Números 30:1-16
30 Moisés túuneʼ tu tʼanaj u nuuktakil u kaajil+ Israeleʼ ka tu yaʼalajtiʼob: «Lelaʼ letiʼe baʼax tsʼoʼok u yaʼalik Jéeobaaʼ:
2 Wa juntúul xiib ku beetik junpʼéel promesa+ tiʼ Jéeoba bey xan wa ku beetik junpʼéel juramento+ utiaʼal maʼ u beetik wa baʼaxeʼ, le xiiboʼ unaj u beetik le baʼax tu yaʼaloʼ.+ Unaj u beetik jeʼel baʼaxak tu jurartaj u beetkeʼ.+
3 Wa juntúul x-chʼúupal kajaʼan tu yotoch u papá ku beetik junpʼéel promesa tiʼ Jéeoba bey xan wa ku jurartik maʼ u beetik wa baʼaxeʼ,
4 wa ku yuʼubaʼal tumen u papá le promesa tu beetoʼ wa le baʼax tu jurartaj maʼ ken u beetoʼ, pero u papáeʼ maʼ tu yaʼalik mix baʼaleʼ, le x-chʼúupaloʼ unaj u beetik tuláakal le baʼaxoʼob tu prometertoʼ bey xan tuláakal le baʼaxoʼob tu jurartoʼ.
5 Chéen baʼaleʼ wa ku yuʼubaʼal tumen u papá le baʼaxoʼob tu prometertaj wa le baʼaxoʼob tu jurartaj maʼ ken u beetoʼ yéetel ku yaʼalaʼaltiʼ maʼ u beetkeʼ, le x-chʼúupaloʼ maʼ kʼaʼabéet u beetik le baʼaxoʼob tu yaʼaloʼ. Jéeobaeʼ yaan u perdonartik tumen maʼ chaʼabtiʼ tumen u papáiʼ.+
6 Chéen baʼaleʼ wa ku tsʼoʼokol u beel le x-chʼúupaloʼ, yéetel yaan junpʼéel promesa u beetmaj bey xan wa yaan baʼax tu prometertaj u beetik sin ke u tuklik tubeeleʼ,
7 le kʼiin ken uʼuyaʼak tumen u yíicham le baʼax tu prometertoʼ, wa u yíicham maʼ tu yaʼalik mix baʼaleʼ, le koʼoleloʼ yaan u beetik le baʼaxoʼob tu prometertoʼ bey xan le baʼaxoʼob tu jurartoʼ.
8 Chéen baʼaleʼ wa le kéen u yojéelt u yíicham le koʼolel ku yaʼaliktiʼ maʼ u beetkoʼ, le koʼoleloʼ maʼ kʼaʼabéet u beetik le baʼax tu yaʼalaj u beetkoʼ mix le baʼax tu prometertaj sin ke u tuklik tubeeloʼ.+ Jéeobaeʼ yaan u perdonartik le koʼoleloʼ.
9 Chéen baʼaleʼ wa juntúul viuda wa juntúul divorciada ku beetik junpʼéel promesaeʼ letiʼeʼ unaj u beetik tuláakal le baʼax tu prometertoʼ.
10 Chéen baʼaleʼ wa juntúul koʼolel tiaʼan tu yotoch u yíicham le kéen u beet junpʼéel promesa wa le kéen u jurart maʼ ken u beet wa baʼaxeʼ,
11 yéetel u yíicham maʼ tu yaʼalajtiʼ mix baʼaleʼ mix tu yaʼalajtiʼ maʼ u beetkeʼ, le koʼoleloʼ unaj u beetik tuláakal le baʼax tu prometertoʼ bey xan tuláakal le baʼax tu jurartaj maʼ ken u beetoʼ.
12 Chéen baʼaleʼ wa le kéen u yojéelt u yíicham ku yaʼaliktiʼ maʼ u beetkeʼ, le koʼoleloʼ maʼ kʼaʼabéet u beetik le baʼax tu prometertoʼ+ mix le baʼax tu jurartoʼ. U yíicham aʼaltiʼ maʼ u beetik, Jéeoba túuneʼ yaan u perdonartik le koʼoleloʼ.
13 Jeʼel baʼaxak promesail wa jeʼel baʼaxak ka u jurart u beetik le koʼolel jeʼel u beetik u muʼyajoʼ, u yíicham ken u tukult wa yaan u chaʼik u beetik bey xan wa maʼ.
14 Chéen baʼaleʼ, wa le kéen máanak kʼiin u yíicham maʼ tu yaʼalik mix baʼaleʼ, le íichamtsiloʼ tsʼoʼok u chaʼik u beetik tuláakal le baʼaxoʼob tu prometertaj u yatanoʼ bey xan tuláakal le baʼaxoʼob tu jurartoʼ. Le koʼolel túunoʼ unaj u beetik le baʼaxoʼob tu prometertoʼ. Le íichamtsiloʼ tu chaʼaj u beetik tumen maʼ tu yaʼalaj mix baʼal le kʼiin ka tu yuʼubaj le baʼax tu prometertoʼ.
15 Chéen baʼaleʼ wa le íichamtsil tsʼoʼok u máan tiempo u yuʼub le baʼax tu prometertaj u yatan le kéen u yaʼaltiʼ maʼ u beetkoʼ, letiʼ kun kuchik u kʼeban le koʼoleloʼ.+
16 Lelaʼ letiʼe leyoʼob tu yaʼalaj Jéeoba tiʼ Moisés tu yoʼolal juntúul íichamtsil yéetel u yatan bey xan tu yoʼolal juntúul taatatsil yéetel u hija kajaʼan tu yotoch».
