Números 2:1-34
2 Jéeoba túuneʼ tu tʼanaj Moisés yéetel Aaróneʼ ka tu yaʼalajtiʼob:
2 «Le israelitaʼoboʼ unaj u armartik u yotochoʼob teʼ tuʼux asignartaʼan u grupoʼoboʼ,*+ cada juntúuleʼ unaj u yantal naatsʼ tiʼ le señal eʼesik tiʼ baʼax tribuil u taaloʼ. Unaj u armartik u yotochoʼob tu baʼpach le najil reuniónoʼ, u jool u yotochoʼobeʼ unaj u yantal tu tojil le najil reuniónoʼ.
3 Le máaxoʼob kun antaloʼob tu tojil lakʼin,* tu tojil tuʼux ku tíipʼil kʼiinoʼ, letiʼe grupo nuʼuktaʼan tumen Judáoʼ, junmúuchʼ yéetel tuláakal le xiiboʼob jeʼel u páajtal u beetik u soldadoiloʼoboʼ. U nojchil u tribu Judáeʼ Naasón,+ u hijo Aminadab.
4 Tuláakal le xiiboʼob jeʼel u páajtal u beetik u soldadoiloʼob ichil u tribu Judáoʼ 74,600.+
5 Tu tséeleʼ tiʼ kun antal u tribu Isacariʼ. U nojchil u tribu Isacareʼ Netanel,+ u hijo Zuar.
6 Tuláakal le xiiboʼob jeʼel u páajtal u beetik u soldadoiloʼob ichil u tribu Isacaroʼ 54,400.+
7 Tu tséel xaneʼ tiʼ kun antal u tribu Zabulóniʼ. U nojchil u tribu Zabulóneʼ Eliab,+ u hijo Helón.
8 Tuláakal le xiiboʼob jeʼel u páajtal u beetik u soldadoiloʼob ichil u tribu Zabulónoʼ 57,400.+
9 Tuláakal le xiiboʼob jeʼel u páajtal u beetik u soldadoiloʼob ichil le grupo nuʼuktaʼan tumen Judáoʼ 186,400. Letiʼob le yáax grupo unaj u desarmartik u yotochoʼoboʼ.+
10 Tu tojil noojoleʼ* tiʼ kun antal le grupo nuʼuktaʼan tumen Rubénoʼ,+ junmúuchʼ yéetel tuláakal le xiiboʼob jeʼel u páajtal u beetik u soldadoiloʼoboʼ. U nojchil u tribu Rubéneʼ Elizur,+ u hijo Sedeur.
11 Tuláakal le xiiboʼob jeʼel u páajtal u beetik u soldadoiloʼob ichil u tribu Rubénoʼ 46,500.+
12 Tu tséeleʼ tiʼ kun antal u tribu Simeóniʼ. U nojchil u tribu Simeóneʼ Selumiel,+ u hijo Zurisaday.
13 Tuláakal le xiiboʼob jeʼel u páajtal u beetik u soldadoiloʼob ichil u tribu Simeónoʼ 59,300.+
14 Tu tséel xaneʼ tiʼ kun antal u tribu Gadiʼ. U nojchil u tribu Gadeʼ Eliasaf,+ u hijo Rewel.*
15 Tuláakal le xiiboʼob jeʼel u páajtal u beetik u soldadoiloʼob ichil u tribu Gadoʼ 45,650.+
16 Tuláakal le xiiboʼob jeʼel u páajtal u beetik u soldadoiloʼob ichil le grupo nuʼuktaʼan tumen Rubénoʼ 151,450. Letiʼob le segundo grupo unaj u desarmartik u yotochoʼoboʼ.+
17 Le kéen bisaʼak táanxel tuʼux le najil reuniónoʼ,+ u tribu le levitaʼoboʼ unaj u pʼáatal chúumuk tiʼ u maasil tribuʼoboʼ.
Tuláakal le israelitaʼoboʼ unaj u binoʼob tu tsoolol jeʼex yaniloʼoboʼ.+ Mix juntúul máak unaj u jóokʼol ichil le grupo tuʼux asignartaʼanoʼ.
