Jonás 4:1-11
4 Chéen baʼaleʼ le baʼax úuchoʼ jach junpuliʼ maʼ utschaj tu tʼaan Jonásiʼ ka sen pʼuʼuji.
2 Le oʼolal Jonáseʼ orarnaj tiʼ Jéeobaeʼ ka tu yaʼalajtiʼ: «Ay Jéeoba, ¿maʼ wa desde antes in lukʼul teʼ tuʼux kajaʼanenoʼ tin tuklaj letiʼe baʼax kun úuchloʼ? Le oʼolal desde tu káajbaleʼ tin wóotaj bin Tarsis+ utiaʼal in púutsʼul. Tumen in wojel techeʼ juntúul Dios ka chʼaʼik óotsilil, jach utsech, maʼatech a séeb pʼuʼujul, nojoch a yaabilaj,+ yéetel maʼ a kʼáat a taas loob yóokʼol mix máakiʼ.
3 Beoraaʼ Kiʼichkelem Yuum Jéeoba, beet uts a luʼsik in kuxtal tumen maas maʼalob ka kíimken ke ka kuxlaken».+
4 Jéeobaeʼ tu kʼáatajtiʼ: «A tuklikeʼ, ¿maʼalob wa ka sen pʼuʼujkech?».
5 Jonás túuneʼ jóokʼ paach kaajeʼ ka kulaj tu lakʼinil* le kaajoʼ. Teʼeloʼ tu beetaj junpʼéel chan paseleʼ* ka kulaj yáanal u boʼoy utiaʼal u yilik baʼax kun úuchul tiʼ le kaajoʼ.+
6 Jéeoba túuneʼ tu beetaj u nojochtal junkúul u yaakʼil chúuj* yóokʼol Jonás utiaʼal u tsʼáaik boʼoy tiʼ yéetel utiaʼal ka u yuʼububa maʼalobil. Jonáseʼ jach kiʼimakchaj u yóol yoʼolal le u yaakʼil le chúuj jóokʼoʼ.
7 Chéen baʼaleʼ le táan u taal u sáastal tuláakʼ kʼiinoʼ le u jaajil Diosoʼ tu túuxtaj juntúul x-nookʼol utiaʼal u kʼaskúuntik le junkúul chúujoʼ, le chúuj túunoʼ tiji.
8 Le ka káaj u juul le Kʼiinoʼ Dioseʼ tu beetaj u taal junpʼéel kʼaʼamkach choko iikʼ desde lakʼin. Jach táaj chokochaj le Kʼiinoʼ, le oʼolal Jonáseʼ hasta óolak desmayarnak. Jonás túuneʼ seguernaj u kʼáatik ka kíimik, seguernaj u yaʼalik: «Maas maʼalob ka kíimken ke ka kuxlaken».+
9 Dioseʼ tu kʼáataj tiʼ Jonás: «A tuklikeʼ, ¿maʼalob wa ka sen pʼuʼujkech yoʼolal le baʼax úuch tiʼ le chúujoʼ?».+
Jonás túuneʼ tu núukaj: «Jaaj, in tuklikeʼ maʼalob ka pʼuʼujken, jach táaj pʼujaʼanen hasta taak in kíimil».
10 Chéen baʼaleʼ Jéeobaeʼ tu yaʼalajtiʼ: «Techeʼ ta chʼaʼaj óotsilil tiʼ le junkúul chúujoʼ, tsʼoʼoleʼ maʼ teech pakʼiʼ mix teech beet u nojochtaliʼ, baʼaxeʼ tiʼ junpʼéel áakʼab ka nojochchaji yéetel tiʼ junpʼéel áakʼab ka kíimi.
11 ¿Kux túun teen, maʼ wa unaj xan in chʼaʼik óotsilil tiʼ Nínive le nojoch kaajoʼ?+ Teʼeloʼ tiʼ kajaʼan maas tiʼ 120,000 máakoʼob maʼ u yojloʼob baʼax uts yéetel baʼax kʼaasiʼ,* tsʼoʼoleʼ teʼeloʼ yaan xan yaʼabkach baʼalcheʼobiʼ».+
Notas
^ Wa «este».
^ Wa «chan jáakaleʼ».
^ Uláakʼ bix u traducirtaʼaleʼ «junkúul x-kʼoʼoch».
^ Wa «maʼ u yoojloʼob máakalmáak u x-noj kʼaboʼob tiʼ u x-tsʼíik kʼaboʼobiʼ».
