Números 31:1-54
31 Jéeoba túuneʼ tu yaʼalaj tiʼ Moisés:
2 «Vengartaba+ tiʼ le madianitaʼob+ yoʼolal le baʼax tu beetoʼob tiʼ le israelitaʼoboʼ. Le kéen tsʼoʼokkeʼ techeʼ yaan a kíimil».+
3 Moisés túuneʼ tu tʼanaj le kaajoʼ ka tu yaʼalajtiʼ: «Prepararteʼex máakoʼob ichileʼex utiaʼal ka xiʼikoʼob baʼateʼel* tu contra Madián, yéetel utiaʼal ka u vengartubaʼob tiʼ Madián tu kʼaabaʼ Jéeoba.
4 Unaj a túuxtikeʼex 1,000 u túulal máakoʼob tiʼ cada tribu tiʼ tuláakal u tribuiloʼob Israel utiaʼal ka yanakoʼob ichil le ejércitooʼ».
5 Bey túunoʼ tiʼ tuláakal u milesil israelitaʼobeʼ+ chʼaʼab 1,000 u túulal tiʼ cada tribuiʼ, beyoʼ tu chukaj 12,000 u túulal israelitaʼob u prepararmubaʼob utiaʼal le baʼateloʼ.*
6 Moisés túuneʼ tu túuxtaj 1,000 u túulal israelitaʼob tiʼ cada tribu utiaʼal le baʼateloʼ, tu yéeteloʼobeʼ tu túuxtaj xan Fineás+ u hijo Eleazar le sacerdoteoʼ, letiʼeʼ tu chʼaʼaj u bis le nuʼukuloʼob santoʼob yéetel le trompetaʼob+ ku yustaʼal teʼ baʼateloʼ.
7 Letiʼobeʼ baʼatelnajoʼob tu contra Madián jach jeʼex úuchik u yaʼalik Jéeoba tiʼ Moisésoʼ yéetel tu kíimsoʼob tuláakal le xiiboʼoboʼ.
8 Ichil le máaxoʼob tu kíimsoʼoboʼ tiaʼan u reyiloʼob u luʼumil Madiániʼ, cinco u túulaloʼob: Eví, Rékem, Zur, Uur yéetel Reba. Tu kíimsoʼob xan Balaam+ u hijo Beor yéetel espada.
9 Chéen baʼaleʼ le israelitaʼoboʼ tu chʼaʼaj u bisoʼob le koʼoleloʼob yéetel le mejen paalaloʼob yanoʼob tu luʼumil Madiánoʼ. Tu chʼaʼajoʼob xan tuláakal u yalakʼ baʼalcheʼob, tuláakal u yalakʼ wakaxoʼob, yéetel tuláakal le uláakʼ baʼaloʼob yaantiʼoboʼ.
10 Tu tóokoʼob xan tuláakal le kaajoʼob tuʼux kajaʼanoʼoboʼ bey xan tuláakal le lugaroʼob tuʼux ku pʼáatloʼob kajtaloʼ.
11 Tu chʼaʼajoʼob xan tuláakal le baʼaloʼob yaan tiʼ le madianitaʼoboʼ, tu chʼaʼajoʼob baʼalcheʼob bey xan máakoʼob.
12 Le israelitaʼob túunoʼ tu taasoʼob le máakoʼob bey xan le baʼaloʼob tu chʼaʼajoʼoboʼ, tu taasoʼob tu táan Moisés, tu táan Eleazar le sacerdoteoʼ bey xan tu táan tuláakal u kaajil Israel. Tu taasoʼob teʼ tu desiertoil Moaboʼ,+ le tuʼux jelekbal le kaajoʼ, naatsʼ tiʼ le Jordánoʼ yéetel aktáan tiʼ Jericó.
13 Moisés, Eleazar le sacerdoteoʼ yéetel u nuuktakil le kaajoʼ jóokʼoʼob túun paach kaaj utiaʼal u muchʼkubaʼob tu yéeteloʼob.
14 Chéen baʼaleʼ Moiséseʼ kʼuuxilnaj yéetel u nuuktakil le soldadoʼoboʼ, u nuuktakil le grupoʼob de 1,000 máakoʼoboʼ yéetel u nuuktakil le grupoʼob de 100 máakoʼoboʼ, le máaxoʼob táan u suutoʼob tiʼ le baʼateloʼ.
15 Moiséseʼ tu yaʼalajtiʼob: «¿Baʼaxten ta pʼateʼex kuxaʼanil tuláakal le koʼoleloʼoboʼ?
16 ¡Ilawileʼex! Letiʼobeʼ tu yuʼuboʼob u tʼaan Balaam ka tu túulchʼintoʼob u kaajil Israel utiaʼal ka u traicionartoʼob Jéeoba,+ yéetel ka u adorartoʼob le maʼ jaajil dios yaan Peoroʼ.+ Yoʼolal le jeʼeloʼ Jéeobaeʼ tu castigartaj le kaajoʼ.+
17 Beora túunaʼ ichil tuláakal le mejen paalaloʼoboʼ unaj a kíimskeʼex le mejen xiʼipalaloʼoboʼ, yéetel unaj xan a kíimskeʼex tuláakal le koʼoleloʼob tsʼoʼok u yantal baʼal u yiloʼob yéetel juntúul xiiboʼ.