18 Tu tojil chikʼineʼ* tiʼ kun antal le grupo nuʼuktaʼan tumen Efraínoʼ, junmúuchʼ yéetel tuláakal le xiiboʼob jeʼel u páajtal u beetik u soldadoiloʼoboʼ. U nojchil u tribu Efraíneʼ Elisamá,+ u hijo Amiud.
19 Tuláakal le xiiboʼob jeʼel u páajtal u beetik u soldadoiloʼob ichil u tribu Efraínoʼ 40,500.+
20 Tu tséeleʼ tiʼ kun antal u tribu Manasésiʼ.+ U nojchil u tribu Manaséseʼ Gamaliel,+ u hijo Pedazur.
21 Tuláakal le xiiboʼob jeʼel u páajtal u beetik u soldadoiloʼob ichil u tribu Manasésoʼ 32,200.+
22 Tu tséel xaneʼ tiʼ kun antal u tribu Benjamíniʼ. U nojchil u tribu Benjamíneʼ Abidán,+ u hijo Guideoní.
23 Tuláakal le xiiboʼob jeʼel u páajtal u beetik u soldadoiloʼob ichil u tribu Benjamínoʼ 35,400.+
24 Tuláakal le xiiboʼob jeʼel u páajtal u beetik u soldadoiloʼob ichil le grupo nuʼuktaʼan tumen Efraínoʼ 108,100. Letiʼob le tercer grupo unaj u desarmartik u yotochoʼoboʼ.+
25 Tu tojil xamaneʼ* tiʼ kun antal le grupo nuʼuktaʼan tumen Danoʼ, junmúuchʼ yéetel tuláakal le xiiboʼob jeʼel u páajtal u beetik u soldadoiloʼoboʼ. U nojchil u tribu Daneʼ Ayézer,+ u hijo Amisaday.
26 Tuláakal le xiiboʼob jeʼel u páajtal u beetik u soldadoiloʼob ichil u tribu Danoʼ 62,700.+
27 Tu tséeleʼ tiʼ kun antal u tribu Aseriʼ. U nojchil u tribu Asereʼ Paguiel,+ u hijo Ocrán.
28 Tuláakal le xiiboʼob jeʼel u páajtal u beetik u soldadoiloʼob ichil u tribu Aseroʼ 41,500.+
29 Tu tséel xaneʼ tiʼ kun antal u tribu Neftalíiʼ. U nojchil u tribu Neftalíeʼ Airá,+ u hijo Enán.
30 Tuláakal le xiiboʼob jeʼel u páajtal u beetik u soldadoiloʼob ichil u tribu Neftalíoʼ 53,400.+
31 Tuláakal le xiiboʼob jeʼel u páajtal u beetik u soldadoiloʼob ichil le grupo nuʼuktaʼan tumen Danoʼ 157,600. Letiʼob le u tsʼook grupo unaj u desarmartik u yotochoʼoboʼ».+
32 Leloʼobaʼ letiʼe israelitaʼob tsʼíibtaʼab u kʼaabaʼob según tiʼ baʼax tribuil u taaloʼoboʼ. Tuláakal le xiiboʼob jeʼel u páajtal u beetik u soldadoiloʼob ichil le kanpʼéel grupoʼoboʼ 603,550.+
33 Pero le levitaʼoboʼ maʼ tsʼíibtaʼab u kʼaabaʼob+ junmúuchʼ yéetel u maasil israelitaʼoboʼ,+ beetaʼab jach jeʼex aʼalaʼabik tiʼ Moisés tumen Jéeobaoʼ.
34 Le israelitaʼoboʼ tu beetoʼob tuláakal le baʼax aʼalaʼab tiʼ Moisés tumen Jéeobaoʼ. Jeʼex aʼalaʼaniltiʼobeʼ tu armartoʼob yéetel tu desarmartoʼob u yotochoʼob+ según tiʼ baʼax familiail yéetel tiʼ baʼax chʼiʼibalil* u taaloʼob yéetel según tiʼ baʼax grupo asignartaʼanoʼob.+
Notas
^ Óoxpʼéel tribu yaan ichil junpʼéel grupo.
^ Wa «este».
^ Wa «sur».
^ Tiʼ Números 1:14; 7:42, 47 yéetel 10:20 ku yaʼalaʼaltiʼ «Dewel».
^ Wa «oeste».
^ Wa «norte».
^ Wa «descendenciail».
