Josué 4:1-24
-
Tuunichoʼob utiaʼal u kʼaʼajsaʼal baʼax úuchi (1-24)
4 Chéen pʼelak láaj máanik le kaaj tuláakʼ u tséel le Jordánoʼ, Jéeobaeʼ tu yaʼalaj tiʼ Josué:
2 «Yéey 12 xiiboʼob ichil le kaajoʼ, juntúul tiʼ cada tribu,+
3 yéetel unaj a waʼaliktiʼob: ‹Chʼaʼex 12 tuunichoʼob chúumuk tiʼ le Jordánoʼ, teʼ tuʼux pʼáat waʼatal le sacerdoteʼoboʼ.+ Le kéen tsʼoʼokkeʼ unaj a biskeʼex tak teʼ tuʼux ken a máanseʼex le áakʼaboʼ›».+
4 Josué túuneʼ tu tʼanaj le 12 xiiboʼob tu yéeyaj ichil le israelitaʼoboʼ, juntúul tiʼ cada tribu,
5 tu yaʼalajtiʼob: «Máankeʼex tu táan u cajail u pacto Jéeoba a Dioseʼex utiaʼal a bineʼex chúumuk tiʼ le Jordánoʼ, cada juntúul tiʼ teʼexeʼ unaj u kuchik junpʼéel tuunich, junpʼéel tuunich tu yoʼolal cada junpʼéel tribu tiʼ le israelitaʼoboʼ.
6 Lelaʼ yaan u pʼáatal bey junpʼéel señaleʼ. Beyoʼ wa a paalaleʼex ku kʼáatikteʼex tu kʼiinil: ‹¿Baʼaxten tsʼaʼan le tuunichoʼob wayaʼ?›,+
7 teʼexeʼ unaj a waʼalikeʼextiʼob: ‹Tumen u jaʼil le Jordánoʼ jeʼelsaʼab tu táan u cajail+ u pacto Jéeoba, le ka máan teʼ Jordánoʼ jeʼelsaʼab u jaʼil le Jordánoʼ. Le tuunichoʼobaʼ mantatsʼ ken u kʼaʼajs tiʼ u kaajil Israel le baʼax úuchoʼ›».+
8 Le israelitaʼob túunoʼ tu beetoʼob jach jeʼex aʼalaʼabiktiʼob tumen Josuéoʼ. Tu chʼaʼajoʼob 12 tuunichoʼob chúumuk tiʼ le Jordánoʼ, junpʼéel tuunich tu yoʼolal cada junpʼéel tribu tiʼ le israelitaʼoboʼ, tu beetoʼob jach jeʼex aʼalaʼabik tiʼ Josué tumen Jéeobaoʼ. Tu bisoʼob tak teʼ tuʼux ken u máansoʼob le áakʼaboʼ.
9 Josué xaneʼ tu nikkúuntaj 12 tuunichoʼob chúumuk tiʼ le Jordánoʼ, teʼ tuʼux pʼáat waʼatalil le sacerdoteʼob bisik u cajail le pactooʼ,+ le tuunichoʼobaʼ tak bejlaʼa tiaʼanoʼob teʼeloʼ.
10 Le sacerdoteʼob bisik u cajail le pactooʼ pʼáatoʼob waʼatal tu chúumuk le Jordán tak ka tu láaj beetaj le kaaj le baʼax aʼalaʼab tiʼ Josué tumen Jéeobaoʼ, jach jeʼex aʼalaʼabik tiʼ Josué tumen Moisésoʼ. Le kaajoʼ tu tsʼáaj u yóol máan tuláakʼ u tséel le Jordánoʼ.
11 Chéen pʼelak máanik tuláakal le kaajoʼ, máan xan le sacerdoteʼob yéetel u cajail u pacto Jéeoba tu táan le kaajoʼ.+
12 Le rubenitaʼob, le gaditaʼob yéetel le táanchumuk tribu tiʼ Manasésoʼ kʼáatmáanoʼob en orden jeʼex junpʼéel ejércitoeʼ.+ Máanoʼob táanil tiʼ u maasil israelitaʼoboʼ, tu beetoʼob jach jeʼex aʼalaʼabiktiʼob tumen Moiséseʼ.+
13 Kex 40,000 soldadoʼob israelitaʼob máanoʼob tu táan Jéeoba utiaʼal u binoʼob teʼ desierto yaan Jericóoʼ.
14 Teʼ kʼiin jeʼeloʼ Jéeobaeʼ tu nojbaʼalkúuntaj Josué tu táan le israelitaʼoboʼ,+ le oʼolal letiʼobeʼ jach tu respetartoʼob tuláakal u kʼiiniloʼob u kuxtal, jeʼex úuchik u jach respetarkoʼob Moiséseʼ.+
15 Jéeoba túuneʼ tu yaʼalaj tiʼ Josué:
16 «Aʼal tiʼ le sacerdoteʼob bisik le Caja+ tuʼux tsʼaʼan le jaajay tuunichoʼob ka jóokʼkoʼob teʼ Jordánoʼ».
17 Le oʼolal Josuéeʼ tu yaʼalaj tiʼ le sacerdoteʼoboʼ: «Jóokʼeneʼex teʼ Jordánoʼ».
18 Le ka jóokʼ teʼ Jordán le sacerdoteʼob bisik u cajail+ u pacto Jéeoba yéetel le ka kʼuch u yookoʼob tuʼux tikineʼ, kaʼa suunaj u jaʼil le Jordánoʼ yéetel joʼopʼ u tuul tu tséelikoʼob+ jeʼex kaʼacheʼ.
19 Teʼ día diez tiʼ le yáax mesoʼ,* le kaajoʼ tu kʼáatmáansaj le Jordánoʼ yéetel tu armartaj u yotochoʼob Guilgal,+ tu lakʼinil Jericó, tu jáal u territorio Jericó.
20 Le 12 tuunichoʼob tu chʼaʼajoʼob teʼ Jordánoʼ, Josuéeʼ tu nikkúuntaj Guilgal.+
21 Tsʼoʼoleʼ ka tu yaʼalaj tiʼ le israelitaʼoboʼ: «Le kéen u kʼáat le paalaloʼob tiʼ u papáʼob: ‹¿Baʼax u kʼáat u yaʼal le tuunichoʼobaʼ?›,+
22 letiʼobeʼ unaj u yaʼalikoʼob tiʼ u paalaloʼob: ‹Israeleʼ máan yóoʼ tikin luʼum+ le ka tu kʼáatmáansaj le Jordánoʼ,
23 tumen Jéeoba a Dioseʼexeʼ tu tikinkúuntaj u jaʼil le Jordán hasta ka láaj máan le kaaj tuláakʼ u tséeloʼ, bey jeʼex tu beetil Jéeoba a Dioseʼex tiʼ le Mar Rojo le ka tu tikinkúuntaj u jaʼil hasta ka láaj máanoʼon tuláakʼ u tséeloʼ.+
24 Beyoʼ tuláakal le kaajoʼob yaan way luʼumeʼ yaan u yojéeltikoʼob bukaʼaj poder yaan tu kʼab Jéeoba,+ yéetel utiaʼal maʼ u xuʼulul a meyajtikeʼex Jéeoba a Dioseʼex›».
Notas
^ U kʼaabaʼ le mesaʼ Abib. Ilawil «Abib», página 2554.
