Malaquías 4:1-6
4 Jéeoba, le máax gobernartik le ángeloʼoboʼ, ku yaʼalik: «¡Ilawileʼex!, táan u taal le kʼiin ku tóochʼbal jeʼex u kʼáakʼil junpʼéel hornooʼ,+ teʼ kʼiin jeʼeloʼ le máaxoʼob ku creerkubaʼob yéetel ku beetkoʼob baʼax kʼaasoʼ yaan u tóokaʼaloʼob jeʼex le sojoloʼ. Teʼ kʼiin jeʼeloʼ maʼ kun pʼatbil mix u kʼaboʼob mix u mootsoʼob.
2 Chéen baʼaleʼ tu yóokʼol le máaxoʼob ku respetarkoʼob in kʼaabaʼoʼ yaan u léembal le Kʼiin ku taasik justiciaoʼ, yéetel yaan u tsʼaʼakaloʼob tumen u juul u sáasililoʼ. Letiʼob túuneʼ yaan u síitʼoʼob yéetel kiʼimak óolal jeʼex u síitʼ le mejen polok wakaxoʼoboʼ».
3 Jéeoba, le máax gobernartik le ángeloʼoboʼ, ku yaʼalik: «Teʼ kʼiin ken in beet u yúuchul lelaʼ, teʼexeʼ yaan a pepeʼchaʼatikeʼex le kʼasaʼan máakoʼoboʼ, letiʼobeʼ yaan u pʼáatloʼob jeʼex le luʼum ka peʼechaʼtikeʼexoʼ».
4 «Kʼaʼajseʼex u Ley Moisés,* le máax meyajtenoʼ, kʼaʼajseʼex le baʼaxoʼob tin waʼalaj ka beetaʼakoʼ bey xan le leyoʼob tin tsʼáaj teʼ Horeboʼ. Lelaʼ tin tsʼáaj tiʼ tuláakal u kaajil Israel utiaʼal ka u beete.+
5 ¡Ilawileʼex!, táan in túuxtikteʼex le profeta Elías+ antes tiʼ u kʼuchul u kʼiinil Jéeobaoʼ, junpʼéel kʼiin jach nojoch yéetel ku beetik u jaʼakʼal u yóol máak.+
6 Letiʼeʼ yaan u beetik ka pʼáatak u puksiʼikʼal le taatatsiloʼob jeʼex u puksiʼikʼal le paalaloʼoboʼ,+ yéetel ka pʼáatak u puksiʼikʼal le paalaloʼob jeʼex u puksiʼikʼal le taatatsiloʼoboʼ. Utiaʼal beyoʼ maʼ in taal utiaʼal ka in beet loob tiʼ le luʼumoʼ yéetel utiaʼal ka in xuʼulstiʼ».
Notas
^ Ilawil «U Ley Moisés», página 2586.
