Jonás 1:1-17
1 Jéeobaeʼ* tu tʼanaj Jonás*+ u hijo Amitayeʼ ka tu yaʼalajtiʼ:
2 «Líiʼkech, xeen tu kaajil Nínive,+ le nojoch kaajoʼ. Aʼal tiʼ u kajnáaliloʼob yaan u xuʼulsaʼaltiʼob, tumen tsʼoʼok in wilik le baʼaloʼob kʼaastak ku beetkoʼoboʼ».
3 Chéen baʼaleʼ Jonáseʼ tu yóotaj púutsʼul tiʼ Jéeoba, le oʼolal jóokʼ u binbal tak tu kaajil Tarsis. Letiʼeʼ bin Jopeeʼ ka tu yilaj junpʼéel barco ku bin tak Tarsis, tu boʼotaj u pasajeeʼ ka naʼak teʼ barco utiaʼal u bin yéetel le máakoʼoboʼ. Bey tu beetil utiaʼal u púutsʼul tiʼ Jéeobaoʼ.
4 Jéeoba túuneʼ tu beetaj u yantal junpʼéel kʼaʼamkach iikʼ teʼ kʼáaʼnáaboʼ, leloʼ tu beetaj u yantal junpʼéel ciclón jach óolak u beet u kaʼakachpajal le barcooʼ.
5 Le marineroʼoboʼ jach táaj sajakchajoʼob, le oʼolal cada juntúuleʼ joʼopʼ u yawtik tiʼ u dios ka áantaʼakoʼob. Utiaʼal túun u sáalkuntkoʼob+ le barcooʼ joʼopʼ u pulkoʼob teʼ kʼáaʼnáab le baʼaloʼob yaan ichiloʼ. Chéen baʼaleʼ Jonáseʼ tsʼokaʼaniliʼ u yéemel teʼ tu bodegail le barcooʼ, chilikbal yéetel jach tʼuubul u wenel kaʼachi.
6 U capitánil le barco túunoʼ bin tu yiknaleʼ ka tu yaʼalajtiʼ: «¿Bix u páajtal a wenel beyaʼ? ¡Líiʼkech, orarnen tiʼ a dios! Maʼ xaaneʼ le u jaajil Diosoʼ jeʼel u chʼaʼiktoʼon óotsilil yéetel jeʼel k-salvartikbaeʼ».+
7 Le marineroʼob túunoʼ joʼopʼ u yaʼalikoʼob tu baatsiloʼob: «Koʼoteneʼex, koʼoneʼex buul*+ utiaʼal k-ilik tiʼ máax yaan u culpail le baʼax táan u yúuchlaʼ». Le ka tsʼoʼok u buuloʼobeʼ tu yiloʼobeʼ lúub yóokʼol Jonás.+
8 Letiʼobeʼ tu yaʼaloʼobtiʼ: «Beet uts a waʼaliktoʼon, ¿tiʼ teech wa yaan u culpail le baʼax táan u yúuchlaʼ? ¿Baʼax meyajil ka beetik? ¿Tuʼux a taal? ¿Tiʼ baʼax luʼumil a taal? ¿Tuʼux a kaajal?».
9 Jonás túuneʼ tu núukaj: «Teneʼ juntúul hebreoen, kin adorartik Jéeoba le Dios yaan teʼ kaʼanoʼ, le máax beet le kʼáaʼnáab yéetel le luʼumoʼ».
10 Le ka tu yuʼuboʼob lelaʼ, le máakoʼoboʼ tu maas chʼaʼajoʼob saajkil, ka tu kʼáatoʼobtiʼ: «¿Baʼax tsʼoʼok a beetik beyaʼ?». (Le máakoʼoboʼ tu yojéeltoʼob táan kaʼach u púutsʼul Jonás tiʼ Jéeoba, tumen Jonás aʼaltiʼob).
11 Letiʼobeʼ tu kʼáatoʼobtiʼ: «¿Baʼax unaj k-beetiktech utiaʼal u jéetsʼel le kʼáaʼnáaboʼ?». Bey tu yaʼaliloʼoboʼ tumen le kʼáaʼnáaboʼ táan u bin u maas woʼoltikuba.
12 Letiʼeʼ tu núukajtiʼob: «Píikchʼinteneʼex teʼ kʼáaʼnáaboʼ utiaʼal beyoʼ ka jéetsʼek, tumen in culpa úuchik u taal le ciclón ta wóokʼoleʼexaʼ».
13 Chéen baʼaleʼ tu lugar u beetkoʼob leloʼ, le máakoʼoboʼ tu beetoʼob tuláakal le ku páajtal utiaʼal u suut le barco tak teʼ jáal jaʼoʼ, pero maʼ páajchajoʼobiʼ tumen le kʼáaʼnáaboʼ joʼopʼ u maas woʼoltikuba.
14 Le máakoʼob túunoʼ joʼopʼ u kʼaʼam aʼalikoʼob tiʼ Jéeoba: «¡Jéeoba, maʼ a chaʼik k-kíimil tu culpa le máakaʼ! Jéeoba, maʼ a waʼalik wa tiʼ toʼon yaan u culpail u kíimil juntúul máak inocente, tumen le baʼax táan u yúuchlaʼ bey a kʼáat ka úuchkoʼ».
15 Letiʼob túuneʼ tu machoʼob Jonáseʼ ka tu puloʼob teʼ kʼáaʼnáaboʼ, le kʼáaʼnáab túunoʼ xuʼul u woʼoltikuba.
16 Le máakoʼob túunoʼ tu jach respetartoʼob Jéeoba.+ Letiʼobeʼ tu kʼuboʼob junpʼéel sacrificio tiʼ Jéeoba ka tu prometertoʼob yaan u meyajtikoʼob.
17 Jéeoba túuneʼ tu túuxtaj juntúul nuxiʼ kay utiaʼal ka luʼukʼuk Jonás, Jonás túuneʼ tu máansaj óoxpʼéel kʼiin yéetel óoxpʼéel áakʼab ichil u nakʼ le nuxiʼ kayoʼ.+
