Levítico 11:1-47
-
Baʼalcheʼob limpioʼob yéetel maʼ limpioʼobiʼ (1-47)
11 Jéeoba túuneʼ tu yaʼalaj tiʼ Moisés yéetel tiʼ Aarón:
2 «Aʼal tiʼ le israelitaʼob lelaʼ: ‹Leloʼobaʼ letiʼe baʼalcheʼob kuxaʼanoʼob yóoʼ luʼum jeʼel u páajtal a jaantikeʼexaʼ:+
3 tuláakal baʼalcheʼ xaʼaypajaʼan u maay yéetel ku kaʼa jaachʼeʼ jeʼel u páajtal u jaantaʼaleʼ.
4 Chéen baʼaleʼ yaan baʼalcheʼob ku kaʼa jaachʼoʼob wa xaʼaypajaʼan u maayoʼob maʼ unaj a jaantikeʼexiʼ, le baʼalcheʼobaʼ letiʼe jeʼeloʼobaʼ: le camellooʼ, tumen kex ku kaʼa jaachʼeʼ maʼ xaʼaypajaʼan u maayiʼ. Le baʼalcheʼaʼ maʼ limpioiʼ.+
5 Bey xan le damánoʼ,*+ tumen kex ku kaʼa jaachʼeʼ maʼ xaʼaypajaʼan u maayiʼ. Le baʼalcheʼaʼ maʼ limpioiʼ.
6 Bey xan le tʼuʼuloʼ,* tumen kex ku kaʼa jaachʼeʼ maʼ xaʼaypajaʼan u maayiʼ. Le baʼalcheʼaʼ maʼ limpioiʼ.
7 Bey xan le kʼéekʼenoʼ,+ tumen kex xaʼaypajaʼan u maayeʼ maʼatech u kaʼa jaachʼ. Le baʼalcheʼaʼ maʼ limpioiʼ.
8 Maʼ unaj a jaantikeʼex u bakʼel le baʼalcheʼobaʼ yéetel maʼ unaj a machkeʼex u kimen wíinkliloʼobiʼ. Le baʼalcheʼobaʼ maʼ limpioʼobiʼ.+
9 Tiʼ le baʼalcheʼob kuxaʼanoʼob teʼ jaʼoʼ, leloʼobaʼ letiʼe jeʼel u páajtal a jaantikeʼexaʼ: jeʼel baʼalak baʼalcheʼil ka yanak teʼ kʼáaʼnáab wa teʼ ríoʼoboʼ jeʼel u páajtal a jaantikeʼex le yaan u xiikʼoʼob yéetel u escamaʼoboʼ.+
10 Chéen baʼaleʼ jeʼel baʼalak baʼalcheʼil yaan teʼ kʼáaʼnáab wa teʼ ríoʼoboʼ sea mejen baʼalcheʼob en grupo u máanoʼob wa uláakʼ baʼalcheʼobeʼ, wa minaʼan u xiikʼoʼob wa u escamaʼobeʼ, le baʼalcheʼobaʼ maʼ limpioʼobiʼ.
11 Tumen maʼ limpioʼobeʼ maʼ unaj a jaantikeʼex u bakʼeliʼ+ mix unaj a machkeʼex u kimen wíinkliloʼobiʼ.
12 Tuláakal baʼal kuxaʼan teʼ jaʼ minaʼan u xiikʼoʼob yéetel u escamaʼobeʼ maʼ limpio a tiaʼalteʼexiʼ.
13 Leloʼobaʼ letiʼe baʼalcheʼob ku xikʼnaloʼob maʼ unaj a jaantikeʼexaʼ: le águilaoʼ,+ le águila ku chuk kayoʼ, le box chʼoomoʼ,+
14 le milano realoʼ yéetel tuláakal u clasesil milano negro,
15 tuláakal u clasesil cuervo,*
16 le avestruzoʼ, le xoochʼoʼ, le gaviotaoʼ, tuláakal u clasesil halcón,
17 le chan búhooʼ, le cormoránoʼ,* le búho chowak u xikinoʼ,
18 le cisneoʼ, le pelícanooʼ, le nojoch chʼoomoʼ,*
19 le cigüeñaoʼ, tuláakal u clasesil garzas, le abubillaoʼ yéetel le sootsʼoʼ.
