Levítico 20:1-27
20 Jéeobaeʼ tu yaʼalaj xan tiʼ Moisés:
2 «Aʼal tiʼ le israelitaʼoboʼ: ‹Wa juntúul israelita bey xan wa juntúul j-táanxel luʼumil kajaʼan ichileʼex ku kʼubik u hijo wa u hija tiʼ Mólekeʼ* unaj u kíimsaʼal.+ Unaj u muruxtuntaʼal tumen le kaaj tak ken kíimkoʼ.
3 Teneʼ yaan in tsʼáaikinba tu contra le máakoʼ yéetel yaan in xuʼulsiktiʼ. Yaan in beetik beyoʼ tumen letiʼeʼ tu kʼubaj u paal tiʼ Mólek, tu beetaj baʼax kʼaas teʼ lugar santo+ tuʼux kin adorartaʼaloʼ yéetel maʼ tu yeʼesaj respeto tiʼ in santo kʼaabaʼiʼ.
4 Wa chéen ka wilkeʼex u kʼubik u hijo juntúul máak tiʼ Mólek yéetel maʼ ta kíimskeʼexeʼ,+
5 teen túuneʼ yaan in tsʼáaikinba tu contra le máak jeʼeloʼ bey xan tu contra u familia.+ Yaan in xuʼulsik tiʼ le máak paʼteʼ yéetel le máaxoʼob tu traicionartenoʼob úuchik u adorarkoʼob Mólekoʼ.
6 Le máax ku kaxtik u yáantaj le máaxoʼob ku yaʼalikoʼob ku tʼaanoʼob yéetel le kimenoʼob+ wa ku kaxtik u yáantaj le j-meenoʼoboʼ+ táan u traicionarken. Teen túuneʼ yaan in tsʼáaikinba tu contra yéetel yaan in xuʼulsiktiʼ.+
7 Teʼexeʼ unaj a limpiokíinkabaʼex yéetel a pʼáatleʼex santoil+ tin táan, tumen teneʼ santoen, teneʼ Jéeobaen, teen a Dioseʼex.
8 Teʼexeʼ unaj a beetkeʼex mantatsʼ le baʼaxoʼob kin waʼalikteʼexoʼ.+ Teneʼ Jéeobaen, teen a Dioseʼex, le máax táan u santificarkeʼexoʼ.+
9 Wa juntúul máax ku maldecirtik u papá wa u maamaeʼ unaj u kíimsaʼal.+ Tumen tu maldecirtaj u papá wa u maamaeʼ culpable tiʼ le baʼax kun úuchultiʼoʼ.
10 Wa juntúul xiib tsʼokaʼan u beel ku yantal baʼax u yil yéetel u yatan uláakʼ máakeʼ, le máak kʼebanchajoʼ unaj u kíimsaʼal bey xan le koʼoleloʼ.+
11 Juntúul xiib ku yantal baʼal u yil yéetel u yatan u papáeʼ ku taasik suʼtsilil tiʼ u papá,+ letiʼ yéetel le koʼoleloʼ unaj u kíimsaʼaloʼob. Tiʼ letiʼob yaan u culpail le baʼax kun úuchultiʼoboʼ.
12 Wa juntúul máak ku yantal baʼal u yil yéetel u yilibeʼ tu kaʼatúulaloʼob unaj u kíimsaʼaloʼob, tumen le baʼax tu beetoʼoboʼ maʼ maʼalob tu táan Diosiʼ. Tiʼ letiʼob yaan u culpail le baʼax kun úuchultiʼoboʼ.+
13 Wa juntúul xiib ku yantal baʼal u yil yéetel u yéet xiibileʼ tu kaʼatúulaloʼob unaj u kíimsaʼaloʼob, tumen jach táaj kʼaas le baʼax tu beetoʼoboʼ.+ Tiʼ letiʼob yaan u culpail le baʼax kun úuchultiʼoboʼ.
14 Wa juntúul máak ku chʼaʼik juntúul koʼolel bey xan u maama le koʼoleloʼ, leloʼ junpʼéel baʼax jach suʼtsil.+ Tu yóoxtúuliloʼob unaj u kíimsaʼaloʼob, tsʼoʼoleʼ ku tóokaʼaloʼob,*+ utiaʼal beyoʼ le baʼax suʼtsilaʼ maʼ u kaʼa beetaʼal ichileʼex.
15 Wa juntúul xiib ku yantal baʼal u yil yéetel juntúul baʼalcheʼeʼ, unaj a kíimskeʼex le máakoʼ bey xan le baʼalcheʼoʼ.+
16 Wa juntúul koʼolel ku yantal baʼal u yil yéetel juntúul baʼalcheʼeʼ+ unaj a kíimskeʼex le koʼoleloʼ bey xan le baʼalcheʼoʼ. Unaj a kíimskeʼexoʼob. Tiʼ le xiib yéetel tiʼ le koʼolel yaan u culpail le baʼax kun úuchultiʼoboʼ.