18 Chéen baʼaleʼ jeʼel u páajtal a pʼatkeʼex kuxaʼanil tuláakal le x-chʼúupalaloʼob maʼ yanak baʼal u yiloʼob yéetel juntúul xiiboʼ.+
19 Teʼexeʼ unaj a pʼáatleʼex kajtal paach kaaj durante siete días. Tuláakal le máax tu kíimsaj wa máaxoʼ bey xan tuláakal le máax tu machaj juntúul máak kimeneʼ+ unaj u limpiokíinkuba+ le kéen u chuk tres días bey xan le kéen u chuk siete díasoʼ. Bey unaj a beetkeʼex teʼexoʼ bey xan le máaxoʼob ta chʼaʼaj a taaseʼexoʼ.
20 Unaj xan a limpiokíinkeʼex tuláakal le nookʼoʼoboʼ, tuláakal le baʼaloʼob beetaʼan de kʼéeweloʼ, tuláakal le baʼaloʼob beetaʼan yéetel u tsoʼotsel chivooʼ yéetel tuláakal le baʼaloʼob beetaʼan yéetel cheʼoʼ».
21 Eleazar le sacerdote túunoʼ tu yaʼalaj tiʼ le soldadoʼob binoʼob baʼateloʼ: «Lelaʼ letiʼe ley tu tsʼáaj Jéeoba tiʼ Moisésoʼ:
22 ‹Chéen le oro, le plata, le cobre, le fierro, le estaño yéetel le plomooʼ,
23 tuláakal baʼax maʼ tu páajtal u yeleleʼ, unaj a máanskeʼex ich kʼáakʼ utiaʼal u pʼáatal limpioil. Tsʼoʼoleʼ unaj xan u limpiokíintaʼaloʼob yéetel le jaʼ ku meyaj utiaʼal leloʼ.+ Tuláakal baʼax maʼ tu páajtal u máansaʼal ich kʼáakʼeʼ unaj u limpiokíintaʼal yéetel jaʼ.
24 Le kéen u chuk siete díaseʼ unaj a pʼoʼik a nookʼeʼex yéetel yaan a pʼáatleʼex limpioil, le kéen tsʼoʼokkeʼ jeʼel u páajtal a wookleʼex ichil le kaajoʼ›».+
25 Jéeoba túuneʼ tu yaʼalaj tiʼ Moisés:
26 «Xok tuláakal le baʼax chʼaʼaboʼ, xok tuláakal le koʼoleloʼoboʼ bey xan tuláakal le baʼalcheʼoboʼ. Unaj a beetik junmúuchʼ yéetel Eleazar le sacerdoteoʼ bey xan yéetel tuláakal u nuuktakil le familiaʼob yanoʼob teʼ kaajoʼ.
27 Yaan a jóoʼsik kaʼapʼéel parte tiʼ tuláakal le baʼax taasaʼaboʼ, junpʼéel parteeʼ yaan u tsʼaʼabal tiʼ le soldadoʼob binoʼob baʼateloʼ yéetel le ku sobraroʼ utiaʼal le kaajoʼ.+
28 Tiʼ le jaats ku tocar tiʼ le soldadoʼoboʼ unaj a chʼaʼik juntúul koʼolel tiʼ cada 500 koʼoleloʼob, bey xan unaj a beetik yéetel le wakaxoʼoboʼ, le burroʼoboʼ yéetel le tamanoʼoboʼ, lelaʼ junpʼéel impuesto utiaʼal Jéeoba.
29 Unaj a chʼaʼik tiʼ le jaats ku tocartiʼoboʼ yéetel unaj a tsʼáaik tiʼ Eleazar le sacerdoteoʼ, lelaʼ junpʼéel baʼal ku tsʼaʼabal utiaʼal Jéeoba.+
30 Tiʼ le jaats ku tocar tiʼ le israelitaʼoboʼ unaj a chʼaʼik juntúul koʼolel tiʼ cada 50 koʼoleloʼob, bey xan unaj a beetik yéetel le wakaxoʼoboʼ, le burroʼoboʼ, le tamanoʼoboʼ, bey xan yéetel tuláakal uláakʼ baʼalcheʼ ku yalakʼtaʼal, yéetel unaj a tsʼáaik tiʼ le levitaʼob+ ku yilkoʼob tuláakal le meyaj ku beetaʼal tu tabernáculo Jéeobaoʼ».+
31 Moisés yéetel Eleazar le sacerdote túunoʼ tu beetoʼob jach jeʼex úuchik u yaʼalik Jéeoba tiʼ Moisésoʼ.
32 Le baʼaxoʼob chʼaʼab tumen le máaxoʼob binoʼob teʼ baʼateloʼ letiʼe jeʼelaʼ: 675,000 tamanoʼob,
33 72,000 wakaxoʼob,
34 yéetel 61,000 burroʼob.
