Jeremías 52:1-34
52 Veintiún años yaan kaʼach tiʼ Sedequías+ ka káaj u reinar, yéetel 11 años xáanchaj táan u reinar tu kaajil Jerusalén. U kʼaabaʼ u maamaeʼ Amutal,+ u hija Jeremías, juntúul máak ku taal tiʼ u kaajil Libná.
2 Sedequíaseʼ seguernaj u beetik baʼax kʼaas tu táan Jéeoba jeʼex úuchik u beetik Jeoyakimeʼ.+
3 Tuláakal le baʼax úuch tu kaajil Jerusalén yéetel tu luʼumil Judáoʼ tu beetaj u sen pʼuʼujul Jéeoba, le oʼolal tu luʼsoʼob tu táan.+ Sedequías túuneʼ tu tsʼáajuba tu contra u reyil Babilonia.+
4 Teʼ día diez tiʼ le mes diezoʼ,* Nabucodonosor u reyil Babiloniaeʼ taal yéetel tuláakal u ejército utiaʼal u baʼateʼel tu contra Jerusalén, lelaʼ úuch nueve años káajak u reinar Sedequías. Letiʼobeʼ tu baʼpachtoʼob Jerusaléneʼ ka tu líiʼsoʼob junpʼéel pakʼ tu baʼpach.+
5 Baʼpachtaʼab le kaaj tak le ka tu chukaj 11 años káajak u reinar Sedequíasoʼ.
6 Teʼ día nueve tiʼ le mes cuatrooʼ*+ jach táan kaʼach u muʼyajtaʼal wiʼijil teʼ kaajoʼ tumen minaʼan mix baʼal utiaʼal u jaant le máakoʼoboʼ.+
7 Ka tsʼoʼokeʼ jenaʼab junxóotʼ tiʼ u pakʼil le kaajoʼ, tuláakal le soldadoʼob túunoʼ púutsʼoʼob de áakʼab, jóokʼoʼob teʼ joonaj yaan teʼ tuʼux yaan le kaʼapʼéel pakʼoʼoboʼ, naatsʼ tiʼ u jardín le reyoʼ. Letiʼobeʼ púutsʼoʼob le táan u baʼpachtaʼal le kaaj tumen le caldeoʼoboʼ ka binoʼob teʼ bej ku bin tu tojil le Arabáoʼ.+
8 Chéen baʼaleʼ le soldadoʼob caldeoʼoboʼ tu chʼaʼpachtoʼob Sedequíaseʼ+ ka tu chukpachtoʼob teʼ tu desiertoil Jericóoʼ, tuláakal túun u soldadoʼob le reyoʼ kʼiʼitpajoʼob.
9 Le caldeoʼoboʼ tu machoʼob rey Sedequíaseʼ ka tu bisoʼob tu táan u reyil Babilonia tu kaajil Riblá, le yaan tu luʼumil Amatoʼ, teʼeloʼ tiʼ aʼalaʼab tumen le rey baʼax kun beetbil tiʼ Sedequíasoʼ.
10 U reyil Babiloniaeʼ tu kíimsaj u paalaloʼob Sedequías, lelaʼ tu beetaj tu táan Sedequías. Letiʼeʼ tu kíimsaj xan u príncipeiloʼob Judá tu kaajil Riblá.
11 Ka tsʼoʼokeʼ u reyil Babiloniaeʼ tu chʼóopkintaj Sedequías,+ tu encadenartaj yéetel cadenaʼob de cobreeʼ ka tu bisaj u kʼal Babilonia, teʼeloʼ tiʼ pʼáat tak ka kíimiʼ.
12 Teʼ día diez tiʼ le mes cincooʼ,* Nebuzaradáneʼ ook tu kaajil Jerusalén.+ Lelaʼ úuch 19 años káajak u reinar Nabucodonosor u reyil Babilonia. Nebuzaradáneʼ u nojchil le soldadoʼob kanáantik le reyoʼ, letiʼeʼ ku meyajtik kaʼach le reyoʼ.
