Josué 8:1-35
8 Jéeoba túuneʼ tu yaʼalaj tiʼ Josué: «Maʼ a sajaktal mix a kikilankil.+ Chʼaʼ tuláakal le soldadoʼoboʼ ka naʼakakech baʼateʼel tu contra Ay. Ilawile, teneʼ tsʼoʼok in kʼubik u reyil Ay ta kʼab, u kaajal, u kajnáaliloʼob bey xan tuláakal baʼax yaantiʼ.+
2 Jeʼex ta beetil tiʼ Jericó yéetel tiʼ u reyeʼ bey xan unaj a beetik tiʼ u kaajil Ay yéetel tiʼ u rey.+ Chéen baʼaleʼ beoraaʼ jeʼel u páajtal a chʼaʼik a tiaʼalinteʼex tuláakal baʼax yaan teʼ kaajoʼ bey xan u yalakʼ baʼalcheʼob. Chʼaʼ xan u jaats soldadoʼobeʼ ka a waʼaltiʼob ka u taʼakubaʼob paachil tiʼ u kaajil Ay».
3 Josué yéetel tuláakal le soldadoʼoboʼ binoʼob baʼateʼel tu contra Ay, Josuéeʼ tu yéeyaj 30,000 soldadoʼob jach u yojloʼob baʼateleʼ ka tu túuxtoʼob de áakʼab.
4 Letiʼeʼ tu yaʼalajtiʼob: «Ilawileʼex, teʼexeʼ unaj a taʼakikabaʼex paachil tiʼ le kaajoʼ. Maʼ sen náach tiʼ le kaaj unaj a wantaleʼexoʼ, yéetel maʼ unaj u náayal a wóoleʼexiʼ.
5 Teen yéetel u maasil soldadoʼoboʼ yaan k-náatsʼal teʼ kaajoʼ, le kéen jóokʼkoʼob t-contra jeʼex tsʼoʼok u yáax beetkoʼoboʼ+ yaan u jóokʼol k-áalkab.
6 Le kéen jóokʼok u yáalkaboʼob t-paacheʼ yaan k-beetik u náachtaloʼob tiʼ le kaajoʼ, tumen yaan u yaʼalikoʼob: ‹Táan k-kaʼa beetik u yáalkaboʼob›.+ Toʼon túuneʼ yaan u jóokʼol k-áalkab.
7 Teʼex túuneʼ unaj a jóokʼleʼex teʼ tuʼux a taʼakmabaʼexoʼ yéetel unaj a chʼaʼikeʼex le kaajoʼ. Jéeoba a Dioseʼex kun kʼubik ta kʼabeʼex.
8 Le kéen a chʼaʼex le kaajoʼ tu séebaʼanil unaj a tʼabkeʼex.+ Unaj a beetkeʼex jeʼex tsʼoʼok u yaʼalik Jéeobaoʼ. Ilawileʼex, tsʼoʼok in waʼalikteʼex baʼax unaj a beetkeʼex».
9 Ka tsʼoʼokeʼ túuxtaʼaboʼob tumen Josué, letiʼob túuneʼ binoʼob teʼ tuʼux unaj u taʼakikubaʼoboʼ. Binoʼob tu chikʼinil Ay, pʼáatoʼob entre Betel yéetel Ay, mientras teʼ áakʼab jeʼeloʼ Josuéeʼ pʼáat yéetel u maasil soldadoʼoboʼ.
10 Ka tsʼoʼok u líikʼil Josué jach temprano yéetel u muchʼik* tuláakal le soldadoʼoboʼ, letiʼ yéetel u nuuktakil u kaajil Israeleʼ binoʼob yéetel le soldadoʼob tu kaajil Ayoʼ.
11 Tuláakal le soldadoʼob+ yaan tu yéeteloʼ marcharnajoʼobeʼ ka binoʼob aktáan tiʼ le kaajoʼ. Tiʼ jeʼeloʼob tu xamanil* Ayeʼ, chúumuk tiʼ letiʼob yéetel tiʼ Ayeʼ yaan junpʼéel táax luʼum.
12 Antes tiʼ lelaʼ Josuéeʼ tu túuxtaj kex 5,000 soldadoʼob utiaʼal u taʼakikubaʼob+ tu chikʼinil u kaajil Ay, pʼáatoʼob entre Betel+ yéetel Ay.
13 Bey túunoʼ u maas yaʼabil le soldadoʼoboʼ pʼáatoʼob tu xamanil u kaajil Ay,+ yéetel uláakʼ soldadoʼoboʼ pʼáatoʼob tu chikʼinil le kaajoʼ.+ Teʼ áakʼab jeʼeloʼ Josuéeʼ bin tak tu chúumuk le táax luʼumoʼ.
