Josué 14:1-15
14 Le jeʼeloʼobaʼ letiʼe luʼum tu chʼaʼaj le israelitaʼob tu luʼumil Canaánoʼ, letiʼe luʼum tsʼaʼabtiʼob bey herencia+ tumen Eleazar, le sacerdoteoʼ, tumen Josué, u hijo Nun bey xan tumen u nuuktakil le familiaʼob yaan ichil le tribuʼoboʼ.
2 Jeʼex u yaʼalmil Jéeoba tiʼ Moisés ka beetaʼakoʼ, rifartaʼab+ le luʼum utiaʼal u yilaʼal máakalmáak le herencia kun tocar tiʼ le nueve tribus y mediooʼ.+
3 Le kaʼapʼéel tribu y mediooʼ tsʼokaʼaniliʼ u tsʼaʼabal u herenciaʼob tuláakʼ u tséel* le Jordán+ tumen Moisésoʼ. Pero maʼ tu tsʼáaj u herencia le levitaʼoboʼ.+
4 Tiʼ u paalal Joséeʼ jóokʼ kaʼapʼéel tribu,+ Manasés yéetel Efraín.+ Pero tiʼ le levitaʼoboʼ maʼ tsʼaʼabtiʼob luʼum bey u herenciaʼobeʼ. Chéen tsʼaʼabtiʼob kaajoʼob tuʼux u kajtaloʼob,+ lugaroʼob utiaʼal u janal u yalakʼ baʼalcheʼob bey xan utiaʼal u tsʼáaikoʼob u maasil baʼaxoʼob yaantiʼoboʼ.+
5 Le israelitaʼoboʼ tu tʼoxoʼob le luʼum jach jeʼex úuchik u yaʼalik Jéeoba tiʼ Moiséseʼ.
6 Ka tsʼoʼokeʼ le xiiboʼob yaan tu tribu Judáoʼ tu natsʼubaʼob yiknal Josué le tiaʼan Guilgaloʼ.+ Ka náatsʼoʼobeʼ, Caleb,+ u hijo Jefuné, le kenizitaoʼ tu yaʼalaj: «Techeʼ jach a wojel le baʼax tu yaʼalaj Jéeoba+ tiʼ Moisés, le máax meyajtikoʼ.+ Le baʼax tu yaʼalaj u jaajil Dios tin woʼolal yéetel ta woʼolal le tiaʼanoʼon Cadés-barneaoʼ.+
7 Teneʼ 40 años yaanten kaʼach ka túuxtaʼaben desde Cadés-barnea tumen Moisés, le máax meyajtik Jéeoba, utiaʼal in chʼúukt le luʼumoʼ.+ Teen túuneʼ ka suunajeneʼ tin waʼalaj u jaajil.*+
8 Kex le in sukuʼunoʼob binoʼob tin wéetel tu beetoʼob u lúubul u yóol* le kaajoʼ teneʼ tin wuʼuyaj u tʼaan Jéeoba yéetel tuláakal in puksiʼikʼal.+
9 Teʼ kʼiin jeʼeloʼ Moiséseʼ tu jurartajten: ‹Le luʼum tuʼux tsʼoʼok a máanoʼ mantatsʼ kun pʼáatal tiʼ teech yéetel tiʼ a paalal bey junpʼéel herenciaeʼ, tumen tsʼoʼok a wuʼuyik u tʼaan Jéeoba in Dios yéetel tuláakal a puksiʼikʼal›.+
10 Jach jeʼex tu yaʼaliloʼ,+ Jéeobaeʼ tsʼoʼok u chaʼik in kuxtal tak beoraaʼ.+ Tsʼoʼok u máan 45 años beetaʼak le promesa tiʼ Moisés tumen Jéeoba, le táan kaʼach u máan u kaajil Israel teʼ desiertooʼ.+ Beoraaʼ 85 años yaanten yéetel láayliʼ way yaneneʼ.
11 Bejlaʼeʼ jach yaan in muukʼ jeʼex le kʼiin ka tu túuxten Moisésoʼ. Jeʼex kaʼacheʼ láayliʼ yaan in muukʼ utiaʼal in baʼateʼel yéetel utiaʼal in beetik uláakʼ baʼaloʼobeʼ.
12 Le oʼolaleʼ tsʼáaten le luʼum tuʼux yaan le montañaʼoboʼ, jeʼex úuchik u prometertik Jéeoba teʼ kʼiin jeʼeloʼ. Techeʼ ta wuʼuyaj de ke teʼeloʼ tiaʼan le máakoʼob ku kʼaabaʼtik anakimoʼoboʼ+ yéetel kaʼanaltak u pakʼil le nukuch kaajoʼob+ tuʼux yanoʼoboʼ. Chéen baʼaleʼ teneʼ in wojel yaan u yantal Jéeoba tin wéetel,+ yéetel jeʼex u yaʼalmil Jéeobaeʼ+ yaan in chʼaʼik le tuʼux yanoʼoboʼ».
13 Le oʼolaleʼ Josuéeʼ tu bendecirtaj Caleb, u hijo Jefuné yéetel tu tsʼáaj Hebrón tiʼ bey u herenciaeʼ.+
14 Le oʼolal Hebróneʼ u tiaʼal Caleb, u hijo Jefuné, le kenizitaoʼ. U herencia tak bejlaʼeʼ, tumen yéetel tuláakal u puksiʼikʼal tu yuʼubaj u tʼaan Jéeoba,+ u Dios u kaajil Israel.
15 Hebróneʼ ku yaʼalaʼaltiʼ kaʼach Kiriat-arbá+ (Arbáeʼ letiʼe máak maas kʼaj óolaʼan kaʼach ichil le anakimoʼoboʼ). Ka tsʼoʼokeʼ yanchaj jeetsʼelil teʼ luʼumoʼ.+
Notas
^ Le u tséel ku yaʼalikoʼ tiaʼan lakʼineʼ.
^ Ich hebreoeʼ ku yaʼalaʼal kaʼach «suunajen yéetel junpʼéel tʼaan jach jeʼex yanil tin puksiʼikʼaloʼ».
^ Ich hebreoeʼ ku yaʼalaʼal kaʼach «tu beetoʼob u yíibil u puksiʼikʼal».
