Números 17:1-13
-
U xóolteʼ Aaróneʼ ku loolankil (1-13)
17 Jéeoba túuneʼ tu yaʼalaj tiʼ Moisés:
2 «Aʼal tiʼ le israelitaʼoboʼ u nojchil cada tribueʼ yaan u taasik junxóotʼ cheʼ, 12 u pʼéelal cheʼ kun taasbil, junxóotʼ cheʼ yoʼolal cada tribu.+ Tsʼíibt u kʼaabaʼ cada juntúul yóokʼol le junxóotʼ cheʼ ken u taasoʼ.
3 Unaj a tsʼíibtik u kʼaabaʼ Aarón yóokʼol le junxóotʼ cheʼ utiaʼal Levíoʼ, tumen chéen junxóotʼ cheʼ yaan utiaʼal u nojchil cada tribu.
4 Le xóotʼ cheʼoboʼ unaj a tsʼáaik teʼ najil reuniónoʼ, aktáan tiʼ le Caja tuʼux yaan le jaajay tuunichoʼoboʼ,+ le tuʼux suuk in chíikbeskinba tiʼ teʼexoʼ.+
5 Le xóotʼ cheʼ u tiaʼal le máax ken in yéeyoʼ+ yaan u jóokʼol u kʼuʼukʼ, yéetel yaan in beetik ka xuʼuluk u x-mukul tʼaan le israelitaʼob tin contraoʼ,+ le máaxoʼob táan xan u tʼaanoʼob ta contraʼexoʼ».+
6 Moisés túuneʼ tu tʼanaj le israelitaʼoboʼ, tuláakal túun u nuuktakil le tribuʼoboʼ tu taasoʼob le junxóotʼ cheʼ u tiaʼaloʼoboʼ ka tu tsʼáajoʼob tiʼ Moisés, 12 u pʼéelal cheʼob taasaʼabi, le xóotʼ cheʼ tu taasaj Aarónoʼ tiaʼan kaʼach ichil u maasil cheʼoboʼ.
7 Moisés túuneʼ tu tsʼáaj tuláakal le xóotʼ cheʼob tu táan Jéeobaoʼ, tu tsʼáaj ichil le tabernáculo tuʼux tsʼaʼan le jaajay tuunichoʼoboʼ.
8 Le ka sáaschaj tuláakʼ kʼiineʼ Moiséseʼ ook ichil le tabernáculooʼ ka tu yileʼ le junxóotʼ cheʼ u tiaʼal u tribu Leví tuʼux tsʼíibtaʼan u kʼaabaʼ Aarónoʼ tsʼoʼok u jóokʼol u kʼuʼukʼ, táan u loolankil yéetel yaan u almendrailoʼob tsʼoʼok u kʼantaloʼob.
9 Moisés túuneʼ tu chʼaʼaj le xóotʼ cheʼob yanoʼob tu táan Jéeobaoʼ ka tu jóoʼsoʼob tu táan u kaajil Israel. Letiʼobeʼ tu yiloʼob le cheʼoboʼ, cada juntúul máak túuneʼ tu chʼaʼaj le xóotʼ cheʼ u tiaʼaloʼ.
10 Jéeoba túuneʼ tu yaʼalaj tiʼ Moisés: «Le xóotʼ cheʼ u tiaʼal Aarónoʼ+ tsʼáa tu kaʼatéen aktáan tiʼ le Caja tuʼux yaan le jaajay tuunichoʼoboʼ, lelaʼ tiʼ kun pʼáatliʼ yéetel yaan u meyaj bey señal+ utiaʼal u kʼaʼajal u yiikʼ le kaaj jach tercoaʼ,+ beyoʼ yaan u xuʼulul u x-mukul tʼaanoʼob tin contra yéetel beyoʼ maʼ kun kíimloʼob».
11 Moisés túuneʼ tu séebaʼanil tu beetaj le baʼax aʼalaʼabtiʼ tumen Jéeobaoʼ. Tu beetaj jach jeʼex úuchik u yaʼalaʼaltiʼoʼ.
12 Le israelitaʼob túunoʼ tu yaʼaloʼob tiʼ Moisés: «¡Beoraaʼ yaan k-kíimil, seguro yaan k-kíimil, tuláakloʼon yaan k-kíimil!
13 ¡Tuláakal máax ka náatsʼak tu tabernáculo Jéeobaeʼ yaan u kíimil!+ ¿Bey wa túun kun láaj tsʼoʼokol tiʼ toʼonaʼ?».+