14 Ka ilaʼab tumen u reyil Ay le baʼax ku yúuchloʼ, tu séebaʼanileʼ letiʼ yéetel tuláakal le xiiboʼob yaan teʼ kaajoʼ jóokʼoʼob jach temprano utiaʼal u binoʼob baʼateʼel yéetel u kaajil Israel tiʼ junpʼéel lugar tuʼux chíikaʼan le desiertooʼ. Chéen baʼaleʼ le reyoʼ maʼ u yojel wa yaan soldadoʼob u taʼakmubaʼob tu paach le kaajoʼ.
15 Ka atacarnaj u kajnáaliloʼob Ayeʼ, Josué yéetel tuláakal u kaajil Israeleʼ púutsʼoʼobeʼ ka binoʼob tu tojil le bej ku bin teʼ desiertooʼ.+
16 Tʼaʼan tuláakal le máakoʼob yanoʼob teʼ kaaj utiaʼal u chʼaʼpachtikoʼoboʼ, le táan u chʼaʼpachtikoʼob Josuéoʼ beetaʼab u náachtaloʼob tiʼ le kaajoʼ.
17 Mix juntúul xiib pʼáat tu kaajil Ay yéetel Betel, tuláakloʼob binoʼob tu paach Israel. Tu pʼatoʼob píiʼjeʼekʼab u joonajiloʼob le kaajoʼ ka binoʼob tu paach Israel.
18 Jéeoba túuneʼ tu yaʼalaj tiʼ Josué: «Tichʼ tu tojil Ay+ le lanza a machmoʼ, tumen yaan in kʼubik ta kʼab u kaajil Ay».+ Le oʼolal Josuéeʼ tu tichʼaj tu tojil le kaaj le lanza yaan tu kʼaboʼ.
19 Jach le ka tu tichʼaj u kʼaboʼ le soldadoʼob u taʼakmubaʼoboʼ jóokʼoʼob teʼ tuʼux yanoʼoboʼ. Áalkabil úuchik u yookloʼob teʼ kaajoʼ ka tu chʼaʼajoʼob, tu séebaʼanil tu tʼaboʼob le kaajoʼ.+
20 Le ka tu sutaj u yich le máaxoʼob chʼaʼpachtik le israelitaʼoboʼ, tu yiloʼob táan u kúulul u buutsʼil le kaaj tak kaʼanoʼ, le oʼolal pʼáat minaʼan u muukʼoʼob utiaʼal u púutsʼloʼob mix tuʼux. Le israelitaʼob táan kaʼach u binoʼob tu tojil le desierto utiaʼal u púutsʼloʼoboʼ tu sutubaʼob tu contra le máaxoʼob chʼaʼpachtikoʼoboʼ.
21 Le ka tu yilaj Josué yéetel u kaajil Israel tsʼoʼok u chʼaʼabal le kaaj tumen le soldadoʼob u taʼakmubaʼob kaʼach, bey xan ka tu yiloʼob bix u kúulul u buutsʼil le kaajoʼ, tu sutubaʼob utiaʼal u atacarkoʼob u soldadoiloʼob Ay.
22 Le uláakʼ soldadoʼoboʼ jóokʼoʼob tu kaajil Ay utiaʼal u binoʼob tu tojiloʼob xan, bey túunoʼ u soldadoiloʼob Ayeʼ pʼáatoʼob chúumuk tiʼ le israelitaʼoboʼ. Aktáan tiʼ letiʼob bey xan paachil tiʼ letiʼobeʼ yaan israelitaʼobiʼ. U soldadoiloʼob Ayeʼ láaj kíimsaʼaboʼob, mix juntúul pʼáat kuxaʼaniʼ mix juntúul púutsʼiʼ.+
23 Chéen baʼaleʼ tu chukoʼob u reyil Ayeʼ+ ka tu bisoʼob tu táan Josué.
24 Le israelitaʼoboʼ tu kíimsoʼob tuláakal u kajnáaliloʼob Ay, le máaxoʼob chʼaʼpachtoʼob tak teʼ desiertooʼ, tu láaj kíimsoʼob yéetel espada. Ka tsʼoʼokeʼ tuláakal Israeleʼ suunaj tu kaajil Ayeʼ ka tu xuʼulsaj yéetel espada.
25 Tuláakal le máaxoʼob kíimsaʼaboʼob teʼ kʼiin jeʼeloʼ tu chukaj 12,000. Kíimsaʼab xiiboʼob yéetel koʼoleloʼob, jach tuláakal u kajnáaliloʼob Ay.
