Josué 11:1-23
11 Ka tu yuʼubaj Jabín, u reyil Azoor, le baʼax tsʼoʼok u yúuchloʼ tu túuxtaj tʼaan tiʼ Jobab, u reyil Madón,+ tiʼ u reyil Simrón, tiʼ u reyil Acsaf,+
2 bey xan tiʼ le reyoʼob yanoʼob teʼ montañaʼob yaan xamanoʼ, tiʼ le reyoʼob yanoʼob teʼ táax luʼumoʼob* yaan tu noojolil* Kinéret, tiʼ le reyoʼob yanoʼob Sefeláoʼ yéetel tiʼ le reyoʼob yanoʼob tu ebekníixiloʼob* Dor,+ le yanoʼob chikʼinoʼ.
3 Tu túuxtaj tʼaan xan tiʼ le cananeoʼob+ yanoʼob tu tojil lakʼin yéetel chikʼinoʼ, tiʼ le amorreoʼoboʼ,+ tiʼ le ititaʼoboʼ, tiʼ le perizitaʼoboʼ, tiʼ le jebuseoʼob yanoʼob teʼ montañaʼoboʼ yéetel tiʼ le eveoʼob+ yanoʼob tu jáal le Ermón,+ yaan tu luʼumil Mizpáoʼ.
4 Letiʼob túuneʼ jóokʼoʼob yéetel tuláakal u ejércitoʼob. Letiʼobeʼ jach táaj yaʼaboʼob kaʼach, beyoʼob jeʼex le arena yaan tu jáal le kʼáaʼnáaboʼ. Tsʼoʼoleʼ sen yaʼab tsíiminoʼob yéetel u carroiloʼob baʼateʼel ku biskoʼob.
5 Tuláakal le reyoʼobaʼ tu chʼaʼtuklaj u muchʼkubaʼob, le oʼolal taaloʼobeʼ ka tu muchʼubaʼob tu jáal u jaʼiloʼob Merom utiaʼal u baʼateloʼob tu contra Israel.
6 Le oʼolaleʼ Jéeobaeʼ tu yaʼalaj tiʼ Josué: «Maʼ a chʼaʼik saajkil tiʼob,+ tumen walkil sáamalaʼ yaan in kʼubkoʼob tu kʼab u kaajil Israel utiaʼal u láaj kíimsaʼaloʼob. Unaj a beetik loob* tiʼ u tsiiminoʼob+ yéetel unaj a tóokik u carroiloʼob u baʼateloʼob».
7 Josué túun yéetel tuláakal le xiiboʼob ku baʼateloʼoboʼ tu atacartoʼob u enemigoʼob mientras naayal u yóoloʼob tu jáal u jaʼiloʼob Merom.
8 Jéeoba túuneʼ tu kʼuboʼob tu kʼab le israelitaʼoboʼ,+ le oʼolal chʼaʼpachtaʼaboʼob tak tu Nojoch Kaajil Sidón,+ tak Misrefot-maim+ yéetel tak teʼ lugar ku kʼaabaʼtik u Táax Luʼumil Mizpé, le yaan lakʼinoʼ. Bey túunoʼ joʼopʼ u bin u kíimsaʼaloʼob tak ka pʼáat mix juntúul kuxaʼaniʼ.+
9 Ka tsʼoʼokeʼ Josuéeʼ tu beetaj jach jeʼex aʼalaʼabiktiʼ tumen Jéeobaoʼ, tu beetaj loob tiʼ u tsiiminoʼob yéetel tu tóokaj u carroiloʼob u baʼateloʼob.+
10 Tsʼoʼoleʼ Josuéeʼ suunajeʼ ka tu chʼaʼaj u kaajil Azoor, ka tu xuʼulsaj tiʼ u reyil yéetel espada,+ tumen Azoor kaʼach joʼolintik u maasil kaajoʼoboʼ.
11 Tu kíimsoʼob yéetel espada tuláakal le máaxoʼob yaan ichiloʼ, tu láaj xuʼulsoʼobtiʼob.+ Tu kíimsoʼob tuláakal baʼax ku chʼaʼik u yiikʼ.+ Ka tsʼoʼokeʼ Josuéeʼ tu tóokaj u kaajil Azoor.
12 Josuéeʼ tu chʼaʼaj tuláakal le kaajoʼob tuʼux yaan le reyoʼobaʼ, yéetel tu xuʼulsaj tiʼ tuláakal u reyiloʼob yéetel espada,+ tu láaj xuʼulsajtiʼob+ jach jeʼex u yaʼalmil Moisés, le máax meyajtik Jéeobaoʼ.