13 Nebuzaradáneʼ tu tóokaj u yotoch Jéeoba,+ u yotoch* le reyoʼ bey xan tuláakal le najoʼob yanoʼob tu kaajil Jerusalénoʼ, tu tóokaj xan tuláakal le nukuch najoʼoboʼ.
14 Tuláakal le soldadoʼob caldeoʼob yanoʼob yáanal u nuʼuktaj Nebuzaradáneʼ tu jenoʼob tuláakal le pakʼoʼob yanoʼob tu baʼpach u kaajil Jerusalénoʼ.+
15 Nebuzaradán, u nojchil le soldadoʼob kanáantik le reyoʼ, tu chʼaʼaj u bis Babilonia jujuntúul tiʼ le máaxoʼob óotsiloʼoboʼ bey xan le u yalab le máakoʼob pʼataʼanoʼob kaʼach teʼ kaajoʼ. Tu chʼaʼaj xan u bis le máaxoʼob tu tsʼáajubaʼob tu tséel u reyil Babiloniaoʼ bey xan le u maasil máakoʼob jach u yojloʼob meyajoʼ.+
16 Chéen baʼaleʼ Nebuzaradán u nojchil le soldadoʼob kanáantik le reyoʼ, tu pʼataj jujuntúul tiʼ le máaxoʼob maas óotsiltak utiaʼal ka meyajnakoʼob bey esclavoʼobeʼ, tu pʼatoʼob utiaʼal ka u meyajtoʼob le luʼumoʼ bey xan le tuʼux pakʼaʼan uvaoʼ.+
17 Le caldeoʼoboʼ tu xoʼoxotʼoʼob le columnaʼob de cobre+ yanoʼob tu yotoch Jéeobaoʼ, le carretillaʼoboʼ+ bey xan le nuxiʼ pila de cobre+ yaan kaʼach tu yotoch Jéeobaoʼ, ka tu láaj bisoʼob le cobre tak Babiloniaoʼ.+
18 Letiʼobeʼ tu chʼaʼajoʼob xan tuláakal le chʼóoyoʼoboʼ, le palaʼoboʼ, le nuʼukuloʼob utiaʼal u tuʼupul kʼáakʼoʼ, le nukuch tazaʼoboʼ,+ le copaʼoboʼ+ bey xan tuláakal le nuʼukuloʼob de cobre ku meyajoʼob kaʼach teʼ templooʼ.
19 Nebuzaradáneʼ tu chʼaʼaj le palanganaʼoboʼ,+ le nuʼukuloʼob utiaʼal u tsʼaʼabal chúukoʼ, le nukuch tazaʼoboʼ, le chʼóoyoʼoboʼ, le candelabroʼoboʼ,+ le copaʼoboʼ bey xan le nukuch tazaʼob beetaʼanoʼob de oro puro bey xan yéetel maʼalob plataoʼ.+
20 Maʼ páajchaj u pʼiʼisil u aalil u cobreil le kaʼapʼéel columnaʼoboʼ, le nuxiʼ pilaoʼ, le 12 u túulal toroʼob de cobre+ tuʼux etsʼekbal le nuxiʼ pilaoʼ bey xan le carretillaʼob beetaʼan kaʼach tumen rey Salomón utiaʼal u yotoch Jéeobaoʼ.
21 U kaʼanlil cada junpʼéel columnaeʼ kex 8 metros,* utiaʼal u pʼiʼisil u polkil cada junpʼéeleʼ kʼaʼabéet junpʼéel suum de 5 metros yéetel 34 centímetros,*+ cada columnaeʼ 4 dedos u piimil yéetel jóojochil.
22 Tu puntaeʼ tsʼaʼan junpʼéel nuxiʼ adorno de cobreiʼ. U kaʼanlil le adornooʼ dos metros yéetel 22 centímetros,*+ tu baʼpach le adornoaʼ tsʼaʼan adornoʼob de u forma junpʼéel red bey xan granadas, tuláakal le baʼaloʼobaʼ beetaʼanoʼob de cobre. Le u kaʼapʼéel columnaoʼ jach igual yéetel le u yáaxoʼ, bey xan le granadas yanoʼ.