26 Josuéeʼ maʼ tu yéemsaj u kʼab tuʼux u machmaj le lanzaoʼ+ tak ka láaj xuʼulsaʼab+ tiʼ u kajnáaliloʼob Ay.
27 Chéen baʼaleʼ le baʼalcheʼob yéetel tuláakal u maasil baʼaloʼob yaan teʼ kaajoʼ chʼaʼab tumen le israelitaʼoboʼ, jeʼex u yaʼalmil Jéeoba tiʼ Josuéoʼ.+
28 Josué túuneʼ tu tóokaj u kaajil Ay, ka tu láaj xuʼulsajtiʼ,+ tak bejlaʼa bey pʼaatliloʼ.
29 Josuéeʼ tu kíimsaj u reyil Ayeʼ ka tu chʼuykíintaj tiʼ junpʼéel cheʼ, tiʼ pʼáat tak ka tardechajiʼ. Le jach taʼaytak u tʼúubul le kʼiinoʼ Josuéeʼ tu yaʼalaj ka éemsaʼak u wíinklil teʼ cheʼ tuʼux chʼuykíintaʼanoʼ.+ Ka tsʼoʼokeʼ píikchʼintaʼab tu entradail le kaajoʼ yéetel tu nikkúuntoʼob yaʼab tuunich tu yóokʼol. Lelaʼ tak bejlaʼa bey yaniloʼ.
30 Ka tsʼoʼok tuláakal lelaʼ Josuéeʼ tu beetaj junpʼéel altar* utiaʼal Jéeoba, u Dios u kaajil Israel, tu yóokʼol le Montaña Ebaloʼ.+
31 Tu beetaj jach jeʼex aʼalaʼanil tiʼ le israelitaʼob tumen Moisés, le máax meyajtik Jéeobaoʼ. Tu beetaj jach jeʼex tsʼíibtaʼanil tu libroil u Ley+ Moisésaʼ:* «Junpʼéel altar beetaʼan yéetel tuunichoʼob túulistak, maʼ póolaʼanoʼob yéetel junpʼéel nuʼukul de fierroiʼ».+ Tu yóokʼoleʼ tu kʼuboʼob tóokbil ofrendaʼob* tiʼ Jéeoba bey xan ofrendaʼob utiaʼal múul janal.*+
32 Josué túuneʼ tu copiartaj yóokʼol le tuunichoʼob le Ley+ tu tsʼíibtaj Moisés tu táan le israelitaʼoboʼ.+
33 Tuláakal Israel, u nuuktakil le kaajoʼ, u jefeiloʼob yéetel le máaxoʼob ku beetik u jueziloʼoboʼ waʼalakbaloʼob tu kaʼatséelil u cajail le pactooʼ, táan u yilkoʼob le sacerdoteʼob kuchmil u cajail u pacto Jéeobaoʼ. Tiaʼan tuláakal le israelitaʼoboʼ bey xan le j-táanxel luʼumiloʼoboʼ.+ Junjaatseʼ waʼalajoʼob aktáan tiʼ le Montaña Guerizimoʼ, yéetel uláakʼ junjaatseʼ aktáan tiʼ le Montaña Ebaloʼ+ (jeʼex aʼalaʼanil tumen Moisés, le máax meyajtik Jéeobaoʼ),+ utiaʼal u bendecirtaʼal u kaajil Israel.
34 Ka tsʼoʼokeʼ Josuéeʼ tu kʼaʼam xokaj le baʼax ku yaʼalik le Leyoʼ.+ Tu xokaj le bendiciónoʼob+ yéetel le maldiciónoʼoboʼ+ jeʼex tsʼíibtaʼanil tu libroil le Leyoʼ.
35 Josuéeʼ tu kʼaʼam xokaj tuláakal le baʼax u yaʼalmaj Moisésoʼ, mix junpʼéel pʼáat maʼ u yaʼalikiʼ. Tu xokaj tu táan u kaajil Israel,+ lelaʼ uʼuyaʼab tak tumen le koʼoleloʼoboʼ, le paalaloʼoboʼ, yéetel tumen le j-táanxel luʼumiloʼob+ kajaʼanoʼob* ichiloʼoboʼ.+
Notas
^ Wa «u máansik lista tiʼ».
^ Wa «norte».
^ Ilawil página 2554.
^ Ilawil «U Ley Moisés», página 2586.
^ Ilawil «Tóokbil ofrenda», página 2582.
^ Ilawil «Ofrendail múul janal», página 2574.
^ Ich hebreoeʼ ku yaʼalaʼal kaʼach «ku máanoʼob».