20 Tuláakal u jejeláasil ikʼeloʼob* yaan u xiikʼoʼob yéetel kanpʼéel u yookoʼobeʼ maʼ unaj a jaantikeʼexiʼ.
21 Ichil le u jejeláasil ikʼeloʼob yaan u xiikʼoʼob yéetel ku xíimbaloʼob yéetel kanpʼéel u yookoʼobeʼ, chéen jeʼel u páajtal a jaantikeʼex le yaan uláakʼ kaʼapʼéel u yookoʼob maas chowaktak utiaʼal u síitʼoʼoboʼ.
22 Le baʼaloʼob jeʼel u páajtal a jaantikeʼexoʼ letiʼe jeʼeloʼobaʼ: u clasesil sáakʼoʼob* ku xikʼnaloʼob, uláakʼ sáakʼoʼob suuk u jaantal,+ grilloʼob,* bey xan le sáakʼoʼob ku síitʼoʼoboʼ.
23 Tuláakal uláakʼ ikʼeloʼob yaan u xiikʼ yéetel ku máan yéetel kanpʼéel u yookoʼobeʼ maʼ unaj a jaantikeʼexiʼ.
24 Wa ka jaantikeʼexeʼ yaan a pʼáatleʼex maʼ limpio yanileʼex tu táan Diosiʼ. Jeʼel máaxak ka u mach u kimen wíinklil le baʼalcheʼobaʼ yaan u pʼáatal maʼ limpio yanil tu táan Dios tak ken tʼúubuk le kʼiinoʼ.+
25 Jeʼel máaxak ka u mach u kimen wíinklil le mejen baʼalcheʼobaʼ unaj u pʼoʼik u nookʼ,+ yéetel yaan u pʼáatal maʼ limpio yanil tu táan Dios tak ken tʼúubuk le kʼiinoʼ.
26 Jeʼel baʼalak baʼalcheʼil maʼ jach xaʼaypajaʼan tubeel u maay yéetel maʼ tu kaʼa jaachʼeʼ maʼ limpioiʼ. Jeʼel máaxak ka u macheʼ yaan u pʼáatal maʼ limpio yanil tu táan Diosiʼ.+
27 Jeʼel baʼaxak baʼalcheʼil yaan kanpʼéel u yookoʼob yéetel yaan u moʼol yéetel u yíichʼakeʼ maʼ limpioiʼ. Jeʼel máaxak ka u mach u kimen wíinklil le baʼalcheʼobaʼ yaan u pʼáatal maʼ limpio yanil tu táan Dios tak ken tʼúubuk le kʼiinoʼ.
28 Jeʼel máaxak ka u mach u kimen wíinklil le baʼalcheʼobaʼ unaj u pʼoʼik u nookʼ,+ le máakaʼ yaan u pʼáatal maʼ limpio yanil tu táan Dios tak ken tʼúubuk le kʼiinoʼ.+ Le baʼalcheʼobaʼ maʼ limpioʼobiʼ.
