Jonás 3:1-10
3 Jéeoba túuneʼ tu kaʼa tʼanaj Jonáseʼ ka tu yaʼalajtiʼ:+
2 «Líiʼkech, xeen tu noj kaajil Níniveeʼ+ ka a waʼal tiʼ u kajnáaliloʼob le baʼax tin waʼalajtechoʼ».
3 Jonás túuneʼ tu yuʼubaj u tʼaan Jéeoba,+ líikʼeʼ ka bin Nínive.+ Níniveeʼ junpʼéel kaaj jach nojoch* kaʼachi, tres días ku bisik u xíimbaltaʼal.
4 Jonás túuneʼ ook teʼ kaajoʼ ka xíimbalnaj junpʼéel kʼiin, letiʼeʼ táan kaʼach u yaʼalik lelaʼ: «Ichil 40 díaseʼ u kaajil Níniveeʼ yaan u xuʼulsaʼal».
5 Le ka tu yuʼuboʼob lelaʼ le máakoʼob kajaʼanoʼob Níniveoʼ tu tsʼáaj u fejoʼob tiʼ Dios.+ Letiʼob túuneʼ tu yaʼaloʼob ka ayunarnak máak yéetel tu búukintoʼob toʼotoch nookʼ.* Bey tu beetil desde u maas nojchil tak u maas chichnil ichiloʼoboʼ.
6 U reyil Nínive túuneʼ le ka tu yuʼubaj le baʼax táan u tsʼaʼabal ojéeltbiloʼ líikʼ tu trono, tu luʼsaj le kiʼichkelem nookʼ u tsʼaamoʼ, ka tu búukintaj toʼotoch nookʼ, le ka tsʼoʼokeʼ kulaj ich taʼan.
7 Tsʼoʼoleʼ le reyoʼ tu túuxtaj aʼalbil tiʼ tuláakal u kaajil Nínive:
«Lelaʼ letiʼe baʼax ku yaʼalik le rey yéetel le tsʼuuloʼob ka beetaʼakaʼ: mix juntúul wíinik yéetel mix juntúul baʼalcheʼ, mix juntúul wakax yéetel mix juntúul taman unaj u jaantik wa baʼax. Letiʼobeʼ maʼ unaj u jaantikoʼob mix baʼaliʼ mix unaj u yukʼikoʼob jaʼiʼ.
8 Tuláakal máakeʼ unaj u búukintik toʼotoch nookʼ, yéetel unaj xan u tsʼáaik toʼotoch nookʼ yóokʼol le baʼalcheʼoboʼ. Tuláakal máakeʼ unaj u kʼaʼam kʼáatik u yáantaj Dios, unaj u xuʼulul u beetik baʼaloʼob kʼaastak, yéetel unaj u xuʼulul u beetik loob.
9 ¡Beyoʼ maʼ xaaneʼ Dioseʼ jeʼel u kʼexik le baʼax ku tuklik u beetkoʼ,* jeʼel u xuʼulul u pʼuʼujuleʼ, yéetel maʼ kun xuʼulsbiltoʼon!».
10 Le ka tu yilaj le u jaajil Dios le baʼax tu beetoʼoboʼ, le ka tu yilaj xuʼul u beetkoʼob baʼaloʼob kʼaastakeʼ,+ tu kʼexaj le baʼax ku tuklik u beetik kaʼachoʼ* yéetel maʼ tu taasaj le loob u yaʼalmaj kaʼach ken u taas tu yóokʼoloʼoboʼ.+
Notas
^ Ich hebreoeʼ ku yaʼalaʼal kaʼach «junpʼéel nojoch kaaj tu táan Dios».
^ Ilawil «Toʼotoch nookʼ», página 2582.
^ Wa «jeʼel u yaatal u yóoleʼ».
^ Wa «letiʼeʼ yaachaj u yóol».
