Números 36:1-13
-
Wa ku tsʼoʼokol u beel le koʼolel yaan u herenciaoʼ (1-13)
36 U nuuktakil u familiaʼob u paalal Galaad, u hijo Makir,+ u hijo Manasés, ku taaloʼob tiʼ u familiaʼob u paalal Joséeʼ, náatsʼoʼobeʼ ka tʼaanajoʼob tu táan Moisés yéetel tu táan u nuuktakil le kaajoʼ, le u nuuktakil u familiaʼob le israelitaʼoboʼ.
2 Letiʼobeʼ tu yaʼaloʼob: «Jéeobaeʼ tu yaʼalaj tiʼ in yuum ka u tʼox le luʼum+ bey herencia tiʼ le israelitaʼoboʼ. Tiʼ in yuumeʼ aʼalaʼabtiʼ tumen Jéeoba ka u tsʼáa u herencia u hijaʼob k-sukuʼun Zelofead.+
3 Wa le x-chʼúupalaloʼob ku tsʼoʼokol u beeloʼob yéetel xiiboʼob ku taaloʼob tiʼ uláakʼ tribu tiʼ u kaajil Israeleʼ, u herencia le koʼoleloʼoboʼ yaan u xuʼulul u pertenecer tiʼ u herencia k-papáʼob yéetel yaan u máan tiʼ u herencia le tribu tuʼux kun tsʼoʼokol u beeloʼoboʼ. Bey túunoʼ le u herenciaʼoboʼ yaan u xuʼulul u pertenecer tiʼ le herencia tsʼaʼantoʼonoʼ.
4 Le kéen kʼuchuk túun u añoil le Jubileo*+ tu kaajil Israeloʼ, u herencia le koʼoleloʼoboʼ yaan xan u tsʼaʼabal ichil u herencia le tribu tuʼux yanoʼoboʼ. Bey túunoʼ u herencia le koʼoleloʼoboʼ yaan u xuʼulul u pertenecer tiʼ le herencia tsʼaʼan tiʼ u tribu k-papáʼoboʼ».
5 Moisés túuneʼ tu yaʼalaj tiʼ le israelitaʼob le baʼax tu yaʼalaj Jéeobaoʼ: «Le baʼax ku yaʼalik u tribu u paalal Joséoʼ maʼalob.
6 Lelaʼ letiʼe baʼax tsʼoʼok u yaʼalik Jéeoba yoʼolal u hijaʼob Zelofeadaʼ: ‹Letiʼobeʼ jeʼel u páajtal u tsʼoʼokol u beeloʼob yéetel jeʼel máaxak u kʼáatoʼobeʼ. Chéen baʼaleʼ unaj u tsʼoʼokol u beeloʼob yéetel juntúul máax ku taal tiʼ junpʼéel familia tiʼ u tribu u papáʼob.
7 Mix junpʼéel u herencia le israelitaʼob unaj u máan tiʼ uláakʼ tribuoʼ, tumen le israelitaʼoboʼ unaj u pʼáatal tiʼ letiʼob le herencia tsʼaʼab tiʼ u tribu u papáʼoboʼ.
8 Tuláakal hijatsil ka yanak u herencia ichil u tribuʼob u kaajil Israeleʼ, unaj u tsʼoʼokol u beel yéetel juntúul máax ku taal tiʼ u tribu u papá,+ beyoʼ tiʼ le israelitaʼoboʼ yaan u pʼáataltiʼob le herencia tsʼaʼab tiʼ u yúuchben láakʼtsiloʼoboʼ.
9 Mix junpʼéel herencia unaj u máan tiʼ uláakʼ tribu, tumen le herencia tsʼaʼab tiʼ cada tribu tiʼ u kaajil Israeleʼ unaj u pʼáatal tiʼ letiʼob›».
10 U hijaʼob Zelofeadeʼ tu beetoʼob jach jeʼex tu yaʼalil Jéeoba tiʼ Moiséseʼ.+
11 Yoʼolal leloʼ Malá, Tirzá, Oglá, Milká yéetel Noá, u hijaʼob Zelofeadeʼ,+ tsʼoʼok u beeloʼob yéetel u hijoʼob u sukuʼunoʼob u papáʼob.
12 Letiʼobeʼ tsʼoʼok u beeloʼob yéetel xiiboʼob ku taaloʼob tiʼ u familiaʼob Manasés, u hijo José, utiaʼal ka pʼáatak u herenciaʼob ichil u tribu u papáʼob.
13 Leloʼobaʼ letiʼe mandamientoʼob yéetel le leyoʼob tu yaʼalaj Jéeoba tiʼ Moisés ka u tsʼáa tiʼ le israelitaʼob teʼ tu desiertoil Moaboʼ, naatsʼ tiʼ le Jordánoʼ yéetel aktáan tiʼ Jericó.+
Notas
^ Ilawil página 2566.