29 Lelaʼ letiʼe baʼalcheʼob ku máanoʼob luʼum yéetel maʼ limpioʼobaʼ: chʼoʼ,*+ tuláakal u jejeláasil juuj, le chʼoʼ ku máan yáanal luʼumoʼ,
30 le gecooʼ, le nojoch juujoʼ, le salamandraoʼ, le x-meerechoʼ yéetel le camaleónoʼ.*
31 Le baʼalcheʼobaʼ maʼ limpioʼobiʼ.+ Tuláakal máax ka u mach u kimen wíinklil le baʼalcheʼobaʼ yaan u pʼáatal maʼ limpio yanil tu táan Dios tak ken tʼúubuk le kʼiinoʼ.+
32 Wa yaan juntúul tiʼ le baʼalcheʼob ku kíimil yéetel ku lúubul tu yóokʼol junpʼéel nuʼukul de cheʼ wa tu yóokʼol junpʼéel nookʼ wa tu yóokʼol junpʼéel kʼéewel wa tu yóokʼol junpʼéel toʼotoch nookʼeʼ,* le tuʼux lúub le baʼalcheʼoʼ yaan u pʼáatal maʼ limpio yanil tu táan Diosiʼ. Le nuʼukul túunoʼ unaj u tsʼaʼamal ich jaʼ utiaʼal ka páajchajak u usartaʼal, yaan u pʼáatal maʼ limpio tu táan Dios tak ken tʼúubuk le kʼiinoʼ, le kéen tsʼoʼokok túuneʼ yaan u pʼáatal limpioil.
33 Wa ka lúubuk le baʼalcheʼ tiʼ junpʼéel nuʼukul de kʼateʼ yaan a paʼik le nuʼukuloʼ, yéetel jeʼel baʼaxak ka yanak ichileʼ yaan u pʼáatal maʼ limpio yanil tu táan Diosiʼ.+
34 Wa le jaʼ yaan ichil le nuʼukul ku wíitsʼil tiʼ jeʼel baʼalak jaanlileʼ, le janalaʼ yaan u pʼáatal maʼ limpio yanil tu táan Diosiʼ. Yéetel jeʼel baʼaxak utiaʼal ukʼbil tsʼaʼan ichil le nuʼukulaʼ yaan u pʼáatal maʼ limpio yanil tu táan Diosiʼ.
35 Tiʼ jeʼel baʼaxak ka lúubuk u kimen wíinkliloʼobeʼ yaan u pʼáatal maʼ limpio yanil tu táan Diosiʼ. Sea tiʼ junpʼéel horno wa tiʼ junpʼéel fogón ka lúubkeʼ unaj u juʼutul. Le baʼaloʼobaʼ yaan u pʼáatloʼob maʼ limpio yaniloʼob tu táan Diosiʼ yéetel maʼ limpioʼob xan ta táaneʼexiʼ.
36 Chéen baʼaleʼ wa ku lúubul u kimen wíinklil le baʼalcheʼ ichil junpʼéel tuʼux ku síijil jaʼ wa ichil junpʼéel cisternaeʼ, leloʼobaʼ yaan u seguer u pʼáatloʼob limpioil tu táan Dios, chéen baʼaleʼ jeʼel máaxak ka u mach u kimen wíinklil le baʼalcheʼobaʼ yaan u pʼáatal maʼ limpio yanil tu táan Diosiʼ.
37 Wa ku lúubul u kimen wíinklil le baʼalcheʼ tu yóokʼol junpʼéel semilla utiaʼal pakʼbileʼ, le semillaoʼ láayliʼ limpio yanil tu táan Dioseʼ.
38 Chéen baʼaleʼ wa le kéen a chʼul le semilla ku lúubul junpʼéel parte tiʼ u kimen wíinklil le baʼalcheʼ tu yóokʼoloʼ, le semillaoʼ ku pʼáatal maʼ limpioiʼ.
39 Chéen baʼaleʼ wa juntúul tiʼ le baʼalcheʼob ku páajtal a jaantikeʼex ku kíimiloʼ, jeʼel máaxak ka u mach u kimen wíinklileʼ yaan u pʼáatal maʼ limpio yanil tu táan Dios tak ken tʼúubuk le kʼiinoʼ.+
40 Jeʼel máaxak ka u jaant u bakʼel le baʼalcheʼ kíimoʼ unaj u pʼoʼik u nookʼ, yéetel yaan u pʼáatal maʼ limpio yanil tu táan Dios tak ken tʼúubuk le kʼiinoʼ.+ Jeʼel máaxak ka u mach u kimen wíinklil le baʼalcheʼoʼ unaj u pʼoʼik u nookʼ, yéetel yaan u pʼáatal maʼ limpio yanil tu táan Dios tak ken tʼúubuk le kʼiinoʼ.
