Jéeobaeʼ ku yaʼalik: «Chéen baʼaleʼ tak teʼ kʼiinoʼob jeʼeloʼ maʼ ken in láaj xuʼulsteʼex.+
19 Le kéen u kʼáatoʼob: ‹¿Baʼaxten tsʼoʼok u beetiktoʼon Jéeoba Dios tuláakal le baʼaloʼobaʼ?›. Teʼex túuneʼ unaj a waʼalikeʼextiʼob: ‹Jeʼex le tiaʼaneʼex ta luʼumeʼex ta xúumpʼatteʼex a Dioseʼex utiaʼal a adorarkeʼex juntúul dios táanxel luʼumileʼ bey ken a meyajtileʼex j-táanxel luʼumiloʼob tiʼ junpʼéel luʼum maʼ a tiaʼaleʼexiʼ›».+
20 Tiʼ u kajnáaliloʼob u yotoch Jacobyéetel tiʼ u luʼumil Judáeʼ, aʼaleʼex lelaʼ:
21 «J-maʼ naʼat kaaj, satal óol kaaj,*+ uʼuy lelaʼ:
teʼexeʼ yaan a wicheʼex, pero maʼ ta paakateʼex,+yaan a xikneʼex, pero maʼ ta wuʼuyikeʼex mix baʼal.+
22 Jéeobaeʼ ku yaʼalik: ‹¿Maʼ wa saajkeʼex tiʼ teniʼ?
¿Maʼ wa unaj a kikilankileʼex tin táaniʼ?
Teen tsʼáa le arena utiaʼal u kʼatik u beel le kʼáaʼnáaboʼ,jeʼel bukaʼaj kʼiinoʼob ka máankeʼ maʼ tu páajtal u kʼáatmáansik,kex jeʼel bukaʼaj ka u woʼoltubaeʼ maʼ tu páajtal u chʼaktik,kex kʼaʼam u juumeʼ maʼ tu páajtal u táatsʼmáansik.+
23 In kaajaleʼ tsʼuʼuy u puksiʼikʼal yéetel maʼ tu yuʼubik tʼaan,tsʼoʼok u pʼatkoʼob in beel utiaʼal u binoʼob teʼ bej uts tu tʼaanoʼoboʼ.+
24 Letiʼobeʼ maʼatech u yaʼalikoʼob ichil u puksiʼikʼaloʼob:
«Koʼoneʼex meyajtik Jéeoba Dios,le máax beetik u kʼáaxal jaʼ tu kʼiiniloʼ,le máax beetik u kʼáaxal le yáax cháakoʼ bey xan le pachaloʼ,le máax ku yilik maʼ u xuʼulul u yantal cosechaoʼ».+
25 Le baʼaxoʼob ka beetkeʼexoʼ letiʼ beetik u xuʼulul u taal le utsiloʼobaʼ,a kʼebaneʼex beetik u xuʼulul a kʼamkeʼex baʼaloʼob maʼalobtak.+
26 Yaan kʼasaʼan máakoʼob ichil in kaajal,letiʼobeʼ maʼ tu xuʼulul u chʼúukoʼob jeʼex le máaxoʼob ku chukikoʼob chʼíichʼoʼoboʼ.
Letiʼobeʼ ku tsʼáaikoʼob junpʼéel trampa utiaʼal kiimsaj.
Letiʼobeʼ ku chukikoʼob máakoʼob.
27 U yotochoʼobeʼ chuup yéetel tuus,+jeʼex junpʼéel jaula chuup yéetel chʼíichʼoʼobeʼ.
Le oʼolal tsʼoʼok u ayikʼaltaloʼob yéetel yaan páajtalil tiʼob.
28 Tsʼoʼok u poloktaloʼob yéetel tsʼitsʼiʼkil u yootʼeloʼob.
Bey tuul ku beetik u kʼasaʼaniloʼobeʼ.
Maʼatech u beetkoʼob justicia tiʼ le paalaloʼob minaʼan u papáʼoboʼ,+letiʼobeʼ chéen ku kaxtik u yutsiloʼob,maʼatech xan u beetkoʼob justicia tiʼ le óotsiloʼoboʼ›».+
29 Jéeobaeʼ ku yaʼalik: «¿Maʼ wa unaj in kʼáatiktiʼob cuenta tu yoʼolal le baʼax ku beetkoʼoboʼ?
Junpʼéel kaaj beyaʼ, ¿maʼ wa unaj in boʼotiktiʼ baʼax ku beetkiʼ?
30 Yaan junpʼéel baʼax jach táaj kʼaas ku yúuchul way luʼumeʼ:
31 le profetaʼoboʼ chéen tuus ku beetkoʼob,+le sacerdoteʼoboʼ ku pechʼ óoltikoʼob máak yéetel le páajtalil yaantiʼoboʼ.
In kaajaleʼ uts tu tʼaan le baʼaloʼob beyoʼ.+
Chéen baʼaleʼ, ¿baʼax ken a beeteʼex le kéen kʼuchuk u xuul tuláakal baʼal?».
Notas
^ Ich hebreoeʼ ku yaʼalaʼal kaʼach «letiʼobeʼ maʼ pʼáat minaʼan u muukʼoʼobiʼ».
^ Ich hebreoeʼ ku yaʼalaʼal kaʼach «u yichoʼob».
^ Uláakʼ bix u traducirtaʼaleʼ «Letiʼeʼ maʼ jaaj wa yaniʼ».
^ Ich hebreoeʼ ku yaʼalaʼal kaʼach «J-maʼ naʼat kaaj minaʼan u puksiʼikʼal».