35 Tuláakal le koʼoleloʼob maʼ yanak baʼal u yiloʼob yéetel juntúul xiibeʼ+ tu chukaj 32,000 u túulal.
36 Le tamanoʼob tocarnaj tiʼ le máaxoʼob binoʼob baʼateloʼ tu chukaj 337,500 u túulal.
37 Le tamanoʼob chʼaʼab utiaʼal le impuesto utiaʼal Jéeobaoʼ tu chukaj 675 u túulal.
38 Le wakaxoʼoboʼ 36,000 u túulal, yéetel le wakaxoʼob chʼaʼab utiaʼal le impuesto utiaʼal Jéeobaoʼ tu chukaj 72 u túulal.
39 Le burroʼoboʼ 30,500 u túulal, yéetel le burroʼob chʼaʼab utiaʼal le impuesto utiaʼal Jéeobaoʼ tu chukaj 61 u túulal.
40 Le koʼoleloʼoboʼ 16,000 u túulaloʼob, yéetel le jaytúul chʼaʼaboʼob utiaʼal le impuestoʼob utiaʼal Jéeobaoʼ tu chukaj 32 u túulaloʼob.
41 Moisés túuneʼ tu tsʼáaj le impuesto utiaʼal Jéeoba tiʼ Eleazar le sacerdoteoʼ,+ tu beetaj jach jeʼex úuchik u yaʼalaʼaltiʼ tumen Jéeobaoʼ.
42 Tiʼ le jaats ku tocar tiʼ le israelitaʼoboʼ, le jaats tu chʼaʼaj Moisés tiʼ le baʼaloʼob tu taasaj le máaxoʼob binoʼob teʼ baʼateloʼ,
43 letiʼe jeʼelaʼ: 337,500 tamanoʼob,
44 36,000 wakaxoʼob,
45 30,500 burroʼob,
46 yéetel 16,000 koʼoleloʼob.
47 Tiʼ le jaats ku tocar tiʼ le israelitaʼoboʼ Moiséseʼ tu chʼaʼaj juntúul koʼolel tiʼ cada 50 koʼoleloʼob, yéetel juntúul baʼalcheʼ tiʼ cada 50 baʼalcheʼob, ka tu tsʼáaj tiʼ le levitaʼob+ ku yilkoʼob tuláakal le meyaj ku beetaʼal tu tabernáculo Jéeobaoʼ,+ tu beetaj jach jeʼex úuchik u yaʼalaʼaltiʼ tumen Jéeobaoʼ.
48 U nuuktakil túun le ejércitooʼ, u nuuktakil le grupoʼob de 1,000 máakoʼoboʼ+ yéetel u nuuktakil le grupoʼob de 100 máakoʼoboʼ, náatsʼoʼob tu yiknal Moiséseʼ,
49 ka tu yaʼaloʼobtiʼ: «Toʼoneʼ tsʼoʼok k-xokik tuláakal le soldadoʼob tsʼaʼanoʼob utiaʼal k-nuʼuktoʼoboʼ, yéetel mix juntúul tiʼ letiʼob ku bineltikiʼ.+
50 Le oʼolaleʼ chaʼa tiʼ cada juntúul tiʼ toʼon k-tsʼáaik tiʼ Jéeoba bey junpʼéel ofrendaeʼ baʼaloʼob de oro, cadenaʼob utiaʼal u tsʼáaik tu yook máak, esclavaʼob, anilloʼob utiaʼal sellar, tuupoʼob, yéetel uláakʼ alhajaʼob, utiaʼal beyoʼ ka k-limpiokíintba tu táan Jéeoba».
51 Moisés yéetel Eleazar le sacerdote túunoʼ tu kʼamoʼob le orooʼ, tuláakal le alhajaʼob tu tsʼáajoʼoboʼ.
52 Tuláakal le oro tsʼaʼab tiʼ Jéeoba tumen u nuuktakil le grupoʼob de 1,000 máakoʼoboʼ yéetel u nuuktakil le grupoʼob de 100 máakoʼoboʼ, tu chukaj óoliʼ 191 kilos.*
53 Cada juntúul tiʼ le máaxoʼob binoʼob teʼ baʼateloʼ tu chʼaʼajoʼob junpʼéel parte tiʼ le baʼaloʼob tu taasoʼoboʼ.
54 Moisés yéetel Eleazar le sacerdoteoʼ tu kʼamoʼob le oro tsʼaʼab tumen u nuuktakil le grupoʼob de 1,000 máakoʼoboʼ yéetel u nuuktakil le grupoʼob de 100 máakoʼoboʼ ka tu yoksoʼob teʼ najil reunión utiaʼal u kʼaʼajsaʼal u kaajil Israel tumen Jéeobaoʼ.
Notas
^ Wa «utiaʼal le ejércitooʼ».
^ Wa «utiaʼal le ejércitooʼ».
^ Ich hebreoeʼ ku yaʼalaʼal kaʼach «16,750 siclos».