41 Jeʼel baʼalak mejen baʼalcheʼil en grupo u máanoʼobeʼ maʼ unaj a jaantikeʼexiʼ tumen maʼ limpio yaniloʼob tu táan Diosiʼ.+
42 Maʼ unaj a jaantikeʼex mix juntúul baʼalcheʼ ku máan yéetel kanpʼéel u yookoʼob mix le ku jíiltikubaʼoboʼ mix le mejen baʼalcheʼob en grupo u máanoʼob yéetel yaʼab u yookoʼoboʼ, tumen le clase baʼalcheʼobaʼ maʼ limpio yaniloʼob tu táan Diosiʼ.+
43 Maʼ a jaantikeʼex le baʼalcheʼobaʼ, tumen wa ka beetkeʼexeʼ maʼ limpio kan pʼáatleʼex tu táan Diosiʼ.+
44 Tumen teneʼ Jéeobaen, teen a Dioseʼex,+ yéetel teʼexeʼ unaj a pʼáatleʼex santoil,+ tumen teneʼ santoen.+ Le oʼolal maʼ unaj a jaantikeʼex mix juntúul tiʼ le mejen baʼalcheʼoboʼ, tumen wa ka beetkeʼexeʼ maʼ limpio kan pʼáatleʼex tin táaniʼ.
45 Tumen teneʼ Jéeobaen, teen le máax jóoʼseʼex tiʼ u luʼumil Egipto utiaʼal in beetkinba a Dioseʼexoʼ.+ Teʼex túuneʼ unaj a pʼáatleʼex santoil,+ tumen teneʼ santoen.+
46 Lelaʼ letiʼe ley yaan yil yéetel le baʼalcheʼoboʼ, le baʼalcheʼob ku xikʼnaloʼoboʼ, tuláakal baʼalcheʼ kuxaʼan ich jaʼ yéetel tuláakal u jejeláasil baʼalcheʼob kuxaʼanoʼob teʼ yóokʼol kaabaʼ.
47 Le leyaʼ ku yeʼesik baʼax clase baʼalcheʼiloʼob limpio yaniloʼob tu táan Dios yéetel máakalmáak maʼatechiʼ, yéetel ku yeʼesik xan máakalmáak ku páajtal u jaantaʼal yéetel máakalmáak maʼ tu páajtal u jaantaʼaliʼ›».+
Notas
^ Lelaʼ juntúul chan baʼalcheʼ chíikaʼan tiʼ tʼuʼul.
^ Ich hebreoeʼ ku yaʼalaʼal kaʼach «liebre». Lelaʼ juntúul baʼalcheʼ chíikaʼan tiʼ le tʼuʼuloʼ, pero maas nojoch.
^ Le chʼíichʼaʼ chíikaʼan tiʼ kʼaʼaw, chéen baʼaleʼ maas nojoch.
^ Lelaʼ juntúul chʼíichʼ ku chuk kay yéetel chíikaʼan tiʼ pato.
^ Ich hebreoeʼ ku yaʼalaʼal kaʼach «buitre».
^ Wa «insectoʼob».
^ Wa «langostaʼob».
^ Tuláakʼ tuʼuxeʼ ku yaʼalaʼal «máas, sitʼriyo».
^ Tuláakʼ tuʼuxeʼ ku yaʼalaʼal «pʼiich».
^ Lelaʼ chíikaʼan tiʼ tóolok.
^ Ilawil «Toʼotoch nookʼ», página 2582.