17 Wa juntúul xiib ku yantal baʼal u yil yéetel u hija u papá wa yéetel u hija u maamaeʼ, le baʼax tu beetoʼoboʼ jach suʼtsil.+ Unaj u kíimsaʼaloʼob tu táan le kaajoʼ. Letiʼeʼ tsʼoʼok u pʼatik ich suʼtsilil u kiik wa u yíitsʼinoʼ, yéetel unaj u castigartaʼal yoʼolal le baʼax kʼaas tu beetoʼ.
18 Wa juntúul xiib ku yantal baʼal u yil yéetel juntúul koʼolel tiaʼan tu kʼiiniloʼob u menstruacióneʼ, leloʼ ku yeʼesikeʼ tu táanoʼobeʼ maʼ santo le kʼiʼikʼoʼ.+ Le oʼolal tu kaʼatúulaloʼob unaj u kíimsaʼaloʼob.
19 Maʼ unaj u yantal baʼal a wil yéetel u kiik wa u yíitsʼin a maamaiʼ mix unaj u yantal baʼal a wil yéetel u kiik wa u yíitsʼin a papáiʼ. Wa ka beetkeʼ yaan a taasik suʼtsilil tiʼ letiʼ+ yéetel yaan a castigartaʼaleʼex yoʼolal le baʼax ta beeteʼexoʼ.
20 Juntúul xiib ku yantal baʼal u yil yéetel u yatan u tíoeʼ, tsʼoʼok u taasik suʼtsilil tiʼ u tío.+ Le oʼolaleʼ yaan u castigartaʼaloʼob yoʼolal le baʼax tu beetoʼoboʼ. Unaj u kíimsaʼaloʼob, maʼ kun antal u paalaloʼob.
21 Wa juntúul xiib ku tsʼoʼokol u beel yéetel u yatan u sukuʼun wa u yíitsʼineʼ, leloʼ junpʼéel baʼal jach táaj kʼaas.+ Tsʼoʼok u taasik suʼtsilil tiʼ u sukuʼun wa tiʼ u yíitsʼin, maʼ kun antal u paalaloʼob.
22 Unaj a beetkeʼex le baʼaxoʼob kin waʼalikteʼexoʼ+ yéetel unaj a kuxtaleʼex jeʼex u yaʼalik in leyoʼoboʼ.+ Beyoʼ maʼ kan jóoʼsbileʼex teʼ luʼum tuʼux táan in biskeʼexoʼ.+
23 Maʼ unaj a beetkeʼex le baʼaloʼob kʼaastak ku beetik le kaajoʼob táan in tojolchʼintik ta táaneʼexoʼ.+ Letiʼobeʼ tu beetoʼob le baʼaloʼob kʼaastakaʼ, le oʼolal teneʼ jach in pʼekmoʼob.+
24 Le oʼolal tin waʼalaj xan teʼex: «Teʼex ken a chʼaʼex le luʼum tuʼux yanoʼoboʼ, junpʼéel luʼum tuʼux ku tuul leche yéetel kaabiʼ.+ Teen Jéeoba a Dioseʼex, teen separarteʼex tiʼ u maasil kaajoʼoboʼ».+
25 Techeʼ unaj a wojéeltik máakalmáak le baʼalcheʼ yéetel le chʼíichʼ limpio in wilkoʼ bey xan máakalmáak maʼatechiʼ.+ Maʼ unaj a kʼaskúuntkabaʼex tin táan yéetel le baʼalcheʼob, le chʼíichʼoʼob, bey xan yéetel le baʼalcheʼob ku jíiltikubaʼob tsʼoʼok in waʼalik maʼ limpioʼoboʼ.+
26 Teʼexeʼ unaj a pʼáatleʼex santoil tin táan, tumen teen Jéeoba a Dioseʼexeʼ santoen,+ teen separarteʼex tiʼ u maasil kaajoʼob utiaʼal ka a beetabaʼex in kaajal.+
27 Jeʼel máaxak ka u yaʼal ku tʼaan yéetel le kimenoʼoboʼ unaj u kíimsaʼal bey xan unaj u beetaʼal tiʼ le j-meenoʼoboʼ. Unaj u muruxtuntaʼaloʼob tumen le kaaj tak ken kíimkoʼoboʼ.+ Tiʼ letiʼob yaan u culpail le baʼax kun úuchultiʼoboʼ›».
Notas
^ Ilawil página 2572.
^ Lelaʼ maʼ xaaneʼ u kʼáat u yaʼaleʼ le koʼolel yéetel u maamaoʼ de acuerdoʼob yéetel le baʼax suʼtsil tu beetoʼoboʼ.