23 Tiʼ cada tséeleʼ yaan kaʼach 96 granadas. Tuláakal le granadas yaan tu baʼpach le redoʼ 100 u pʼéelal.+
24 Nebuzaradáneʼ tu bisaj Seraya+ u nojchil le sacerdoteʼoboʼ, tu bisaj Sofonías+ le sacerdote áantik le u nojchil le sacerdoteʼoboʼ, yéetel tu bisaj le óoxtúul máakoʼob kanáantik le joonajoʼ.+
25 Tu bisaj xan juntúul máax tsʼaʼan autoridad tiʼ yóokʼol le soldadoʼoboʼ, tu bisaj siete u túulal máakoʼob yanoʼob teʼ kaaj ku tsʼáaikoʼob consejo tiʼ le reyoʼ, yéetel tu bisaj xan u secretario le máax nuʼuktik le ejércitooʼ, le secretarioaʼ letiʼe máax muchʼik le máakoʼob yanoʼob teʼ kaaj utiaʼal ka xiʼikoʼob baʼateloʼ. Nebuzaradáneʼ tu bisaj xan 60 u túulal tiʼ le máakoʼob yanoʼob teʼ kaajoʼ.
26 Letiʼeʼ tu chʼaʼaj tuláakal le máakoʼobaʼ ka tu bisoʼob tak tu kaajil Riblá tu yiknal u reyil Babilonia.
27 U reyil Babilonia túuneʼ tu láaj kíimsoʼob tu kaajil Riblá,+ le kaajaʼ tiaʼan kaʼach tu luʼumil Amateʼ. Ka tsʼoʼokeʼ u kajnáaliloʼob Judáeʼ bisaʼaboʼob táanxel luʼumil.+
28 Tu siete años káajak u reinar Nabucodonosoreʼ tu bisaj 3,023 u túulal judíoʼob.+
29 Tu 18 años káajak u reinar Nabucodonosoreʼ+ bisaʼab 832 u kajnáaliloʼob Jerusalén.
30 Tu 23 años káajak u reinar Nabucodonosoreʼ, Nebuzaradán u nojchil le soldadoʼob kanáantik le reyoʼ tu bisaj 745 judíoʼob.+
Tuláakal le máaxoʼob bisaʼaboʼoboʼ 4,600 u túulal.
31 Teʼ año ka káaj u reinar Evil-merodak, u reyil Babiloniaeʼ, tu beetaj u jáalkʼabtaʼal Joaquín,+ u reyil Judá. Lelaʼ úuch teʼ día 25 tiʼ le mes 12,* le tsʼokaʼaniliʼ u máan 37 años kʼaʼalak Joaquín,+ u reyil Judáoʼ.
32 Evil-merodakeʼ maʼalob bix úuchik u tratartik Joaquín, tu beetaj ka maas respetartaʼak ke le u maasil reyoʼob yanoʼob tu yéetel teʼ Babiloniaoʼ.
33 Joaquín túuneʼ tu luʼsaj le nookʼ u tsʼaamaj le kʼalaʼan kaʼachoʼ, ka joʼopʼ u janal tu táan le reyoʼ, bey úuchik u beetik tuláakal u kʼiiniloʼob u kuxtaloʼ.
34 Sáamsamal kaʼach ku tsʼaʼabal u yoʼoch jeʼex u yaʼalmil u reyil Babiloniaoʼ, bey úuchik u beetaʼal tuláakal u kʼiiniloʼob u kuxtaloʼ, bey úuchik u beetaʼal tak ka kíimoʼ.
Notas
^ U kʼaabaʼ le mesaʼ Tebet.
^ U kʼaabaʼ le mesaʼ Tamuz.
^ U kʼaabaʼ le mesaʼ Ab.
^ Wa «palacio».
^ Ich hebreoeʼ ku yaʼalaʼal kaʼach «18 codos». Ilawil «Codo», página 2559.
^ Ich hebreoeʼ ku yaʼalaʼal kaʼach «12 codos».
^ Ich hebreoeʼ ku yaʼalaʼal kaʼach «cinco codos».
^ U kʼaabaʼ le mesaʼ Adar. Ilawil «Adar», página 2554.