13 Chéen baʼaleʼ le israelitaʼoboʼ maʼ tu tóokoʼob u maasil kaajoʼob yaan yóokʼol le mejen puʼukoʼoboʼ.* Jach chéen u kaajil Azoor tóokaʼab tumen Josué.
14 Le israelitaʼoboʼ tu chʼaʼaj u tiaʼalintoʼob tuláakal le baʼaxoʼob yaan teʼ kaajoʼoboʼ bey xan le baʼalcheʼoboʼ.+ Chéen baʼaleʼ tu xuʼulsoʼob tiʼ tuláakal máak yéetel u espadaʼob, tak ka pʼáat mix juntúul kuxaʼaniʼ.+ Maʼ tu chaʼajoʼob u pʼáatal mix juntúul máak ku chʼaʼik u yiikʼiʼ.+
15 Jach jeʼex u yaʼalmil Jéeoba tiʼ Moisés, le máax meyajtikoʼ, bey tu yaʼalil Moisés tiʼ Josué,+ yéetel Josuéeʼ bey xan tu beetiloʼ. Mix junpʼéel tiʼ le baʼaxoʼob u yaʼalmaj Jéeoba tiʼ Moisés pʼáat maʼ u beetkoʼ.+
16 Josuéeʼ tu chʼaʼaj tuláakal le luʼumoʼ: le yaan teʼ montañaʼoboʼ, tuláakal le yaan teʼ Négueboʼ,+ tuláakal le yaan Gosénoʼ, le yaan Sefeláoʼ,+ le yaan Arabáoʼ,+ le yaan teʼ montañaʼob yaan Israeloʼ yéetel le luʼumoʼob yaan tu jáal le montañaʼoboʼ.
17 Tu chʼaʼaj le luʼum yaan desde teʼ Montaña Alak, le ku bin tu tojil Seíroʼ, tak le yaan Baal-gad+ teʼ tu Táax Luʼumil Líbano yaan tu jáal le Montaña Ermónoʼ.+ Tu chukaj tuláakal u reyiloʼobeʼ ka tu kíimsoʼob.
18 Josuéeʼ xáanchaj táan u baʼateʼel tu contra tuláakal le reyoʼobaʼ.
19 Chéen le eveoʼob yanoʼob Gabaón tu yiloʼob ka yanak jeetsʼelil tiʼob yéetel le israelitaʼoboʼ.+ Utiaʼal u chʼaʼikoʼob u maasil kaajoʼobeʼ yanchaj u baʼateloʼob.+
20 Jéeobaeʼ tu chaʼaj u tercotal u puksiʼikʼaloʼob+ utiaʼal u baʼateloʼob tu contra Israel, yéetel utiaʼal u láaj xuʼulsiktiʼob sin ke u chʼaʼik óotsilil tiʼob.+ Unaj kaʼach u láaj xuʼulsaʼaltiʼob jach jeʼex u yaʼalmil Jéeoba tiʼ Moiséseʼ.+
21 Teʼ kʼiinoʼob jeʼeloʼ Josuéeʼ tu xuʼulsaj tiʼ le anakimoʼob+ yanoʼob teʼ montañaʼoboʼ, le yanoʼob tu kaajil Hebrón, Debir, Anab, bey xan le yanoʼob tiʼ tuláakal le montañaʼob yaan Judá yéetel Israeloʼ. Josuéeʼ tu láaj xuʼulsaj tiʼ le anakimoʼobaʼ bey xan tiʼ u kaajaloʼob.+
22 Mix juntúul anakim pʼáat tu luʼumil Israel.+ Chéen tu kaajil Gaza,+ Gat+ yéetel Asdod+ yaan pʼáatoʼobiʼ.
23 Josuéeʼ tu chʼaʼaj tuláakal le luʼumaʼ, jach jeʼex u prometermil Jéeoba tiʼ Moiséseʼ.+ Tsʼoʼoleʼ Josuéeʼ tu tʼoxaj bey herencia tiʼ le israelitaʼoboʼ según le jaats ku tocar tiʼ cada tribuoʼ.+ Ka tsʼoʼokeʼ xuʼul u yantal guerra teʼ luʼumoʼ.+
Notas
^ Wa «Arabá».
^ Wa «sur».
^ Wa «tu bajadailoʼob».
^ Wa «a xotik u xiichʼel u yookoʼob».
^ Wa «cerroʼoboʼ».
